EVM ಅಲ್ಲ MVM: ಮತಯಂತ್ರವನ್ನು ಮೋದಿ ವೋಟಿಂಗ್ ಮಷಿನ್ ಎಂದ ರಾಹುಲ್!

ಅರಾರಿಯಾ: ಎಲೆಕ್ಟ್ರಾನಿಕ್ ವೋಟಿಂಗ್ ಮಷಿನ್(ಇವಿಎಂ) ಮೇಲೆ ಮತ್ತೆ ತಮ್ಮ ವಾಗ್ದಾಳಿಯನ್ನು ಮುಂದುವರೆಸಿರುವ ಕಾಂಗ್ರೆಸ್ ನಾಯಕ ರಾಹುಲ್ ಗಾಂಧಿ, ಇವಿಎಂ ಅಸಲಿಗೆ ಎಂವಿಎಂ(ಮೋದಿ ವೋಟಿಂಗ್ ಮಷಿನ್) ಆಗಿವೆ ಎಂದು ವ್ಯಂಗ್ಯವಾಡಿದ್ದಾರೆ.

ಬಿಹಾರ ವಿಧಾನಸಭಾ ಚುನಾವಣೆ ಹಿನ್ನೆಲೆಯಲ್ಲಿ ಅರಾರಿಯಾದಲ್ಲಿ ಸಾರ್ವಜನಿಕ ಸಭೆ ಉದ್ದೇಶಿಸಿ ಮಾತನಾಡಿದ ರಾಹುಲ್ ಗಾಂಧಿ, ಇವಿಎಂ, ಎಂವಿಎಂಗಳಾಗಿ ಬದಲಾಗಿವೆ ಎಂದು ಕಿಡಿಕಾರಿದರು.

ಮೋದಿ ವೋಟಿಂಗ್ ಮಷಿನ್ ಬಳಸಿ ಬಿಜೆಪಿ ಎಲ್ಲಾ ಕಡೆ ಅಧಿಕಾರ ಪಡೆಯುತ್ತಿದೆ ಎಂದು ಗಂಭೀರ ಆರೋಪ ಮಾಡಿದ ರಾಹುಲ್ ಗಾಂಧಿ, ಈ ಕುತಂತ್ರಗಳನ್ನು ಸೋಲಿಸಿ ಪ್ರಜಾಪ್ರಭುತ್ವವನ್ನು ರಕ್ಷಿಸಬೇಕಿದೆ ಎಂದು ಅಭಿಪ್ರಾಯಪಟ್ಟರು.

ಬಿಹಾರ ಚುನಾವಣೆ: ಮಹಾಮೈತ್ರಿ ವಿರುದ್ಧ ಮೋದಿ ವಾಗ್ದಾಳಿ; ಡಬಲ್‌ ಇಂಜಿನ್ ಲೂಟಿಕೋರ ಎಂದ ರಾಹುಲ್

ಈ ಬಾರಿ ಬಿಹಾರದ ಜನತೆ ರೋಸಿ ಹೋಗಿದ್ದಾರೆ. ರಾಜ್ಯದ ಯುವ ಜನತೆಯಲ್ಲಿ ಆಕ್ರೋಶ ಮಡುಗಟ್ಟಿದೆ. ಹೀಗಾಗಿ ಮೋದಿ ವೋಟಿಂಗ್ ಮಷಿನ್‌ ಹೊರತಾಗಿಯೂ ಎನ್‌ಡಿಎ ಸೋಲಲಿದೆ ಎಂದು ರಾಹುಲ್ ಹರಿಹಾಯ್ದರು.


ರಾಜ್ಯದಲ್ಲಿ ಇವಿಎಂ ಆದರೂ ಇರಲಿ, ಎಂವಿಎಂ ಆದರೂ ಇರಲಿ. ಮತದಾರ ಮಾತ್ರ ಮಹಾಘಟಬಂಧನ್ ಮೈತ್ರಿಕೂಟವನ್ನು ಅಧಿಕಾರಕ್ಕೆ ತರುವುದು ನಿಶ್ಚಿತ ಎಂದು ರಾಹುಲ್ ಈ ವೆಳೆ ಭರವಸೆ ವ್ಯಕ್ತಪಡಿಸಿದರು.

ಯುಪಿಯಲ್ಲಿ ಡಬಲ್ ಯುವರಾಜರಿಗೆ ಆದ ಗತಿಯೇ ಬಿಹಾರದಲ್ಲೂ ಆಗಲಿದೆ: ಮೋದಿ!

ಮಹಾಘಟಬಂಧನ್ ಮೈತ್ರಿಕೂಟ ಬಿಹಾರದ ನೈಜ ಸಮಸ್ಯೆಗಳನ್ನು ಮುಂದಿಟ್ಟುಕೊಂಡು ಹೋರಾಡುತ್ತಿದೆ. ಆದರೆ ಆಡಳಿತಾರೂಢ ಎನ್‌ಡಿಎ ಜನರ ಗಮನವನ್ನು ಬೇರೆಡೆ ಸೆಳಯುವ ಹುನ್ನಾರ ನಡೆಸಿದೆ ಎಂದು ರಾಹುಲ್ ಕಿಡಿಕಾರಿದರು.