ಶೌಚ ಕಟ್ಟಿಸಿದ್ದರೂ ಬಯಲು ಶೌಚ ಮಾಡಿದ ಕುಟುಂಬಕ್ಕೆ 75 ಸಾವಿರ ರೂಪಾಯಿ ದಂಡ!

ಬೇತು (ಮಧ್ಯಪ್ರದೇಶ): ಬಯಲು ಶೌಚ ಮುಕ್ತ ಮಾಡುವ ಆಂದೋಲನ ಈಗ ದೇಶದೆಲ್ಲಡೆ ಯಶಸ್ವಿಯಾಗಿ ಸಾಗುತ್ತಿದೆ.

ಆದರೂ ಕೆಲವು ಗ್ರಾಮಗಳಲ್ಲಿ ಇನ್ನೂ ಬಯಲು ಶೌಚ ಪದ್ಧತಿಯೇ ಮುಂದುವರಿದಿದೆ. ಸ್ವಚ್ಛ ಭಾರತ ಅಭಿಯಾನ ಎಲ್ಲೆಡೆಯೂ ನಡೆಯುತ್ತಿದೆ. ಕೆಲವೆಡೆ ಇದನ್ನು ಕಡ್ಡಾಯವಾಗಿ ಜಾರಿ ಮಾಡಲು ನಿರ್ಧರಿಸಲಾಗಿದೆ.

ಈ ಕುರಿತು ಜಾಗೃತಿ ಮೂಡಿಸಲು ಹಲವಾರು ಉಪಕ್ರಮಗಳನ್ನು ಕೈಗೊಳ್ಳಲಾಗುತ್ತಿದೆ. ಆದರೂ ಈ ನಿಯಮಗಳನ್ನು ಉಲ್ಲಂಘನೆ ಮಾಡುವವರ ಸಂಖ್ಯೆ ಕಡಿಮೆಯಾಗಿಲ್ಲ.

ಮಧ್ಯಪ್ರದೇಶದಲ್ಲಿ ಇಂಥವರ ವಿರುದ್ಧ ಕಠಿಣ ಕ್ರಮ ಕೈಗೊಳ್ಳಲಾಗುತ್ತಿದೆ. ಬಯಲಿನಲ್ಲಿ ಶೌಚ ಮಾಡಿದ ಕುಟುಂಬವೊಂದಕ್ಕೆ ಬೇತು ಜಿಲ್ಲೆಯ ರಾಂಬಾಖೇಡಿ ಗ್ರಾಮ ಪಂಚಾಯಿತಿ ದಂಡ ವಿಧಿಸಿದೆ.

ಈ ಕುಟುಂಬಕ್ಕೆ ಪಂಚಾಯಿತಿ ವಿಧಿಸಿರುವ ದಂಡದ ಮೊತ್ತ 75,000 ರೂಪಾಯಿ. ಇದಲ್ಲದೇ ಬಯಲು ಶೌಚ ಪದ್ಧತಿ ಅನುಸರಿಸುತ್ತಿರುವ 43 ಕುಟುಂಬಕ್ಕೆ ನೋಟಿಸ್‌ ಜಾರಿ ಮಾಡಲಾಗಿದೆ.

ಕಳೆದ ಕೆಲವು ತಿಂಗಳಿನಿಂದ ಕುಟುಂಬದ ಸದಸ್ಯರಿಗೆ ಬಯಲು ಶೌಚ ಪದ್ಧತಿ ಬಿಡುವಂತೆ ಸೂಚನೆ ನೀಡಲಾಗುತ್ತಿತ್ತು. ಆದರೆ ಕುಟುಂಬದ ಸದಸ್ಯರು ಇದನ್ನು ಗಣನೆಗೆ ತೆಗೆದುಕೊಳ್ಳಲಿಲ್ಲ. ಇದರಿಂದ ರೋಸಿ ಹೋದ ರಾಂಬಾಖೇಡಿ ಗ್ರಾಮದ ಮಹಿಳಾ ಸರಪಂಚ್‌ ರಾಮರತಿ ಬಾಯಿ ಹತ್ತು ಸದಸ್ಯರ ಕುಟುಂಬಕ್ಕೆ 75 ಸಾವಿರ ರೂಪಾಯಿ ದಂಡ ವಿಧಿಸಿದ್ದಾರೆ.

ಮನೆಯಲ್ಲಿ ಶೌಚ ಕಟ್ಟಿಸಿದ್ದರೂ ಈ ಕುಟುಂಬದ ಸದಸ್ಯರನ್ನು ಅದನ್ನು ಬಳಕೆ ಮಾಡುತ್ತಿರಲಿಲ್ಲ. ಈ ಹಿನ್ನೆಲೆಯಲ್ಲಿ ದಂಡ ವಿಧಿಸಲಾಗಿದೆ ಎಂದು ಅವರು ತಿಳಿಸಿದ್ದಾರೆ.

Family fined Rs 75,000 for defecating in the open in Madhya Pradesh