ಕಠುವಾ ಹೋರಾಟಗಾರನ ದೌರ್ಜನ್ಯ: ಪತ್ನಿ ದೂರು

ಶ್ರೀನಗರ: ದೇಶಾದ್ಯಂತ ಸಂಚಲನ ಮೂಡಿಸಿದ್ದ ಕಠುವಾ ಅತ್ಯಾಚಾರ ಪ್ರಕರಣದಲ್ಲಿ ನ್ಯಾಯಕ್ಕಾಗಿ ನಡೆದ ಹೋರಾಟದ ಮುಂಚೂಣಿ ನಾಯಕತ್ವದಲ್ಲಿ ವಕೀಲ, ಸಾಮಾಜಿಕ ಕಾರ್ಯಕರ್ತ ತಾಲಿಬ್‌ ಹುಸೇನ್‌ ವಿರುದ್ಧ ಕೌಟುಂಬಿಕ ದೌರ್ಜನ್ಯ ಆರೋಪದಡಿ ಎಫ್‌ಐಆರ್‌ ದಾಖಲಿಸಲಾಗಿದೆ.

ತಾಲಿಬ್‌ ವಿರುದ್ಧ ಪತ್ನಿ ನಸ್ರತ್‌ ಬೇಗಮ್‌ (30) ನೇರವಾಗಿ ನ್ಯಾಯಾಲಯಕ್ಕೆ ದೂರು ನೀಡಿದ್ದರು. ಜ್ಯುಡಿಷಿಯಲ್‌ ಮ್ಯಾಜಿಸ್ಪ್ರೇಟ್‌ ಶಬನಮ್‌ ಶೇಕ್‌ ಅವರು ಎಫ್‌ಐಆರ್‌ ದಾಖಲಿಸಿಕೊಳ್ಳುವಂತೆ ಪೊಲೀಸರಿಗೆ ನಿರ್ದೇಶನ ನೀಡಿದ್ದರು. ನಸ್ರತ್‌, ಅವರ ತಂದೆ ತಹಿರ್‌ ಮತ್ತು ಸುಮಾರು 12 ನೆರೆಹೊರೆಯವರು ಸೇರಿ ಸಲ್ಲಿಸಿದ ಲಿಖಿತ ದೂರು ಹಾಗೂ ಕೋರ್ಟ್‌ ಆದೇಶವನ್ನು ಆಧರಿಸಿ, ಪ್ರಾಥಮಿಕ ತನಿಖೆ ನಡೆಸಿದ ಪೊಲೀಸರು, ಬಳಿಕ ಎಫ್‌ಐಆರ್‌ ದಾಖಲಿಸಿಕೊಂಡಿದ್ದಾರೆ. ರಣಬಿರ್‌ ಪೀನಲ್‌ ಕೋಡ್‌ (ಆರ್‌ಪಿಸಿ) ಸೆಕ್ಷನ್‌ 164 ಅಡಿಯಲ್ಲಿ, ದೂರುದಾರರ ಲಿಖಿತ ಹೇಳಿಕೆಯನ್ನು ದಾಖಲಿಸಿಕೊಂಡು, ನಂತರ ತಾಲಿಬ್‌ ವಿರುದ್ಧ ಕ್ರಮ ಕೈಗೊಳ್ಳಲಾಗುವುದು ಎಂದು ಪೊಲೀಸರು ತಿಳಿಸಿದ್ದಾರೆ.

ಕೌಟುಂಬಿಕ ದೌರ್ಜನ್ಯ, ವರದಕ್ಷಿಣೆಗಾಗಿ ಒತ್ತಾಯ, ವಿಚ್ಛೇದನ ಬೆದರಿಕೆ ಮತ್ತು ಕೊಲೆ ಆರೋಪವನ್ನು ತಾಲಿಬ್‌ ವಿರುದ್ಧ ಹೊರಿಸಲಾಗಿದೆ. ತಾಲಿಬ್‌ ಅವರ ಸಹೋದರನ ವಿರುದ್ಧವೂ ಈ ಸಂಬಂಧ ಪ್ರಕರಣ ದಾಖಲಿಸಲಾಗಿದೆ.