7 ವರ್ಷದ ಬಾಲಕನ ಬಾಯಲ್ಲಿ 527 ಹಲ್ಲು!

ಚೆನ್ನೈ: ತಮ್ಮ ಮಗನ ಬಲಬದಿಯ ಕೆನ್ನೆ ಊದಿಕೊಂಡಿರುವುದನ್ನು ಗಮನಿಸಿ ಪಾಲಕರು ದಂತವೈದ್ಯರ ಬಳಿಗೆ ದೌಡಾಯಿಸಿದಾಗ ಆಶ್ಚರ್ಯ ಕಾದಿತ್ತು. ಏಳು ವರ್ಷ ಬಾಲಕ ರವೀಂದ್ರನಾಥನ ಬಲ ದವಡೆಯ ಕೆಳಗೆ ಸುಮಾರು 527 ಹಲ್ಲುಗಳು ಬೆಳೆದುಕೊಂಡಿದ್ದವು!

ಹೌದು, ಇದನ್ನು ಕಂಡು ವೈದ್ಯರು ಕೂಡ ಕ್ಷಣಕಾಲ ಆಶ್ಚರ್ಯ ವ್ಯಕ್ತಪಡಿಸಿದ್ದರು. ಬಳಿಕ ಶಸ್ತ್ರಚಿಕಿತ್ಸೆ ನಡೆಸಿ ಅನಗತ್ಯ ಹಲ್ಲುಗಳನ್ನು ಕೀಳಲಾಗಿದ್ದು, ಕೇವಲ 21 ಅಗತ್ಯ ಹಲ್ಲುಗಳನ್ನು ಮಾತ್ರ ಉಳಿಸಲಾಗಿದೆ.

ಈ ಅಪರೂಪದ ದಂತವೈದ್ಯಕೀಯ ಶಸ್ತ್ರಚಿಕಿತ್ಸೆ ನಡೆದಿದ್ದು ಚೆನ್ನೆ ೖನ ಸವೀತಾ ಡೆಂಟಲ್‌ ಕಾಲೇಜಿನಲ್ಲಿ.
ನನ್ನ ಮಗ ಮೂರು ವರ್ಷದವನಿದ್ದಾಗ ಬಲಗೆನ್ನೆ ಊದಿಕೊಳ್ಳಲು ಆರಂಭಿಸಿತು. ಸರಕಾರಿ ಆಸ್ಪತ್ರೆಗೆ ಕರೆದೊಯ್ದಾಗ ಆತ ಪರೀಕ್ಷೆಗಳಿಗೆ ಕೂರಲು ಒಪ್ಪದೆ ಹಠ ಮಾಡಿದ. ಸಣ್ಣ ಮಗು ಎಂದು ನಾವು ಕೂಡ ನಿರ್ಲಕ್ಷ್ಯ ಮಾಡಿದೆವು. ಆದರೆ ನಂತರ ಹಲ್ಲುಗಳು ಹೆಚ್ಚಾಗುತ್ತಲೇ ಹೋಗಿ ಗಾಬರಿಗೊಂಡು ಮತ್ತೆ ಆಸ್ಪತ್ರೆಗೆ ಬಂದೆವು ಎಂದು ಬಾಲಕನ ತಂದೆ ಎಸ್‌.ಪ್ರಭುದಾಸ್‌ ಹೇಳಿದ್ದಾರೆ. ಸಣ್ಣ ಹಲ್ಲುಗಳ ಒಂದು ಚೀಲ ದವಡೆಯ ಕೆಳಗೆ ಬೆಳೆದಿತ್ತು ಎಂದು ಶಸ್ತ್ರಚಿಕಿತ್ಸೆ ನಡೆಸಿದ ಡಾ. ಸೆಂದಿಲ್‌ನಾಥನ್‌ ಹೇಳಿದ್ದಾರೆ.