ಫಸಲು ಮಾರಲಾಗದೆ ಮಾರುಕಟ್ಟೆಯಲ್ಲೇ ರೈತ ಸಾವು

ವಿದಿಶಾ: ಮಧ್ಯ ಪ್ರದೇಶದ ವಿದಿಶಾ ಜಿಲ್ಲೆಯ ಲಟೇರಿಯ ಕೃಷಿ ಉತ್ಪನ್ನ ಮಂಡಿಯಲ್ಲಿ ತಾನು ಬೆಳೆದ ಧಾನ್ಯವನ್ನು ಮಾರಲು ನಾಲ್ಕು ದಿನ ಸರತಿ ಸಾಲಿನಲ್ಲಿ ಕಾದಿದ್ದ ರೈತರೊಬ್ಬರು ಬಿಸಿಲ ತಾಪ ತಾಳಲಾರದೇ ಅಲ್ಲಿಯೇ ಕುಸಿದು ಮೃತಪಟ್ಟಿದ್ದಾರೆ.

ವಿದಿಶಾ ಜಿಲ್ಲೆಯ ಬಿಜುಖೇದಿ ಗ್ರಾಮದ ನಿವಾಸಿ, 65 ವರ್ಷದ ಮೂಲ್‌ಚಂದ್‌ ಮೈನಾ ಮೃತರು. ನಾಲ್ಕು ದಿನಗಳಿಂದ ಉರಿ ಬಿಸಿಲಿನ ನಡುವೆಯೇ ಸಾಲಿನಲ್ಲಿ ನಿಂತು ಕಾಯುತ್ತಿದ್ದರೂ ಇವರಿಗೆ ತಮ್ಮ ಬೆಳೆಯನ್ನು ತೂಕಕ್ಕೆ ಹಾಕಲು ಅವಕಾಶ ಸಿಕ್ಕಿರಲಿಲ್ಲ. ಸಮಯ ಮುಗಿಯುತ್ತಿದ್ದಂತೆ ಮಂಡಿಯ ಬಾಗಿಲು ಮುಚ್ಚಲಾಗುತ್ತಿತ್ತು. ಬಿರು ಬಿಸಿಲಿನಲ್ಲಿ ನಿಂತು ಕಾದು ಕಾದು ತೀವ್ರ ಅಸ್ವಸ್ಥಗೊಂಡು ಮೂಲ್‌ಚಂದ್‌ ಮೃತಪಟ್ಟಿದ್ದಾರೆ.

ರೈತನ ಸಾವಿನಿಂದ ರೊಚ್ಚಿಗೆದ್ದ ಕೃಷಿಕರು, ಮಂಡಿ ಅಧಿಕಾರಿಗಳ ವಿರುದ್ಧ ಆಕ್ರೋಶ ವ್ಯಕ್ತಪಡಿಸಿ, ಪ್ರತಿಭಟನೆ ನಡೆಸಿದ್ದಾರೆ. ಸ್ಥಳಕ್ಕೆ ಬಂದ ತಹಸೀಲ್ದಾರ್‌ ಅಶೋಕ್‌ ಮಂಜ್ಹಿ, ಮೃತರ ಕುಟುಂಬಕ್ಕೆ 4 ಲಕ್ಷ ರೂ. ಪರಿಹಾರ ಘೋಷಿಸಿದ್ದಾರೆ.