ಸ್ಟಾಲಿನ್ ಡಿಎಂಕೆಯ ಉತ್ತರಾಧಿಕಾರಿ: ಕರುಣಾನಿಧಿ

ಚೆನ್ನೈ: ಸ್ಟಾಲಿನ್ ಅವರನ್ನು ಪಕ್ಷದ ಉತ್ತರಾಧಿಕಾರಿಯಾಗಿ ಡಿಎಂಕೆ ಮುಖ್ಯಸ್ಥ ಕರುಣಾನಿಧಿ ಘೋಷಿಸಿದ್ದಾರೆ.

ಆದರೆ, ರಾಜಕೀಯದಿಂದ ನಿವೃತ್ತಿಯಾಗುವ ವದಂತಿಗಳನ್ನು 92 ವರ್ಷದ ಕರುಣಾನಿಧಿ ಖಡಾಖಂಡಿತವಾಗಿ ಅಲ್ಲಗಳೆದಿದ್ದಾರೆ.

ತಮಿಳು ವಾರ ಪತ್ರಿಕೆಯೊಂದಕ್ಕೆ ಸಂದರ್ಶನ ನೀಡಿರುವ ಕರುಣಾನಿಧಿ, 'ಸ್ಟಾಲಿನ್ ನನ್ನ ರಾಜಕೀಯ ಉತ್ತರಾಧಿಕಾರಿಯಾಗಿದ್ದು, ಅಳಗಿರಿಯನ್ನೂ ಯಾವುದೇ ಕಾರಣಕ್ಕೂ ಬಿಟ್ಟು ಕೊಡುವುದಿಲ್ಲ,' ಎಂದಿದ್ದಾರೆ.

ಡಿಎಂಕೆಯ ಉತ್ತರಾಧಿಕಾರ ಪಡೆಯಲು ಅಳಗಿರಿ ಹಾಗೂ ಸ್ಟಾಲಿನ್ ನಡುವೆ ಕಳೆದ ಹಲವು ವರ್ಷಗಳಿಂದಲೂ ಹಗ್ಗ ಜಗ್ಗಾಟ ನಡೆಯುತ್ತಿತ್ತು. ಕರುಣಾನಿಧಿ ಸ್ಟಾಲಿನ್‌ ಅವರ ಬೆಂಬಲಕ್ಕೆ ನಿಂತ ಹಿನ್ನೆಲೆಯಲ್ಲಿ, ಅಳಗಿರಿ ಕಳೆದ ವಿಧಾನಸಭೆ ಚುನಾವಣೆ ವೇಳೆ ಪಕ್ಷದ ಪರ ಪ್ರಚಾರ ನಡೆಸದಿರಲು ನಿರ್ಧರಿಸಿದ್ದರು.

ಉತ್ತರಾಧಿಕಾರದ ಬಗ್ಗೆ ಮತ್ತಷ್ಟು ಸ್ಪಷ್ಟನೆ ಕೇಳಿದಾಗ, 'ಕರುಣಾನಿಧಿ ರಾಜಕೀಯ ನಿವೃತ್ತಿ ಪಡೆಯುತ್ತಾರೆಂದು ಅರ್ಥೈಸಿಕೊಳ್ಳಬೇಡಿ. ನಾನು ನಿವೃತ್ತಿಯಾಗುವ ಪ್ರಶ್ನೆಯೇ ಇಲ್ಲ. ಅಲ್ಲೀವರೆಗೂ ಸ್ಟಾಲಿನ್‌ಗೆ ನಾಯಕತ್ವವನ್ನು ಹಸ್ತಾಂತರಿಸುವುದಿಲ್ಲ,' ಎಂದು ಕರುಣಾನಿಧಿ ಹೇಳಿದ್ದಾರೆ.