ಬ್ರಹ್ಮೋಸ್‌ಗಿಂತಲೂ ವೇಗದ ಕ್ಷಿಪಣಿ ತಯಾರಿಕೆಗೆ ಡಿಆರ್‌ಡಿಒದಿಂದ ಸಿದ್ಧತೆ

ಹೊಸದಿಲ್ಲಿ: ಭಾರತದ ಕ್ಷಿಪಣಿ ದಾಳಿ ಸಾಮರ್ಥ್ಯ ಹೆಚ್ಚಳಕ್ಕೆ ಉತ್ತೇಜನದ ಭಾಗವಾಗಿ, ಭಾರತವು ಮುಂದಿನ ನಾಲ್ಕೈದು ವರ್ಷಗಳಲ್ಲಿ ಸಂಪೂರ್ಣ ಹೈಪರ್‌ಸಾನಿಕ್‌ ಕ್ರೂಸ್‌ ಕ್ಷಿಪಣಿ ವ್ಯವಸ್ಥೆಯನ್ನು ಅಭಿವೃದ್ಧಿಪಡಿಸಲಿದೆ ಎಂದು ರಕ್ಷಣಾ ಸಂಶೋಧನೆ ಮತ್ತು ಅಭಿವೃದ್ಧಿ ಸಂಸ್ಥೆ (ಡಿಆರ್‌ಡಿಒ) ಹೇಳಿದೆ. ಬ್ರಹ್ಮೋಸ್‌ ಸೂಪರ್‌ಸಾನಿಕ್‌ ಕ್ಷಿಪಣಿಗಿಂತ ಕನಿಷ್ಠ ಎರಡು ಪಟ್ಟು ವೇಗದಲ್ಲಿ ಗುರಿಯನ್ನು ತಲುಪಬಲ್ಲ ಸಾಮರ್ಥ್ಯವನ್ನು ಅದು ಹೊಂದಿರಲಿದೆ ಎಂದು ಸಂಸ್ಥೆಯು ತಿಳಿಸಿದೆ.

ಡಿಆರ್‌ಡಿಒ ಸೆ.7ರಂದು ಹೈಪರ್‌ಸಾನಿಕ್‌ ಟೆಕ್ನಾಲಜಿ ಡೆಮಾನ್‌ಸ್ಪ್ರೇಟ್‌ ವೆಹಿಕಲ್‌ (ಎಚ್‌ಎಸ್‌ಟಿಡಿವಿ) ಅನ್ನು ಯಶಸ್ವಿಯಾಗಿ ಪರೀಕ್ಷಿಸಿತ್ತು. ಮುಂದೆ ಇದು ಹೈಪರ್‌ಸಾನಿಕ್‌ ಕ್ರೂಸ್‌ ಕ್ಷಿಪಣಿ ವ್ಯವಸ್ಥೆಯ ಅಭಿವೃದ್ಧಿಗೆ ಅಡಿಪಾಯ ಎನ್ನಲಾಗಿದೆ.

ಈ ಬಗ್ಗೆ ವಿವರ ನೀಡಿದ ಡಿಆರ್‌ಡಿಒ ಮುಖ್ಯಸ್ಥ ಡಾ.ಜಿ.ಸತೀಶ್‌ ರೆಡ್ಡಿ, "ಕ್ರೂಸ್‌ ಕ್ಷಿಪಣಿಗಳು ಅತ್ಯಂತ ಕಡಿಮೆ ಎತ್ತರದಲ್ಲಿ ಹಾರಾಟ ನಡೆಸುತ್ತವೆ. ಆ ಕ್ರೂಸ್‌ ಕ್ಷಿಪಣಿಯಲ್ಲಿ, ನಮ್ಮಲ್ಲಿ ಸಬ್‌ಸಾನಿಕ್‌ ಕ್ರೂಸ್‌ ಕ್ಷಿಪಣಿ, ಸೂಪರ್‌ಸಾನಿಕ್‌ ಕ್ರೂಸ್‌ ಕ್ಷಿಪಣಿ ಮತ್ತು ನಂತರ ಹೈಪರ್‌ಸಾನಿಕ್‌ ಕ್ರೂಸ್‌ ಕ್ಷಿಪಣಿಗಳು ಎಂಬ ಪ್ರಭೇದಗಳಿವೆ. ಹೈಪರ್‌ಸಾನಿಕ್‌ ಕ್ರೂಸ್‌ ಕ್ಷಿಪಣಿಗಳು ಶಬ್ದವು ಸೆಕೆಂಡಿಗೆ ಚಲಿಸುವ ವೇಗಕ್ಕಿಂತಲೂ (300+ ಮೀಟರ್‌) ಆರೇಳು ಪಟ್ಟು ಹೆಚ್ಚಿನ ವೇಗದಲ್ಲಿ ಚಲಿಸುತ್ತವೆ,'' ಎಂದರು.

