ತಿರುಪತಿಯಲ್ಲಿ ಮಹಾಸಂಪ್ರೋಕ್ಷಣ: ಹುಂಡಿ ಕಾಣಿಕೆ ಸಂಗ್ರಹ ಗಣನೀಯ ಇಳಿಕೆ

ತಿರುಮಲ: ಪ್ರಸಿದ್ಧ ತಿರುಮಲ ತಿರುಪತಿ ದೇಗುಲದಲ್ಲಿ ಐದು ದಿನಗಳ ಮಹಾಸಂಪ್ರೋಕ್ಷಣಂ ಭಾನುವಾರ ಆರಂಭಗೊಂಡಿದ್ದು, ದೇಗುಲ ಪ್ರವೇಶಕ್ಕೆ ಜನಸಾಮಾನ್ಯರಿಗೆ ನಿರ್ಬಂಧ ವಿಧಿಸಲಾಗಿದೆ. ಹೀಗಾಗಿ ಭಕ್ತಾದಿಗಳ ಸಂಖ್ಯೆಯಲ್ಲಿ ಇಳಿಕೆಯಾಗಿರುವುದರಿಂದ ದೇಗುಲದ ಹುಂಡಿಯಲ್ಲಿ ಸಂಗ್ರಹವಾಗುವ ಮೊತ್ತದಲ್ಲಿ ಗಣನೀಯ ಇಳಿಕೆಯಾಗಿದೆ.

ಮಹಾಸಂಪ್ರೋಕ್ಷಣ ಪ್ರತಿ 12 ವರ್ಷಗಳಿಗೊಮ್ಮೆ ನಡೆಯುತ್ತಿದ್ದು, ಆ ಸಂದರ್ಭದಲ್ಲಿ ಐದು ದಿನ ದೇಗುಲದಲ್ಲಿ ವಿವಿಧ ಧಾರ್ಮಿಕ ಮತ್ತು ವೈದಿಕ ಕಾರ್ಯಗಳು ನಡೆಯುತ್ತವೆ. ಐದು ದಿನಗಳ ಅಷ್ಟಬಂಧ ಬಾಲಾಲಯ ಮಹಾ ಸಂಪ್ರೋಕ್ಷಣಂನ ಸಂದರ್ಭದಲ್ಲಿ ಬಿಂಬ ಪ್ರತಿಷ್ಟೆ, ಕಲಶಾಭಿಷೇಕವನ್ನು ವೈದಿಕ ವಿಧಿವಿಧಾನಗಳ ಮೂಲಕ ಕೈಗೊಳ್ಳಲಾಗುತ್ತದೆ. ಈ ಸಂದರ್ಭದಲ್ಲಿ ದೇಗುಲದ ಎಲ್ಲ ಪ್ರಮುಖ ಅರ್ಚಕರು ಉಪಸ್ಥಿತರಿದ್ದು, ವೈದಿಕ ಮತ್ತು ಧಾರ್ಮಿಕ ಕ್ರೀಯಾದಿಗಳನ್ನು ನಡೆಸಿಕೊಡಲಿದ್ದಾರೆ.

ಹೀಗಾಗಿ ಜನಸಾಮಾನ್ಯರ ದೇಗುಲ ದರ್ಶನಕ್ಕೆ ತಾತ್ಕಾಲಿಕ ತಡೆ ನೀಡಲಾಗುತ್ತಿದೆ. ಚಿನ್ನ ಮತ್ತಿತರ ಹರಕೆ ಕಾಣಿಕೆಯ ಹೊರತಾಗಿ ಎಲ್ಲ ಹುಂಡಿಗಳಲ್ಲಿನ ಮೊತ್ತ ಒಟ್ಟು ಸುಮಾರು 3 ಕೋಟಿ ರೂ. ಸಂಗ್ರಹವಾಗುತ್ತದೆ.

ಆದರೆ ಮಹಾಸಂಪ್ರೋಕ್ಷಣ ಹಿನ್ನೆಲೆಯಲ್ಲಿ ದೇಗುಲ ದರ್ಶನಕ್ಕೆ ಅವಕಾಶವಿಲ್ಲದಿರುವುದರಿಂದ ಭಕ್ತರ ಸಂಖ್ಯೆ ಇಳಿಕೆಯಾಗಿದೆ. ಹೀಗಾಗಿ ಸೋಮವಾರ ಹುಂಡಿಯ ಮೊತ್ತ ಎಣಿಕೆ ಮಾಡಿದಾಗ 73 ಲಕ್ಷ ರೂ. ಮಾತ್ರ ಸಂಗ್ರಹವಾಗಿರುವುದು ಕಂಡುಬಂದಿದ್ದು, ಇಷ್ಟೊಂದು ಕಡಿಮೆ ಪ್ರಮಾಣದ ಹುಂಡಿ ಕಾಣಿಕೆ ಸಂಗ್ರಹವಾಗಿದೆ.

ಮೂಲ ವರದಿ: ಸಮಯಂ ತೆಲುಗು