ನೋಟು ಅಮಾನ್ಯೀಕರಣ ಆರ್ಥಿಕತೆ ಮೇಲಾದ ಭಯೋತ್ಪಾದಕ ದಾಳಿ : ರಾಹುಲ್‌ ಗಾಂಧಿ ವಾಗ್ದಾಳಿ

ನವದೆಹಲಿ: ನೋಟು ಅಮಾನ್ಯೀಕರಣಗೊಂಡು ಇಂದಿಗೆ ಮೂರು ವರ್ಷ ಪೂರ್ಣಗೊಂಡ ಹಿನ್ನೆಲೆಯಲ್ಲಿ ಕಾಂಗ್ರೆಸ್ ಪಕ್ಷ ಶುಕ್ರವಾರ ನರೇಂದ್ರ ಮೋದಿ ಸರ್ಕಾರವನ್ನು ತೀವ್ರವಾಗಿ ತರಾಟೆಗೆ ತೆಗೆದುಕೊಂಡಿದೆ. ಕಾಂಗ್ರೆಸ್‌ ನಾಯಕ ರಾಹುಲ್‌ ಗಾಂಧಿ ಅವರು ನೋಟು ಅಮಾನ್ಯೀಕರಣವನ್ನು 'ಭಯೋತ್ಪಾದಕ ದಾಳಿ'ಗೆ ಹೋಲಿಸಿದ್ದು, ತೀವಾಗಿ ಟೀಕಿಸಿದ್ದಾರೆ.

'ನೋಟು ಅಮಾನ್ಯೀಕರಣ' ಎಂಬ ಭಯೋತ್ಪಾದಕ ದಾಳಿಯು ಭಾರತದ ಆರ್ಥಿಕತೆಯನ್ನಯ ಧ್ವಂಸಗೊಳಿಸಲು ಆರಂಭವಾಗಿ ಇಂದಿಗೆ ಮೂರು ವರ್ಷವಾಯ್ತು. ಅನೇಕ ಜೀವಗಳನ್ನು ಬಲಿ ತೆಗೆದುಕೊಂಡ, ಲಕ್ಷಾಂತರ ಸಣ್ಣ ಉದ್ಯಮಗಳನ್ನು ನಾಶಪಡಿಸಿದ ಮತ್ತು ಲಕ್ಷಾಂತರ ಭಾರತೀಯರನ್ನು ನಿರುದ್ಯೋಗಿಗಳನ್ನಾಗಿ ಮಾಡಿದ ಭಯೋತ್ಪಾದಕ ದಾಳಿಗೆ ಇದಾಗಿದೆ.’ ಈ ದಾಳಿಯ ಹಿಂದಿರುವ ಸೂತ್ರದಾರಿಗಳನ್ನು ನ್ಯಾಯದ ಪರಿದಿಗೆ ತರಬೇಕಿದೆ ಎಂದು ರಾಹುಲ್‍ ಗಾಂಧಿ ಟ್ವೀಟ್ ಮಾಡಿದ್ದಾರೆ.



ಇಂದಿಗೆ ಮೂರು ವರ್ಷಗಳ ಹಿಂದೆ. ಪ್ರಧಾನಿ ನರೇಂದ್ರ ಮೋದಿ ಆಶ್ಚರ್ಯಕರ ರೀತಿಯಲ್ಲಿ ನೋಟು ಮಾನ್ಯೀಕರಣ ಕುರಿತು ಘೋಷಣೆ ಹೊರಡಿಸಿದ್ದರು. ಕನಿಷ್ಠನಗದು ಆರ್ಥಿಕತೆ, ಡಿಜಿಟಲ್‌ ಆರ್ಥಿಕತೆ ಹಾಗೂ ಕಪ್ಪು ಹಣ ನಿಯಂತ್ರಣದಂತಹ ಪ್ರಮುಖ ಉದ್ದೇಶಗಳೊಂದಿಗೆ ಈ ಕ್ರಮ ಕೈಗೊಳ್ಳಲಾಗಿತ್ತು.

2016ರ ನವೆಂಬರ್ 6 ರಂದು ರಾತ್ರಿ 8 ಗಂಟೆಗೆ ದೂರ್ದರ್ಶನದಲ್ಲಿ ರಾಷ್ಟ್ರವನ್ನು ಉದ್ದೇಶಿಸಿ ಮಾಡಿದ ಭಾಷಣದಲ್ಲಿ ನರೇಂದ್ರ ಮೋದಿ, ಭ್ರಷ್ಟಾಚಾರ, ಕಪ್ಪು ಹಣ ಮತ್ತು ಭಯೋತ್ಪಾದನೆಗೆ ಹಣಕಾಸು ನೆರವು ಕೊನೆಗೊಳಿಸುವುದಕ್ಕೆ ನೋಟು ಅಮಾನ್ಯೀಕರಣ ಕ್ರಮ ತೆಗೆದುಕೊಳ್ಳಲಾಗುತ್ತಿದೆ ಎಂದು ಹೇಳಿದ್ದರು.



ಪ್ರಿಯಾಂಕಾ ಗಾಂಧಿ ಪ್ರಶ್ನೆ:
'ನೋಟು ಅಮಾನ್ಯೀಕರಣ' ದಿಂದ ಆಗಿರುವ ನಷ್ಟದ ಹೊಣೆ ಹೊರಲು ಯಾರಾದರೂ ತಯಾರಿದ್ದಾರೆಯೇ? ಎಂದು ಕಾಂಗ್ರೆಸ್ ಪ್ರಧಾನ ಕಾರ್ಯದರ್ಶಿ ಪ್ರಿಯಾಂಕಾ ಗಾಂಧಿ ಅವರು ಬಿಜೆಪಿ ಸರ್ಕಾರವನ್ನು ಪ್ರಶ್ನಿಸಿದ್ದಾರೆ. ಅಮಾನ್ಯೀಕರಣದಿಂದಾಗಿ ಈ ಮೂರು ವರ್ಷಗಳಲ್ಲಿ ದೇಶದ ಆರ್ಥಿಕತೆ ನಾಶವಾಗಿರುವುದು ಈಗಾಗಲೇ ಸಾಬೀತಾಗಿದೆ.’ ಎಂದು ಪ್ರಿಯಾಂಕಾ ಟ್ವೀಟ್ ಮಾಡಿದ್ದಾರೆ.