ಭಾರತದ ಈ ಹೋಟೆಲ್‌ನಲ್ಲಿ ಪಾಕ್‌ ಪ್ರಜೆಗಳಿಗೆ ಪ್ರವೇಶ ನಿಷಿದ್ಧ!

ಪ್ರಯಾಗ್‌ರಾಜ್‌: ಜಮ್ಮು ಕಾಶ್ಮೀರದ ಪುಲ್ವಾಮಾ ದಾಳಿ ಬಳಿಕ ಹಲವು ಭಾರತೀಯರಲ್ಲಿ ಪಾಕಿಸ್ತಾನ ವಿರುದ್ಧ ದ್ವೇಷ ಹೆಚ್ಚಾಗಿದೆ. ಪಾಕಿಸ್ತಾನ ಸರಕಾರ ಹಾಗೂ ಪಾಕ್‌ ಜನತೆ ವಿರುದ್ಧವೂ ಅವರು ಕಿಡಿ ಕಾರುತ್ತಿದ್ದಾರೆ. ಇದೇ ರೀತಿ ಹೋಟೆಲ್‌ ಒಂದರಲ್ಲಿ ಪಾಕಿಸ್ತಾನಿ ಪ್ರಜೆಗಳಿಗೆ ಪ್ರವೇಶ ನಿಷಿದ್ಧ ಎಂದು ಹೋಟೆಲ್‌ ಹೊರಗೆ ನೋಟಿಸ್‌ ಅಂಟಿಸಲಾಗಿದೆ.

ಉತ್ತರ ಪ್ರದೇಶದ ಪ್ರಯಾಗ್‌ರಾಜ್‌ನಲ್ಲಿರುವ ಹೋಟೆಲ್‌ ಮಿಲನ್‌ ಪ್ಯಾಲೇಸ್‌ನಲ್ಲಿ 'ಪಾಕಿಸ್ತಾನಿ ಪ್ರಜೆಗಳಿಗೆ ಪ್ರವೇಶ ನಿಷಿದ್ಧ' ಎಂಬ ನೋಟಿಸ್‌ ಅನ್ನು ಅಂಟಿಸಲಾಗಿದೆ. ಈ ಸಂಬಂಧ ಮಾಹಿತಿ ನೀಡಿರುವ ಹೋಟೆಲ್‌ ಮ್ಯಾನೇಜರ್, ''ಪುಲ್ವಾಮಾ ದಾಳಿ ಬಳಿಕ ಈ ನೋಟಿಸ್‌ ಹಾಕಲಾಗಿದೆ. ಇಲ್ಲಿ ಯಾವುದೇ ಪಾಕ್‌ ಪ್ರಜೆಗಳು ಇದುವರೆಗೆ ಬಂದಿಲ್ಲ. ಆದರೆ, ಒಂದು ವೇಳೆ ಯಾರಾದರೂ ಬಂದರೂ ಅವರಿಗೆ ನಾವು ರೂಮ್‌ಗಳನ್ನು ಕೊಡುವುದಿಲ್ಲ. ನಮಗೆ ಸಾಧ್ಯವಾಗುವ ರೀತಿಯಲ್ಲಿ ನಾವು ಪ್ರತಿಭಟನೆ ಮಾಡುತ್ತೇವೆ'' ಎಂದು ಸುದ್ದಿಸಂಸ್ಥೆ ಎಎನ್‌ಐಗೆ ತಿಳಿಸಿದ್ದಾರೆ.


ಫೆಬ್ರವರಿ 14,2019ರಂದು ಜಮ್ಮು ಕಾಶ್ಮೀರದ ಪುಲ್ವಾಮಾದಲ್ಲಿ ಸಿಆರ್‌ಪಿಎಫ್‌ ಯೋಧರು ಪ್ರಯಾಣಿಸುತ್ತಿದ್ದ ವಾಹನದ ಬಳಿ ಉಗ್ರ ಬಾಂಬ್‌ ಸ್ಫೋಟಿಸಿಕೊಂಡಿದ್ದ. ದಾಳಿಯಲ್ಲಿ 40 ಸಿಆರ್‌ಪಿಎಫ್‌ ಯೋಧರು ಹುತಾತ್ಮರಾಗಿದ್ದರು.