ಜಡ್ಜ್‌ಗಳ ಬಡ್ತಿಗೆ ಆದಾಯ ನಿರ್ಬಂಧ ಸಡಿಲಿಸಲು ಕೊಲಿಜಿಯಂ ನಿರ್ಧಾರ

ಹೊಸದಿಲ್ಲಿ: ಹೈಕೋರ್ಟ್‌ ನ್ಯಾಯಮೂರ್ತಿಗಳ ಸ್ಥಾನಕ್ಕೆ ಪದೋನ್ನತಿ ನೀಡುವ ವಿಷಯದಲ್ಲಿ ಪರಿಶಿಷ್ಟ ಜಾತಿ, ಪರಿಶಿಷ್ಟ ಪಂಗಡ ಮತ್ತು ಹಿಂದುಳಿದ ವರ್ಗಗಳ ಅಭ್ಯರ್ಥಿಗಳ ಕನಿಷ್ಠ ಆದಾಯ ಮಿತಿ ವಿಷಯದಲ್ಲಿ ಇದ್ದ ನಿರ್ಬಂಧದಲ್ಲಿ ಸಡಿಲಿಕೆ ಮಾಡಲಾಗಿದೆ.

ಸದ್ಯ ಹೈಕೋರ್ಟ್‌ ನ್ಯಾಯಮೂರ್ತಿ ಸ್ಥಾನಕ್ಕೆ ಪದೋನ್ನತಿ ಬಯಸುವ ಅಭ್ಯರ್ಥಿಗಳ ಕನಿಷ್ಠ ಆದಾಯ ಮಿತಿ 7 ಲಕ್ಷ ರೂ. ಇರಬೇಕು ಎನ್ನುವ ನಿರ್ಬಂಧ ಇದೆ. ಸರಕಾರಿ ಅಭಿಯೋಜಕರಾಗಿ ಸೇವೆ ಸಲ್ಲಿಸುವ ಎಸ್ಸಿ, ಎಸ್ಟಿ ಮತ್ತು ಒಬಿಸಿ ಸಮುದಾಯಗಳ ವಕೀಲರನ್ನು ಹೈಕೋರ್ಟ್‌ ನ್ಯಾಯಮೂರ್ತಿ ಸ್ಥಾನಕ್ಕೆ ಪರಿಗಣಿಸುವಾಗ ಈ ನಿರ್ಬಂಧದಿಂದ ಸ್ವಲ್ಪಮಟ್ಟಿನ ವಿನಾಯಿತಿ ನೀಡಲು ಮುಖ್ಯ ನ್ಯಾಯಮೂರ್ತಿ ರಂಜನ್‌ ಗೊಗೋಯ್‌, ನ್ಯಾಯಮೂರ್ತಿಗಳಾದ ಎ.ಕೆ.ಸಿಕ್ರಿ ಮತ್ತು ಎಸ್‌.ಎ.ಬೋಬ್ಡೆ ಒಳಗೊಂಡ ಕೊಲಿಜಿಯಂ ಸಭೆ ನಿರ್ಧರಿಸಿದೆ.

ಇದೇ ವೇಳೆ, ಹತ್ತು ವಕೀಲರಿಗೆ ನ್ಯಾಯಮೂರ್ತಿ ಸ್ಥಾನಕ್ಕೆ ಪದೋನ್ನತಿ ನೀಡಿರುವ ಕೊಲಿಜಿಯಂ, ಅವರಲ್ಲಿ ಹಲವರ ಕನಿಷ್ಠ ಆದಾಯ 7 ಲಕ್ಷ ರೂ.ಗಳಿಗಿಂತಲೂ ಕಡಿಮೆ ಇರುವುದಾಗಿ ತಿಳಿಸಿದೆ.