ಮತದಾನದ ಹಿಂದಿನ 2 ದಿನ ಎಫ್‌ಬಿ ಜಾಹೀರಾತಿಗೂ ಬ್ರೇಕ್‌

ಹೊಸದಿಲ್ಲಿ: ಮತದಾನಕ್ಕೆ ಮೊದಲಿನ 2 ದಿನ ಮಾಧ್ಯಮಗಳಲ್ಲಿ ರಾಜಕೀಯ ಜಾಹೀರಾತು ನಿರ್ಬಂಧಿಸಿರುವ ಚುನಾವಣೆ ಆಯೋಗ ಫೇಸ್‌ಬುಕ್‌ನಲ್ಲೂ ಇದೇ ಮಾದರಿ ಅನುಸರಿಸಲು ಚಿಂತಿಸುತ್ತಿದೆ. ಈ ಬಗ್ಗೆ ಪರಿಶೀಲಿಸುವಂತೆ ಫೇಸ್‌ಬುಕ್‌ಗೆ ಆಗಲೇ ಆಯೋಗ ಸೂಚನೆ ನೀಡಿದೆಯಾದರೂ ಸಾಮಾಜಿಕ ಜಾಲ ತಾಣ ಇನ್ನೂ ಪ್ರತಿಕ್ರಿಯಿಸಿಲ್ಲ.

ಜನಪ್ರಾತಿನಿಧ್ಯ ಕಾಯಿದೆಯ 126ನೇ ಸೆಕ್ಷನ್‌ನ ಅಧ್ಯಯನಕ್ಕಾಗಿ ಚುನಾವಣೆ ಆಯೋಗ ರಚಿಸಿದ ಸಮಿತಿ ಜೂನ್‌ 4ರಂದು ಫೇಸ್‌ ಬುಕ್‌ ಪ್ರತಿನಿಧಿಗಳ ಜತೆ ಸಭೆ ನಡೆಸಿತ್ತು. ಈ ವೇಳೆ, ಚುನಾವಣಾ ನಿಯಮಗಳನ್ನು ಉಲ್ಲಂಘನೆಯ ಮಾಹಿತಿ ನೀಡುವುದಕ್ಕಾಗಿ ಫೇಸ್‌ಬುಕ್‌ ಪುಟದಲ್ಲಿ ಒಂದು ಗುಂಡಿ ಇಲ್ಲವೇ ವಿಂಡೋ ಸೃಷ್ಟಿಸುವ ಬಗ್ಗೆ ಒಪ್ಪಲಾಗಿತ್ತು. ಅಗತ್ಯ ಬಿದ್ದರೆ ದೂರು ಸ್ವೀಕರಿಸುವ ವ್ಯವಸ್ಥೆಯನ್ನು ಇನ್ನಷ್ಟು ಬಲಪಡಿಸುವುದಕ್ಕೂ ಒಪ್ಪಿತ್ತು. ಪ್ರಸಕ್ತ ಈ ಕೆಲಸಕ್ಕೆ 7500 ಸಿಬ್ಬಂದಿಗಳಿದ್ದಾರೆ.

ಜನಪ್ರಾತಿನಿಧ್ಯ ಕಾಯಿದೆ ಪ್ರಕಾರ, ಮತದಾನಕ್ಕೆ ಮೊದಲಿನ 48 ಗಂಟೆ ಅವಧಿಯಲ್ಲಿ ಮಾಧ್ಯಮಗಳಲ್ಲಿ ಯಾವುದೇ ಜಾಹೀರಾತು ನೀಡಬಾರದು ಎಂಬ ನಿಯಮವಿದೆ. ಆದರೆ, ಸಾಮಾಜಿಕ ತಾಣಗಳಲ್ಲಿ ಇವುಗಳಿಗೆ ಸದ್ಯಕ್ಕೆ ಯಾವುದೇ ಕಡಿವಾಣವಿಲ್ಲ. ಜತೆಗೆ ಸುಳ್ಳು ಮಾಹಿತಿಯನ್ನು ಯಾವುದೇ ಖರ್ಚಿಲ್ಲದೆ ನೀಡಲು ಅನುಕೂಲವಾದ ವಾತಾವರಣವೂ ಇರುವುದು ಆಯೋಗದ ಆತಂಕಕ್ಕೆ ಕಾರಣ.