ರಾಜಸ್ಥಾನದ ಮದ್ಯದಂಗಡಿಗೆ ಹರಾಜು ಪೈಪೋಟಿ: 75 ಲಕ್ಷದ ಅಂಗಡಿ 510 ಕೋಟಿ ರೂ.ಗೆ ಬಿಕರಿ

ಜೈಪುರ: ಕೋವಿಡ್‌ ಕಾಲಘಟ್ಟದಲ್ಲಿ ಎಲ್ಲ ಬಗೆಯ ವಹಿವಾಟುಗಳಿಗೆ ಮಂಕು ಬಡಿದರೂ, ಮದ್ಯದ ಅಂಗಡಿಗಳಿಗೆ ಮಾತ್ರ ಭರಪೂರ ವ್ಯಾಪಾರ ಮುಂದುವರಿದಿದೆ. ಅಚ್ಚರಿ ಎಂದರೆ, ರಾಜಸ್ಥಾನದ ವೈನ್‌ ಶಾಪ್‌ವೊಂದು 510 ಕೋಟಿ ರೂ.ಗೆ ಹರಾಜಾಗಿದೆ!

ಖುಷಿ ಮತ್ತು ದುಃಖ ಹೆಚ್ಚಾದಾಗಲೆಲ್ಲ'ಮದ್ಯದ ಅಂಗಡಿ'ಯನ್ನೇ ನೆಚ್ಚಿಕೊಳ್ಳುವವರ ಸಂಖ್ಯೆ ಸಾಕಷ್ಟಿರುವುದರಿಂದಲೋ ಏನೋ ಕೋವಿಡ್‌ ಸಂಕಷ್ಟದ ಈ ಸಂದರ್ಭದಲ್ಲೂವೈನ್‌ ಶಾಪ್‌ಗಳು ಭರ್ಜರಿ ಬ್ಯುಸಿನೆಸ್‌ ಮಾಡುತ್ತಿವೆ.

ಹನುಮಾನ್‌ಗಢ ಜಿಲ್ಲೆಯ ನೋಹರ್‌ನ ವೈನ್‌ ಶಾಪ್‌ ಕಳೆದ ವರ್ಷ ಲಾಟರಿ ಮೂಲಕ 65 ಲಕ್ಷ ರೂ.ಗಳಿಗೆ ಮಾರಾಟಗೊಂಡಿತ್ತು. ಈ ಬಾರಿ ಇದರ ಮೂಲ ಬೆಲೆ 72.70 ಲಕ್ಷ ರೂ.ಗಳಿಗೆ ನಿಗದಿಯಾಗಿತ್ತು. ಈ ಶಾಪ್‌ ಇದ್ದಕ್ಕಿದ್ದಂತೆ ಇ-ಹರಾಜಿಗೆ ಬಂದಾಗ ಇದನ್ನು ವಶಕ್ಕೆ ಪಡೆಯಲು ವಿಪರೀತ ಪೈಪೋಟಿ ನಡೆಯಿತು.

ಹರಾಜು ಪ್ರಕ್ರಿಯೆ ಮೂರು ದಿನಗಳ ಕಾಲ ನಡೆಯಿತು. ಅಂತಿಮವಾಗಿ ನೋಹರ್‌ನ ಕಿರಣ್‌ ಕನ್ವರ್‌ ಎಂಬುವವರು ಸೋಮವಾರ 510 ಕೋಟಿ ರೂ. ತೆತ್ತು ಈ ವೈನ್‌ ಶಾಪ್‌ನ ಬಿಡ್‌ ಗೆದ್ದುಕೊಂಡರು.

''ಮೂರು ದಿನಗಳ ಒಳಗೆ ಹರಾಜು ಮೊತ್ತದ ಎರಡು ಪರ್ಸೆಂಟ್‌ ಹಣವನ್ನು ಠೇವಣಿ ಇರಿಸುವಂತೆ ಸೂಚಿಸಲಾಗಿದೆ. ಆಯಕಟ್ಟಿನ ಜಾಗದಲ್ಲಿರುವುದರಿಂದ ಈ ವೈನ್‌ ಶಾಪ್‌ಗೆ ಭಾರಿ ಬೇಡಿಕೆ ಇದೆ'' ಎಂದು ರಾಜ್ಯ ಅಬಕಾರಿ ಹೆಚ್ಚುವರಿ ಆಯುಕ್ತ ಸಿ.ಆರ್‌.ದೇವಸಿ ತಿಳಿಸಿದ್ದಾರೆ.