ಈ ಶುಕ್ರವಾರ ರಾತ್ರಿ ಹೋಟೆಲ್‌ ಬಂದ್‌?

ಮುಂಬಯಿ: ಹೋಟೆಲ್‌ ಊಟ, ತಿಂಡಿಯನ್ನು ನೆಚ್ಚಿಕೊಂಡಿರುವವರ ಗಮನಕ್ಕೆ... ಈ ತಿಂಗಳ ಕೊನೆ ದಿನ ನಗರದ ಹೋಟೆಲ್‌ಗಳು ಬಂದ್‌ ಆಗುವ ಸಾಧ್ಯತೆ ಇದೆ.

ಸರಕು ಮತ್ತು ಸೇವಾ ತೆರಿಗೆ (ಜಿಎಸ್‌ಟಿ) ಇದೇ ಜುಲೈ 1ರಿಂದ ಜಾರಿಯಾಗಲಿದ್ದು, ಈ ಹಿನ್ನೆಲೆಯಲ್ಲಿ ಜೂನ್‌ 30ರ ಮಧ್ಯರಾತ್ರಿಯಿಂದಲೇ ಹೋಟೆಲುಗಳ ದರ ಬದಲಾವಣೆ ಮಾಡಬೇಕಿದೆ. ಅದಕ್ಕಾಗಿ ರಾತ್ರಿ 11.30ರ ಬಳಿಕ ಹೋಟೆಲ್‌ಗಳು ಮುಚ್ಚುವ ಸಾಧ್ಯತೆಯಿದೆ ಎನ್ನಲಾಗಿದೆ.

ಹೊರಗಿನ ಆಹಾರವನ್ನು ಅವಲಂಬಿಸಿರುವ ರಾಜ್ಯಗಳಲ್ಲಿ ಮುಂಬಯಿ ಮೊದಲನೇ ಸ್ಥಾನ ಪಡೆದುಕೊಂಡಿದೆ. ಹೀಗಾಗಿ ಮುಂಬಯಿ ನಗರದ ಜನರಿಗೆ ಜಿಎಸ್‌ಟಿ ಬಿಸಿ ಹೆಚ್ಚು ತಟ್ಟಲಿದೆ.

'ಜಿಎಸ್‌ಟಿ ಜಾರಿ ಹಿನ್ನೆಲೆಯಲ್ಲಿ ನಾವು ಕೆಲ ತಾಂತ್ರಿಕ ಬದಲಾಣೆ ಮಾಡಿಕೊಳ್ಳಬೇಕಿದೆ. ಕಂಪ್ಯೂಟರ್‌ಗಳಲ್ಲಿ ಹೊಸ ದರ ಪರಿಷ್ಕರಣೆ ಆಗಬೇಕಿದೆ. ಹೀಗಾಗಿ ಶುಕ್ರವಾರದಿಂದ ಶನಿವಾರ ಅಪರಾಹ್ನದವರೆಗೂ ಹೋಟೆಲ್‌ ತೆರೆಯುತ್ತಿಲ್ಲ,' ಎಂದು ಚೆಂಬರ್‌ನ ಓಶೆನಿಕ್‌ ರೆಸ್ಟೋರೆಂಟ್‌ ಮ್ಯಾನೇಜರ್‌ ತಿಳಿಸಿದ್ದಾರೆ.