ಮಾಜಿ ರಾಷ್ಟ್ರಪತಿ ಜೈಲ್‌ ಸಿಂಗ್‌ ಅಳಿಯ ಬಿಜೆಪಿ ಸೇರ್ಪಡೆ

ಹೊಸದಿಲ್ಲಿ: ಮಾಜಿ ರಾಷ್ಟ್ರಪತಿ ಜೈಲ್‌ ಸಿಂಗ್‌ ಅವರ ಅಳಿಯ ಸರ್ವಂತ್‌ ಸಿಂಗ್‌ ಚನ್ನಿ ಅವರು ಗುರುವಾರ ಭಾರತೀಯ ಜನತಾ ಪಾರ್ಟಿ (ಬಿಜೆಪಿ) ಸೇರ್ಪಡೆ ಗೊಂಡಿದ್ದಾರೆ. ಈ ವೇಳೆ ಕೇಂದ್ರ ಸಚಿವ ನಿತಿನ್‌ ಗಡ್ಕರಿ ಸೇರಿದಂತೆ ಕೇಸರಿ ಪಕ್ಷದ ಪ್ರಮುಖ ನಾಯಕರು ಉಪಸ್ಥಿತರಿದ್ದರು.

ಸರ್ವಾಂತ್‌ ಸಿಂಗ್‌ ಚನ್ನಿ ಅವರು ಮಾಜಿ ಪಂಜಾಬ್‌ ಕ್ಯಾಡರ್‌ನಲ್ಲಿ ಅಧಿಕಾರಿಯಾಗಿದ್ದರು. ಸರ್ವಾಂತ್‌ ಸಿಂಗ್‌ ಅವರು ಸೆಪ್ಟಂಬರ್‌ 2014 ರಿಂದ ಮೇ 3, 2019 ರ ವರೆಗೆ ಪಂಜಾಬ್‌ನ ಮಾಹಿತಿ ಆಯೋಗದ ಮುಖ್ಯಸ್ಥರಾಗಿ ಕಾರ್ಯ ನಿರ್ವಹಿಸುತ್ತಿದ್ದರು. ಪಂಜಾಬ್‌ನ ಗೃಹ ಇಲಾಖೆಯಲ್ಲಿ ಕಾರ್ಯದರ್ಶಿಯಾಗಿ ಸರ್ವಾಂತ್‌ ಸಿಂಗ್‌ ಅವರು ಸೇವೆ ಸಲ್ಲಿಸಿದ್ದಾರೆ.

ಗ್ಯಾನಿ ಜೈಲ್‌ ಸಿಂಗ್‌ ಅವರು 1982 ರಿಂದ 1987 ರ ಅವಧಿಯಲ್ಲಿ ಭಾರತದ ರಾಷ್ಟ್ರಪತಿಗಳಾಗಿ ಸೇವೆ ಸಲ್ಲಿಸಿದ್ದಾರೆ. ಮೇ 05, 1916 ರಲ್ಲಿ ಜನಿಸಿದ್ದ ಜೈಲ್‌ ಸಿಂಗ್‌ ಡಿಸೆಂಬರ್‌ 29, 1994ರಲ್ಲಿ ನಿಧನರಾಗಿದ್ದಾರೆ.