ಮುಂಬಯಿ: ಅಖಿಲ ಭಾರತೀಯ ವಿದ್ಯಾರ್ಥಿ ಪರಿಷತ್‌ಗೆ (ಎಬಿವಿಪಿ) ರಾಷ್ಟ್ರೀಯ ಅಧ್ಯಕ್ಷರಾಗಿ ಡಾ.ಎಸ್‌.ಸುಬ್ಬಯ್ಯ ಮತ್ತು ರಾಷ್ಟ್ರೀಯ ಪ್ರಧಾನ ಕಾರ‍್ಯದರ್ಶಿಯಾಗಿ ಆಶಿಶ್‌ ಚೌಹಾಣ್‌ ಅವರನ್ನು ಅವಿರೋಧವಾಗಿ ಆಯ್ಕೆ ಮಾಡಲಾಗಿದೆ.
ಮುಂಬಯಿನಲ್ಲಿರುವ ಪರಿಷತ್‌ನ ಕೇಂದ್ರ ಕಚೇರಿಯಲ್ಲಿ ಚುನಾವಣಾ ಅಧಿಕಾರಿ ಡಾ.ರಮಣ್‌ ತ್ರಿವೇದಿ ಈ ವಿಷಯ ಪ್ರಕಟಿಸಿದರು. ಹೊಸದಾಗಿ ಆಯ್ಕೆಗೊಂಡಿರುವ ಪದಾಧಿಕಾರಿಗಳ ಅಧಿಕಾರವಧಿ ಒಂದು ವರ್ಷ(2017-18) ಇರಲಿದೆ. ಜಾರ್ಖಂಡ್‌ನ ರಾಂಚಿಯಲ್ಲಿ ನವೆಂಬರ್‌ 30ರಿಂದ ನಡೆಯಲಿರುವ ಎಬಿವಿಪಿಯ 63ನೇ ರಾಷ್ಟ್ರೀಯ ಸಮಾವೇಶದಲ್ಲಿ ಇವರು ಅಧಿಕಾರ ಸ್ವೀಕರಿಸಲಿದ್ದಾರೆ.
ಪ್ರೊ.ಡಾ.ಸುಬ್ಬಯ್ಯ ಅವರು ತಮಿಳುನಾಡಿನ ತೂತುಕುಡಿ ಜಿಲ್ಲೆಯವರು. ಆರಂಭದಿಂದಲೂ ವಿದ್ಯಾರ್ಥಿ ಚಳವಳಿಯಲ್ಲಿ ಮುಂಚೂಣಿಯಲ್ಲಿರುವ ಇವರು 1986ರಿಂದ ಎಬಿವಿಪಿಯಲ್ಲಿ ಹಲವಾರು ಜವಾಬ್ದಾರಿಗಳನ್ನು ನಿಭಾಯಿಸಿದ್ದಾರೆ. ಸದ್ಯ ಚೆನ್ನೈನ ಕಿಲಪೌಕ್‌ ಮೆಡಿಕಲ್‌ ಕಾಲೇಜಿನ ಡಿಪಾರ್ಟ್‌ಮೆಂಟ್‌ ಆಫ್‌ ಆಂಕಾಲಜಿಯ ಮುಖ್ಯಸ್ಥರಾಗಿ ಸೇವೆ ಸಲ್ಲಿಸುತ್ತಿದ್ದಾರೆ. ಇನ್ನು ಆಶಿಶ್‌ ಚೌಹಾಣ್‌ ಅವರು ಹಿಮಾಚಲ ಪ್ರದೇಶದ ಶಿಮ್ಲಾದ ರೊಹ್ರೊ ಮೂಲದವರು. ಬಿಎಸ್ಸಿ, ಎಂಬಿಎ ಪದವೀಧರರಾಗಿರುವ ಇವರು 2003ರಿಂದಲೂ ಪರಿಷತ್‌ನಲ್ಲಿ ಸಕ್ರಿಯರಾಗಿದ್ದಾರೆ.
Dr. Subbiah ABVP New President