ಗುಜರಾತ್‌ ಕಾಂಗ್ರೆಸ್‌ಅನ್ನು 25 ಕೋಟಿಗೆ ಖರೀದಿಸಬಹುದು: ಶಾಕಿಂಗ್‌ ಹೇಳಿಕೆ ನೀಡಿದ ಸಿಎಂ ವಿಜಯ ರೂಪಾನಿ!

ಅಹಮದಾಬಾದ್‌: ''ಇಡೀ ಗುಜರಾತ್‌ ಕಾಂಗ್ರೆಸ್‌ ಘಟಕವೇ 25 ಕೋಟಿ ರೂಪಾಯಿಗಳಿಗೆ ಬಿಕರಿಯಾಗುತ್ತದೆ,'' ಎಂದು ಗುಜರಾತ್‌ ಮುಖ್ಯಮಂತ್ರಿ ವಿಜಯ್‌ ರೂಪಾನಿ ವ್ಯಂಗ್ಯವಾಡಿದ್ದಾರೆ. ತಮ್ಮ ಪಕ್ಷದ ಶಾಸಕರಾಗಿದ್ದ ಅಕ್ಷಯ್‌ ಪಟೇಲ್‌ ಅವರನ್ನು ಬಿಜೆಪಿ 25 ಕೋಟಿ ರೂ.ಗೆ ಖರೀದಿಸಿದೆ ಎಂಬ ಕಾಂಗ್ರೆಸ್‌ ನಾಯಕ ರಾಹುಲ್‌ ಗಾಂಧಿ ಆರೋಪಕ್ಕೆ ಪ್ರತಿಕ್ರಿಯಿಸಿದ ಮುಖ್ಯಮಂತ್ರಿ, ''ಕಾಂಗ್ರೆಸ್‌ಗೆ ತನ್ನ ಶಾಸಕರ ಮೇಲೆ ನಂಬಿಕೆ ಇಲ್ಲ.

ಶಾಸಕರನ್ನು ಗೌರವದಿಂದ ನಡೆಸಿಕೊಳ್ಳುವದಿಲ್ಲ. ಶಾಸಕರು ಪಕ್ಷ ತೊರೆದ ನಂತರ ಇಂತಹ ಆರೋಪ ಮಾಡುತ್ತಾರೆ,'' ಎಂದರು. ''ಕಾಂಗ್ರೆಸ್‌ಗೆ ಈಗ ನೀತಿ, ಸಿದ್ಧಾಂತ ಮುಖ್ಯವಲ್ಲ. ಕಾಂಗ್ರೆಸ್‌ನಲ್ಲಿ ಮಹಾತ್ಮ ಗಾಂಧಿ ಅವರ ತತ್ವಗಳು ಮರೆಯಾಗಿವೆ. ಮಹಾತ್ಮ ಗಾಂಧಿ ಕನಸು ಕಂಡಿದ್ದ ಕಾಂಗ್ರೆಸ್‌ ಈಗ ಇಲ್ಲ.

ಈಗ ಇರುವುದು ರಾಹುಲ್‌ ಗಾಂಧಿ ಅವರ ಕಾಂಗ್ರೆಸ್‌. ವಾಸ್ತವ ಏನೆಂದರೆ ಇಡೀ ಗುಜರಾತ್‌ ಕಾಂಗ್ರೆಸ್‌ ಘಟಕವನ್ನೇ 25 ಕೋಟಿ ರೂಪಾಯಿಗೆ ಖರೀದಿಸಬಹುದು,'' ಎಂದು ಹೇಳಿದರು. ಗುಜರಾತ್‌ ವಿಧಾನಸಭೆಯ 8 ವಿಧಾನಸಭೆ ಕ್ಷೇತ್ರಗಳಿಗೆ ನ.3ರಂದು ಉಪ ಚುನಾವಣೆ ನಡೆಯಲಿದೆ. ಈ ಕ್ಷೇತ್ರಗಳು ಕಾಂಗ್ರೆಸ್‌ ಶಾಸಕರ ರಾಜೀನಾಮೆಯಿಂದ ತೆರವಾಗಿವೆ.
ಎಲ್‌ಇಡಿ ಬೇಕೋ, ಕಂದೀಲು ಬೇಕೋ ಎಂಬುದನ್ನು ಬಿಹಾರದ ಜನತೆ ನಿರ್ಧರಿಸಲಿದ್ದಾರೆ: ಜೆಪಿ ನಡ್ಡಾ!