ಇಂದೋರ್‌ನಲ್ಲಿ ಭಾರಿ ಪ್ರಮಾಣದ ಡೆಡ್ಲಿ ರಾಸಾಯನಿಕ ವಶ: ಅಮೆರಿಕಾ ವಿರೋಧಿ ಪಿಎಚ್‌ಡಿ ಪದವೀಧರ ಅರೆಸ್ಟ್

ಹೊಸದಿಲ್ಲಿ: ರಕ್ಷಣಾ ಸಂಶೋಧನೆ ಮತ್ತು ಅಭಿವೃದ್ಧಿ ಸಂಸ್ಥೆನ ವಿಜ್ಞಾನಿಗಳ ಸಹಾಯದಿಂದ ಕಂದಾಯ ಗುಪ್ತಚರ ನಿರ್ದೇಶನಾಲಯ (ಡಿಆರ್‌ಐ) ಅಧಿಕಾರಿಗಳು ನಡೆಸಿರುವ ಸುದೀರ್ಘ ಕಾರ್ಯಚರಣೆಯಲ್ಲಿ ಇಂದೋರ್‌ನಲ್ಲಿ ಅಕ್ರಮವಾಗಿ ಕಾರ್ಯನಿರ್ವಹಿಸುತ್ತಿದ್ದ ಪ್ರಯೋಗಾಲಯದ ಮೇಲೆ ದಾಳಿ ನಡೆಸಿ ಸುಮಾರು 9 ಕೆಜಿ ಸಂಶ್ಲೇಷಿತ ಒಪಿಯಾಡ್ ಹಾಗೂ ಫೆಂಟನೈಲ್ ಎಂಬ ಮಾರಕ ರಾಸಾಯನಿಕ ವಶಪಡಿಸಿಕೊಳ್ಳಲಾಗಿದೆ.

ವಶಪಡಿಸಿಕೊಳ್ಳಲಾದ ರಾಸಾಯನಿಕ ಸುಮಾರು 40-50 ಲಕ್ಷ ಜನರನ್ನು ಕೊಲ್ಲುವ ಸಾಮರ್ಥ್ಯ ಹೊಂದಿತ್ತು ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ಸ್ಥಳೀಯ ವ್ಯಾಪಾರಿ ಹಾಗೂ ಅಮೆರಿಕ ವಿರೋಧಿಯಾಗಿರುವ ಪಿಎಚ್‌ಡಿ ಪದವೀಧರ ಕೆಮೆಸ್ಟಿಯೊಬ್ಬ ಈ ಪ್ರಯೋಗಾಲಯ ನಡೆಸುತ್ತಿದ್ದ ಎಂದು ತಿಳಿದುಬಂದಿದೆ.

ಈ ಮಾರಕ ರಾಸಾಯನಿಕವನ್ನು ರಾಸಾಯನಿಕ ಯುದ್ಧದಲ್ಲಿ ಬಳಸಿದರೆ, ದೊಡ್ಡ ಪ್ರಮಾಣದ ಸಾವು-ನೋವಿಗೆ ಕಾರಣವಾಗುತ್ತದೆ. ಭಾರತದಲ್ಲಿ ಒಪಿಯಾಡ್ ಹಾಗೂ ಫೆಂಟನೈಲ್ ರಾಸಾಯನಿಕ ವಶಕ್ಕೆ ಪಡೆದಿರುವುದು ಇದೇ ಮೊದಲು ಎಂದು ಹೇಳಲಾಗುತ್ತಿದೆ.

ಘಟನೆ ಸಂಬಂಧ ಮೆಕ್ಸಿಕೋ ಪ್ರಜೆಯೊಬ್ಬನನ್ನು ಸಹ ಪೊಲೀಸರು ಬಂಧಿಸಿದ್ದಾರೆ.

'ಫೆಂಟನೈಲ್ ರಾಸಾಯನಿಕ ಹೆರಾಯಿನ್‌ಗಿಂತ 50 ಪಟ್ಟು ಶಕ್ತಿಶಾಲಿಯಾಗಿರುತ್ತದೆ. ಇದರ ಕಣಗಳನ್ನು ಉಸಿರಾಡುವಿಕೆಯು ಸಹ ಅಷ್ಟೇ ಮಾರಕವಾಗಿದೆ. ಭಾರತದ ಕಾನೂನು ಜಾರಿ ಸಂಸ್ಥೆ ಈ ರಾಸಾಯನಿಕ ವಶಪಡಿಸಿಕೊಂಡಿರುವುದು ಇದೇ ಮೊದಲು. ಭಾರತದಲ್ಲಿ ವಿಷಕಾರಿ ರಾಸಾಯನಿಕ ತಯಾರಿಸುವ ಮೊದಲ ಪ್ರಯತ್ನವನ್ನು ತಡೆಯಲು ಡಿಐಆರ್ ಯಶಸ್ವಿಯಾಗಿದೆ ಎಂದು ಡಿಆರ್‌ಐ ಮಹಾನಿರ್ದೇಶಕ ಡಿ.ಪಿ. ಡ್ಯಾಶ್ ತಿಳಿಸಿದ್ದಾರೆ.