''ನಾವು ಪ್ರಯೋಗಕ್ಕೆ ಬಳಸಿದ ಕ್ಷಿಪಣಿಯು 'ಸ್ಕ್ರಾಮ್‌ಜೆಟ್‌' ಎಂಜಿನ್‌ ಹೊಂದಿದ್ದು, ಇದು ವಾತಾವರಣದಲ್ಲಿನ ಗಾಳಿಯಲ್ಲಿ ಹೈಪರ್‌ಸಾನಿಕ್‌ ವೇಗದಲ್ಲಿ ಕಾರ್ಯನಿರ್ವಹಿಸುತ್ತದೆ. ವಾತಾವರಣದಲ್ಲಿನ ಆಮ್ಲಜನಕವನ್ನು ಹೀರಿಕೊಂಡು ನಂತರ ಅದನ್ನು ಉರಿಯನ್ನಾಗಿಸುತ್ತದೆ. ಈ ಪ್ರಕ್ರಿಯೆಯು ಹೈಪರ್‌ಸಾನಿಕ್‌ ವೇಗದಲ್ಲೇ ನಡೆಯುವುದು ವಿಶೇಷ,'' ಎಂದರು.

ಹೈಪರ್‌ಸಾನಿಕ್‌ ಕ್ರೂಸ್‌ ಕ್ಷಿಪಣಿ ವ್ಯವಸ್ಥೆಯನ್ನು ಸಂಪೂರ್ಣವಾಗಿ ಅಭಿವೃದ್ಧಿಪಡಿಸಲು ಎಷ್ಟು ಸಮಯ ತೆಗೆದುಕೊಳ್ಳುತ್ತದೆ ಎಂಬ ಪ್ರಶ್ನೆಗೆ ಉತ್ತರಿಸಿದ ಅವರು, ''ಉತ್ತಮ ವ್ಯಾಪ್ತಿಯನ್ನು ಹೊಂದಿರುವ ಸಂಪೂರ್ಣ ಕ್ಷಿಪಣಿ ವ್ಯವಸ್ಥೆಯನ್ನು ಪಡೆಯಲು ಸುಮಾರು ನಾಲ್ಕರಿಂದ ಐದು ವರ್ಷಗಳು ಬೇಕಾಗುತ್ತದೆ,'' ಎಂದರು.

ಪ್ರಸ್ತುತ ಬ್ರಹ್ಮೋಸ್‌ ಸೂಪರ್‌ಸಾನಿಕ್‌ ಕ್ರೂಸ್‌ ಕ್ಷಿಪಣಿಯನ್ನು ವಿಶ್ವದ ಅತಿ ವೇಗದ ಕ್ರೂಸ್‌ ಕ್ಷಿಪಣಿ ಎಂದು ಪರಿಗಣಿಸಲಾಗಿದೆ. ಇದು ಸುಮಾರು 2.8 ಮ್ಯಾಕ್‌ ವೇಗವನ್ನು ಹೊಂದಿದೆ. ಆದರೆ ಈಗ ಡಿಆರ್‌ಡಿಒ ಅಭಿವೃದ್ದಿಪಡಿಸುತ್ತಿರುವ ಕ್ಷಿಪಣಿಗಳು ಬ್ರಹ್ಮೋಸ್‌ಗಿಂತಲೂ ಕನಿಷ್ಠ ಎರಡು ಪಟ್ಟು ವೇಗವನ್ನು ಹೊಂದಿರಲಿದೆ.