'ಪಪ್ಪು' ಪದ ಬಳಸಬೇಡಿ: ಚುನಾವಣಾ ಆಯೋಗ

ಅಹ್ಮದಾಬಾದ್‌: ಗುಜರಾತ್‌ನಲ್ಲಿ ಚುನಾವಣಾ ಕಾವು ಏರುತ್ತಲೇ ಇದ್ದು, ಇದೀಗ ರಾಹುಲ್‌ ಗಾಂಧಿಯವರಿಗೆ ವಿರೋಧಿಗಳಿಟ್ಟ 'ಪಪ್ಪು' ಪದವನ್ನು ಚುನಾವಣಾ ಜಾಹಿರಾತುಗಳಲ್ಲಿ ಬಳಸದಂತೆ ಗುಜರಾತ್‌ ಚುನಾವಣಾ ಆಯೋಗ ಬಿಜೆಪಿಗೆ ಆದೇಶಿಸಿದೆ.

ಸಾಮಾಜಿಕ ಜಾಲತಾಣದಲ್ಲಿ 'ಪಪ್ಪು' ಎಂಬ ಪದವನ್ನು ಕಾಂಗ್ರೆಸ್‌ ಉಪಾಧ್ಯಕ್ಷ ರಾಹುಲ್‌ ಗಾಂಧಿಗೆ ಗೇಲಿ ಮಾಡಲು ಬಳಕೆಯಾಗುತ್ತಿತ್ತು. ಇದರ ಬೆನ್ನಲ್ಲಿ ರಾಹುಲ್‌ರನ್ನು 'ಪಪ್ಪು' ಎಂದು ಉಲ್ಲೇಖಿಸಿದ ಜಾಹೀರಾತೊಂದನ್ನು ಬಿಜೆಪಿಯು ಬಿಡುಗಡೆ ಮಾಡಲು ಆಯೋಗದ ಬಳಿ ಕೇಳಿಕೊಂಡಿತ್ತು. ಈ ಜಾಹೀರಾತಿನಲ್ಲಿ ಪಪ್ಪು ಪದ ಬಳಕೆಯಾದ ಹಿನ್ನೆಲೆಯಲ್ಲಿ ಜಾಹೀರಾತನ್ನು ಸ್ಥಗಿತಗೊಳಿಸಲು ಆಯೋಗ ಆದೇಶಿಸಿದೆ.

ಚುನಾವಣೆಗೆ ಸಂಬಂಧಿಸಿದಂತೆ ಯಾವುದೇ ಜಾಹೀರಾತು ಬಿಡುಗಡೆಗೂ ಮುನ್ನ ಆಯೋಗಕ್ಕೆ ಸಲ್ಲಿಸಿ ಅವರ ಒಪ್ಪಿಗೆ ಪಡೆಯ ಬೇಕು. ಆದರೆ ಬಿಜೆಪಿ ಸಲ್ಲಿದ ಜಾಹೀರಾತಿನಲ್ಲಿ ಪಪ್ಪು ಪದ ಬಳಕೆ ಮಾಡಿದ್ದು, ಈ ಪದ ಅವಹೇಳನಕಾರಿ ಎಂದು ಆಯೋಗ ಆರೋಪಿಸಿ ಈ ಪದಕ್ಕೆ ಕತ್ತರಿ ಪ್ರಯೋಗ ಮಾಡುವಂತೆ ಆದೇಶಿಸಿರುವುದಾಗಿ ಬಿಜೆಪಿ ಮೂಲಗಳು ಹೇಳಿವೆ.

ಪಕ್ಷವು ಈ ಪದವನ್ನು ತೆಗದು ಹಾಕಲು ನಿರ್ಧರಿಸಿದ್ದು ಇದರ ಬದಲು ಬೇರೆಯದೇ ಹೊಸ ಸ್ಕ್ರಿಪ್ಟ್‌ ಬಳಸುವುದಾಗಿ ಹಿರಿಯ ಬಿಜೆಪಿ ನಾಯಕರೊಬ್ಬರು ತಿಳಿಸಿದ್ದಾರೆ.