ಅಹಮದಾಬಾದ್‌: ಒಂದು ತಿಂಗಳ ಗಂಡು ಶಿಶುವಿಗೆ ಹುಟ್ಟಿದಾಗಲೇ ಹಲ್ಲುಗಳಿದ್ದು ಇದೊಂದು ಅಪರೂಪದ ವೈದ್ಯಕೀಯ ವಿಸ್ಮಯವಾಗಿದೆ.
ಏಳು ಹಲ್ಲುಗಳನ್ನು 2 ಶಸ್ತ್ರಚಿಕಿತ್ಸೆ ಮೂಲಕ ತೆಗೆದ ಅಪರೂಪದ ಘಟನೆಗೆ ಇಲ್ಲಿನ ಸಿಟಿ ಆಸ್ಪತ್ರೆ ಸಾಕ್ಷಿಯಾಗಿದೆ.
ಮಗುವಿಗೆ ಹುಟ್ಟುವಾಗಲೇ 7 ಹಲ್ಲುಗಳಿದ್ದವು. ಆದರೆ ಅವು ಅಲುಗಾಡುತ್ತಿದ್ದುದರಿಂದ ಮೊಲೆಯೂಡಿಸಲು ಕಷ್ಟವಾಗುತ್ತಿತ್ತು. ಹೀಗಾಗಿ ಮಗುವನ್ನು ಆಸ್ಪತ್ರೆಗೆ ಕರೆದೊಯ್ದೆವು. 15 ನಿಮಿಷಗಳಲ್ಲಿ 2 ಶಸ್ತ್ರಚಿಕಿತ್ಸೆಗಳ ಮೂಲಕ ಆ ಏಳೂ ಹಲ್ಲುಗಳನ್ನು ವೈದ್ಯರು ಕಿತ್ತರು ಎಂಬುದಾಗಿ ಪೋಷಕರು ಖಾಸಗಿ ವಾಹಿನಿಗೆ ತಿಳಿಸಿದ್ದಾರೆ.
ಗೆಳೆಯರು ಹಾಗೂ ಸಂಬಂಧಿಕರ ಸಲಹೆಯ ಮೇರೆಗೆ ಮಗುವಿನ ಪೋಷಕರು ಅಹಮದಾಬಾದ್‌ನಲ್ಲಿ ಶಿಶುವೈದ್ಯ ಡಾ. ನಿರವ್‌ ಬೆನಾನಿ ಹಾಗೂ ಶಿಶು ದಂತವೈದ್ಯ ಡಾ.ಮಿತ್‌ ರಾಮಾತ್ರಿ ಅವರನ್ನು ಭೇಟಿಯಾಗಿದ್ದರು.
ಮಗುವನ್ನು ಪರೀಕ್ಷಿಸಿದ ಬಳಿಕ, ''ಇದೊಂದು ಜಟಿಲ ಪ್ರಕರಣ. ಶಸ್ತ್ರಚಿಕಿತ್ಸೆ ವೇಳೆ ತುಂಬಾನೇ ಮುನ್ನೆಚ್ಚರಿಕೆ ವಹಿಸಬೇಕಾಗುತ್ತದೆ. ಇಲ್ಲಿಯ ತನಕ ನವಜಾತ ಶಿಶುವಿಗೆ 7 ಹಲ್ಲುಗಳಿದ್ದುದನ್ನು ನಾನು ನೋಡಿರಲೇ ಇಲ್ಲ. ಇದು ಒಂದು ತಿಂಗಳ ಕೂಸಾದ್ದರಿಂದ ಮಾಮೂಲಿ ಅನಸ್ತೇಸಿಯಾ ಕೊಡಲು ಸಾಧ್ಯವಿರಲಿಲ್ಲ. ಹಾಗಾಗಿ ಡಾಕ್ಟರ್‌ ಬೆನಾನಿ ಅವರ ಸಲಹೆಯಂತೆ ಮಗುವಿಗೆ ಲೋಕಲ್‌ ಅನಸ್ತೇಸಿಯಾ ನೀಡಿದೆವು,'' ಎಂದು ಡಾ. ರಾಮಾತ್ರಿ ಅವರು ತಿಳಿಸಿದ್ದಾರೆ.
ಹಲ್ಲುಗಳು ಅಲುಗಾಡುತ್ತಿದ್ದು ಅವುಗಳನ್ನು ಮಗು ನುಂಗುವ ಸಾಧ್ಯತೆಗಳಿದ್ದುದರಿಂದ ಶಸ್ತ್ರಚಿಕಿತ್ಸೆ ಮಾಡುವುದು ದೊಡ್ಡ ಸವಾಲಿನ ಕೆಲಸವಾಗಿತ್ತು ಎಂದು ಅವರು ಹೇಳಿಕೊಂಡಿದ್ದಾರೆ. ''ಮಗುವಿನ ಬಾಯಿ ತೀರಾ ಚಿಕ್ಕದಿದ್ದು, ಹಲ್ಲುಗಳು ಬಾಯಿಗೆ ಬೀಳುವ ಸಾಧ್ಯತೆಗಳೇ ಹೆಚ್ಚಾಗಿದ್ದವು. ಎಲ್ಲಾ ಹಲ್ಲುಗಳನ್ನು ಕೀಳಲು 15 ನಿಮಿಷ ತಗುಲಿದವು,'' ಎಂದು ಅವರು ತಿಳಿಸಿದ್ದಾರೆ.
ಶಸ್ತ್ರಚಿಕಿತ್ಸೆ ಮಾಡುವುದು ತಡವಾಗಿದ್ದರೆ ಮಗುವಿಗೆ ತೊಂದರೆಯಾಗುವ ಸಾಧ್ಯತೆಗಳಿದ್ದವು ಎಂದೂ ಡಾ. ರಾಮಾತ್ರಿ ತಿಳಿಸಿದ್ದಾರೆ.
''ಶಸ್ತ್ರಚಿಕಿತ್ಸೆ ಮಾಡುವುದು ವಿಳಂಬವಾಗಿದ್ದರೆ ಅದಾಗಲೇ ಅಲುಗಾಡುತ್ತಿದ್ದ ಹುಟ್ಟುಹಲ್ಲುಗಳು ಮಗುವಿನ ಶ್ವಾಸನಾಳ ಅಥವಾ ಅನ್ನನಾಳದಲ್ಲಿ ಸಿಕ್ಕಿಹಾಕಿಕೊಳ್ಳುವ ಸಾಧ್ಯತೆಗಳಿದ್ದವು,'' ಎಂಬುದಾಗಿಯೂ ಅವರು ತಿಳಿಸಿದ್ದಾರೆ.
Doctor Removes Teeth from 1 Month old baby