ಹಳಿಯ ಮೇಲೆ ಓಡುತ್ತಿದ್ದ ಮಗುವನ್ನು ರಕ್ಷಿಸಲು ರೈಲು ನಿಲ್ಲಿಸಿದ ಚಾಲಕ

ಮಾರ್ಗೋವಾ: ಹಳಿಯ ಮೇಲೆ ಓಡುತ್ತಿದ್ದ ಪುಟ್ಟ ಮಗುವನ್ನು ರಕ್ಷಿಸಲು ಚಾಲಕ ರೈಲನ್ನೇ ನಿಲ್ಲಿಸಿದ ಪ್ರಸಂಗ ಗೋವಾದಲ್ಲಿ ಸೋಮವಾರ ಮದ್ಯಾಹ್ನ ನಡೆದಿದೆ.

ಪರ್ನೆಮ್- ಕಾರವಾರ ಡೆಮು ರೈಲು ಮಾರ್ಗೋವಾ ಮತ್ತು ಬಲ್ಲಿ ರೈಲು ನಿಲ್ದಾಣಗಳ ನಡುವೆ ಓಡುತ್ತಿದ್ದಾಗ, ಚಾಲಕ ಸುರೇಶ್ ಕುಮಾರ್ ಹಳಿಗಳ ಮೇಲೆ ನಾಲ್ಕು ವರ್ಷದ ಬಾಲಕ ಓಡುತ್ತಿರುವುದನ್ನು ನೋಡಿದ್ದಾರೆ. ಇನ್ನೊಂದು ಕ್ಷಣದಲ್ಲಿ ರೈಲು ಮಗುವಿನ ಮೇಲೆ ಚಲಿಸುವುದಿತ್ತು. ಆದರೆ ಚಾಲಕ ಮಗುವನ್ನು ರಕ್ಷಿಸಲು ನಿರ್ಧರಿಸಿದ್ದಾರೆ.

ಆತ ಕೆಲವೇ ಮೀಟರ್ ದೂರದಲ್ಲಿದ್ದಾಗ ರೈಲು ನಿಲ್ಲಿಸಿದ ಚಾಲಕ ಓಹಿ ಹೋಗಿ ಮಗುವನ್ನೆತ್ತಿಕೊಂಡಿದ್ದಾರೆ. ಪೋಷಕರಿಂದ ತಪ್ಪಿಸಿಕೊಂಡಿದ್ದ ಬಾಲಕ ಅಳುತ್ತಿತ್ತು. ಬಲ್ಲಿ ಸ್ಟೇಷನ್ ಮಾಸ್ಟರ್ ಬಳಿ ಮಗುವನ್ನೊಪ್ಪಿಸಿದ ಚಾಲಕ ಮತ್ತೆ ರೈಲನ್ನು ಚಲಾಯಿಸಿಕೊಂಡು ಮುಂದುವರಿದಿದ್ದಾನೆ.

ರೈಲು ಚಾಲಕನ ಸಮಯ ಪ್ರಜ್ಞೆ ಮತ್ತು ಹೃದಯ ವೈಶಾಲ್ಯತೆಯನ್ನು ಪ್ರಯಾಣಿಕರು ಕೊಂಡಾಡಿದ್ದಾರೆ.

ರೈಲು ಅಧಿಕಾರಿಗಳು ಮಗುವನ್ನು ಕುನ್ಕೋಲಿಮ್ ಪೊಲೀಸ್ ಠಾಣೆಗೊಪ್ಪಿಸಿದ್ದರು. ಬಹಳ ಪ್ರಯಾಸ ಪಟ್ಟ ಪೊಲೀಸರು ಕೊನೆಗೂ ಮಗುವಿನ ಪೋಷಕರನ್ನು ಪತ್ತೆ ಹಚ್ಚಿದ್ದು, ಬಿಹಾರ್ ಮೂಲದವರಾದ ಅವರು ಬಲ್ಲಿಯಲ್ಲಿ ವಾಸವಾಗಿದ್ದಾರೆ ಎಂದು ತಿಳಿದುಬಂದಿದೆ.

ಮಗುವನ್ನು ಪೋಷಕರ ಸುಪರ್ದಿಗೆ ಒಪ್ಪಿಸಲಾಗಿದೆ.