ವಿಶ್ವವನ್ನೇ ನಿಬ್ಬೆರಗಾಗಿಸಿದ ಭಾರತೀಯ ಪೋರ!

ಮುಂಬಯಿ: ಕೇವಲ 64ಗ್ರಾಂನ ಉಪಗ್ರಹವೊಂದನ್ನು ನೀವು ಊಹಿಸಬಲ್ಲಿರಾ? ಒಂದು ವೇಳೆ ಅಂತಹ ಉಪಗ್ರಹವನ್ನು ನಿರ್ಮಾಣ ಮಾಡಲು ಸಾಧ್ಯ ಎಂದು ಭಾವಿಸುವುದಾದರೆ ಈ ಸುದ್ದಿ ನಿಮಗೆ ಶಾಕ್‌ ನೀಡುವುದಂತೂ ಖಚಿತ. ಏಕೆಂದರೆ ಈ ಉಪಗ್ರಹವನ್ನು ತಯಾರಿಸಿದವರು ಖ್ಯಾತ ವಿಜ್ಞಾನಿಯೂ ಅಲ್ಲ, ಯಾವ ಎಂಜಿನಿಯರ್‌ ವಿದ್ಯಾರ್ಥಿಯಂತೂ ಅಲ್ಲವೇ ಅಲ್ಲ.

ಉಪಗ್ರಹ ಉಡಾವಣೆ ಹಾಗೂ ಅಂತರಿಕ್ಷ ಕ್ಷೇತ್ರದಲ್ಲಿ ಭಾರತದ ಸಾಧನೆ ಯಾವ ದೇಶಕ್ಕಿಂತ ಕಮ್ಮಿಯಿಲ್ಲ. ಇದಕ್ಕೆ ತಕ್ಕಂತೆ ಭಾರತದ 18ರ ಪೋರನೊಬ್ಬ ಇಡೀ ಜಗತ್ತೇ ನಿಬ್ಬೆರಗಾಗುವಂತಹ ಅತಿ ಹಗುರ ಉಪಗ್ರಹವನ್ನು ತಯಾರಿಸಿದ್ದಾನೆ. ತಮಿಳುನಾಡಿನ ಪಲ್ಲಾಪಟ್ಟಿಯಲ್ಲಿ ವಾಸಿಸುವ ರಿಫತ್‌ ಶಾರೂಕ್‌ ಕುರಿತು ನಾವಿಲ್ಲಿ ಹೇಳುತ್ತಿದ್ದೇವೆ. ಈತನ ಸಾಧನೆ, ದೇಶದ ಕೀರ್ತಿಯನ್ನು ಜಗದಗಲ ಪಸರಿಸಿದೆ.


ರಿಫತ್‌, ತಾನು ನಿರ್ಮಿಸಿರುವ 64 ಗ್ರಾಂ ತೂಕದ ಸ್ಯಾಟಲೈಟ್‌ಗೆ ಮಾಜಿ ರಾಷ್ಟ್ರಪತಿ, ದೇಶದ ಖ್ಯಾತ ವಿಜ್ಞಾನಿ ಅಬ್ದುಲ್‌ ಕಲಾಂ ಅವರ ಹೆಸರನ್ನುಇಟ್ಟಿದ್ದಾನೆ. ಅತಿ ಹಗುರದ 'ಕಲಾಂಸ್ಯಾಟ್‌' (KalamSat)ಉಪಗ್ರಹವನ್ನು ಅಮೆರಿಕದ ಬಾಹ್ಯಾಕಾಶ ಸಂಶೋಧನಾ ಸಂಸ್ಥೆ (ನಾಸಾ) ಉಡಾವಣೆ ಮಾಡಿದೆ. ಭಾರತೀಯ ವಿದ್ಯಾರ್ಥಿಯೊಬ್ಬ ನಿರ್ಮಿಸಿದ ಸೆಟಲೈಟ್‌ನ್ನು ಬಿಡುಗಡೆ ಮಾಡುತ್ತಿರುವುದು ನಾಸಾ ಇತಿಹಾಸದಲ್ಲೇ ಮೊದಲು.

ನಾಸಾ ಸಹಯೋಗಲ್ಲಿ ಏರ್ಪಡಿಸಲಾದ 'ಕ್ಯೂಬ್ಸ್ ಇನ್‌ ಸ್ಪೇಸ್‌' ಸ್ಪರ್ಧೆಗೆ ಈ ಉಪಗ್ರಹವನ್ನು ತಯಾರಿಸಲಾಗಿತ್ತು. ಈ ಸ್ಯಾಟಲೈಟ್‌ನ ಪ್ರಮುಖ ಉದ್ದೇಶವೆಂದರೆ 3ಡಿ ಪ್ರಿಂಟೆಡ್‌ ಕಾರ್ಬನ್‌ ಫೈಬರ್‌ನ ಪರ್‌ಫಾರ್ಮನ್ಸ್‌ ಪ್ರದರ್ಶನ ಮಾಡುವುದು ಮತ್ತು ತಾಪಮಾನ ಅಥವಾ ರೇಡಿಯೇಶನ್‌ನ್ನು ದಾಖಲಿಸುವುದು. ಸುಮಾರು 57 ದೇಶಗಳ ಅಭ್ಯರ್ಥಿಗಳು ಪಾಲ್ಗೊಂಡಿದ್ದ ಈ ಸ್ಪರ್ಧೆಯಲ್ಲಿ ರಿಫತ್‌ನ ಈ ಸ್ಯಾಟಲೈಟ್‌ನ್ನು ಆಯ್ಕೆ ಮಾಡಿರುವುದು ನಿಜಕ್ಕೂ ಸಾಧನೆಯೇ ಸರಿ.

ಈ ಸ್ಯಾಟಲೈಟ್‌ ತಯಾರಿಗೂ ಮುನ್ನ ಪ್ರಪಂಚದ ಹಲವಾರು ಕ್ಯೂಬ್‌ ಸ್ಯಾಟಲೈಟ್‌ಗಳ ಬಗ್ಗೆ ಸಂಶೋಧನೆ ಮಾಡಿದ್ದೆವು. ಇದರಲ್ಲಿ 'ಕಲಾಂಸ್ಯಾಟ್‌' ಅತ್ಯಂತ ಸಣ್ಣ ಸ್ಯಾಟಲೈಟ್‌ ಆಗಿದೆ ಎಂದು ರಿಫತ್‌ ತಿಳಿಸಿದ್ದಾರೆ.