ಗಾಯಾಳು ಯೋಧರ ಪ್ರಾಣ ರಕ್ಷಣೆಗೆ ಡಿಆರ್‌ಡಿಒ ‘ಸಂಜೀವಿನಿ

ಹೊಸದಿಲ್ಲಿ: ಪುಲ್ವಾಮಾ ದಾಳಿಯಂತಹ ಉಗ್ರ ಕೃತ್ಯಗಳು ಮತ್ತು ಯುದ್ಧದಂತಹ ಸಂದರ್ಭದಲ್ಲಿ ಗಂಭೀರವಾಗಿ ಗಾಯಗೊಳ್ಳುವ ಯೋಧರ ಪ್ರಾಣ ಉಳಿಸುವ ನಿಟ್ಟಿನಲ್ಲಿ ರಕ್ಷಣಾ ಸಂಶೋಧನೆ ಮತ್ತು ಅಭಿವೃದ್ಧಿ ಸಂಸ್ಥೆ (ಡಿಆರ್‌ಡಿಒ) ವಿಶಿಷ್ಟ ಔಷಧಗಳನ್ನು ಸಿದ್ಧಪಡಿಸಿದೆ.

ಸ್ಫೋಟದಂತಹ ಸಂದರ್ಭದಲ್ಲಿ ರಕ್ತಸ್ರಾವದಿಂದಾಗಿಯೇ ಹೆಚ್ಚು ಮಂದಿ ಯೋಧರು ಆಸ್ಪತ್ರೆಗೆ ಸಾಗಿಸುವ ಮುನ್ನವೇ ಕೊನೆಯುಸಿರೆಳೆಯುತ್ತಾರೆ. ಆಸ್ಪತ್ರೆಗೆ ಸಾಗಿಸಿದರೂ ಅಧಿಕ ರಕ್ತಸ್ರಾವದಿಂದ ಚಿಕಿತ್ಸೆ ಫಲಕಾರಿಯಾಗುವುದಿಲ್ಲ. ಹೀಗಾಗಿ ರಕ್ತಸ್ರಾವವನ್ನು ತಡೆಯುವ ಹಲವು ಪ್ರಥಮ ಚಿಕಿತ್ಸಾ ಔಷಧಗಳು ಮತ್ತು ಸಲಕರಣೆಗಳನ್ನು ಡಿಆರ್‌ಡಿಒ ಅಭಿವೃದ್ಧಿಪಡಿಸಿದೆ.

'ಕಾಂಬ್ಯಾಟ್‌ ಕ್ಯಾಷುಯಲ್ಟಿ ಡ್ರಗ್ಸ್‌' ಹೆಸರಿನ ಈ ಕಿಟ್‌ ಗಾಯದಿಂದ ರಕ್ತಸ್ರಾವ ತಡೆಯುವ ಸೀಲೆಂಟ್‌, ವಿಶಿಷ್ಟ ಡ್ರೆಸ್ಸಿಂಗ್‌ ಬ್ಯಾಂಡೇಜ್‌ ಮತ್ತು ಗ್ಲಿಸರೇಟೆಡ್‌ ಸಲೈನ್‌ಗಳನ್ನು ಒಳಗೊಂಡಿರುತ್ತದೆ. ಇವುಗಳನ್ನು ಬಳಸುವುದರಿಂದ ಆಸ್ಪತ್ರೆಗೆ ಸಾಗಿಸುವವರೆಗೂ ಯೋಧರ ಜೀವ ಉಳಿಸಬಹುದು ಎಂದು ಡಿಆರ್‌ಡಿಒ ತಿಳಿಸಿದೆ.