ಒಂದೇ ಮೀನು ಹಿಡಿದು 3 ಲಕ್ಷ ರೂ. ಸಂಪಾದಿಸಿದ ಲಕ್ಕಿ ಅಜ್ಜಿ!

ಕೋಲ್ಕೊತಾ: ದಕ್ಷಿಣ 24 ಪರಗಣ ಜಿಲ್ಲೆಯ ಸುಂದರ್‌ಬನ್‌ ಪ್ರದೇಶದಲ್ಲಿನ ಸಾಗರ ದ್ವೀಪದ ನದಿಯೊಂದರ ದಡದಲ್ಲಿ ವೃದ್ಧೆಯೊಬ್ಬರಿಗೆ 52 ಕೆ.ಜಿ ತೂಕದ ಮೀನು ಸಿಕ್ಕಿದ್ದು, ಅದೃಷ್ಟ ಖುಲಾಯಿಸಿದೆ.

ಸ್ವಲ್ಪ ಹತ್ತಿರ ತೆರಳಿ ಗಮನಿಸುತ್ತಿದ್ದಂತೆ ಅದು ಸಾಮಾನ್ಯ ಮೀನಲ್ಲ, ಬೃಹತ್‌ ಗಾತ್ರ ಭೋಲಾ ಮೀನು ಎಂದು ಅಜ್ಜಿಗೆ ತಿಳಿಯಿತು. ಕೂಡಲೇ ನದಿಗೆ ಇಳಿದು ಹರಸಾಹಸಪಟ್ಟು ದಡಕ್ಕೆ ಎಳೆದು ತಂದು ಅಜ್ಜಿ ಅದನ್ನು ಮಾರುಕಟ್ಟೆಯಲ್ಲಿ ಮಾರಿ 3 ಲಕ್ಷ ರೂಪಾಯಿ ಒಡತಿಯಾಗಿದ್ದಾರೆ!

ಹೌದು, 52 ಕೆ.ಜಿ ತೂಕದ ಮೀನು ಪ್ರತಿ ಕೆ.ಜಿಗೆ 6200 ರೂ.ಗೆ ಮಾರಾಟವಾಗಿದೆ. ಇಂಥ ಅದೃಷ್ಟ ಖುಲಾಯಿಸಿ ಒಂದೇ ದಿನದಲ್ಲಿ ಲಕ್ಷಾಧಿಪತಿಯಾದ ಅಜ್ಜಿಯ ಹೆಸರು ಪುಷ್ಪಾ ಕರ್‌.

80 ಸಾವಿರ ಕೆ.ಜಿಗೆ ಮಾರಾಟವಾಗುತ್ತಿತ್ತು!

ಅಜ್ಜಿಗೆ ಬೃಹತ್‌ ಮೀನು ಕೈಗೆ ಸಿಗುವಷ್ಟರಲ್ಲಿಅದು ಸತ್ತು ಬಹಳ ಸಮಯ ಕಳೆದಿತ್ತು. ಕೆಲವು ಭಾಗಗಳು ಅದಾಗಲೇ ಕೊಳೆಯಲು ಶುರುವಾಗಿದ್ದವು. ದೋಣಿಯೊಂದಕ್ಕೆ ಡಿಕ್ಕಿ ಹೊಡೆದು ಅದು ಸತ್ತಿರಬಹುದು ಎಂದು ಗ್ರಾಮಸ್ಥರು ತಿಳಿಸಿದ್ದಾರೆ.

ಒಂದು ವೇಳೆ ಮೀನು ತಾಜಾವಾಗಿದ್ದು ಮಾರುಕಟ್ಟೆಗೆ ಒಯ್ದಿದ್ದರೆ ಪ್ರತಿ ಕೆ.ಜಿಗೆ 80 ಸಾವಿರ ರೂ.ವರೆಗೆ ಮಾರಾಟ ಮಾಡಬಹುದಿತ್ತು. ಈ ಮೀನನ್ನು ವೈದ್ಯಕೀಯ ಔಷಧಗಳ ತಯಾರಿಕೆಯಲ್ಲಿಯೂ ಬಳಸಲಾಗುತ್ತದೆ. ಆಗ್ನೇಯ ಏಷ್ಯಾ ದೇಶಗಳಲ್ಲಿ ಇದಕ್ಕೆ ಭಾರಿ ಬೇಡಿಕೆ ಇದೆ ಎಂದು ಸ್ಥಳೀಯ ಹಿರಿಯಯೊಬ್ಬರು ಹೇಳಿದ್ದಾರೆ.