34 ವರ್ಷಗಳಿಂದ ರೋಜಾ ಮಾಡಿರುವ ಹಿಂದೂ ಮಹಿಳೆ

ಅಹ್ಮದಾಬಾದ್: ಹಿಂದೂ ಮಹಿಳೆ ಪುರಿಬೆನ್ ಲಿವಾ (85) ಅವರು ಸತತ 34 ವರ್ಷಗಳಿಂದ ರಂಜಾನ್ ಉಪವಾಸ ಕೈಗೊಳ್ಳುವ ಮೂಲಕ ಹಿಂದೂ-ಮುಸ್ಲಿಂ ಬಾಂಧವರಲ್ಲಿ ಸಾಮರಸ್ಯ ಸಾರುತ್ತಿದ್ದಾರೆ.

ಅಹ್ಮದಾಬಾದ್‌ನ ಜಮಾಲಪುರ್ ಪ್ರದೇಶದ ಬಾಲಾ ಪಿರ್ ಬಾವಾದಲ್ಲಿರುವ ಸಂತರ ಬಳಿ ಶಪಥ ಮಾಡಿದ ಬಳಿಕ ಪುರಿಬೆನ್ ಲಿವಾ ಪವಿತ್ರ ರಂಜಾನ್ ಮಾಸದಲ್ಲಿ ಉಪವಾಸ ಆರಂಭಿಸಿದ್ದರು. ಪತಿಯ ಮರಣದ ನಂತರ ತನ್ನ ಹೆಣ್ಣು ಮಕ್ಕಳ ಜತೆ ಜಮಾಲಪುರ್ ಪ್ರದೇಶದಿಂದ ತಾಜ್ಪುರ್ ಮೊಮಿನ್ವಾಡ್‌ಗೆ ಸ್ಥಳಾಂತರಗೊಂಡಿದ್ದರು. ಆದರೆ, ಪ್ರತಿ ವರ್ಷ ರಂಜಾನ್ ಉಪವಾಸ ಕೈಗೊಳ್ಳುವುದನ್ನು ಮಾತ್ರ ಮುಂದುವರೆಸಿಕೊಂಡು ಬಂದಿದ್ದಾರೆ.

'ಕಳೆದ ಎರಡು ವರ್ಷಗಳಿಂದ ನನ್ನ ಆರೋಗ್ಯ ಸರಿಯಾಗಿಲ್ಲ. ಕುಟುಂಬ ಸದಸ್ಯರು ಹಾಗೂ ವೈದ್ಯರು ಈ ರಂಜಾನ್ ಮಾಸದಲ್ಲಿ ಕೇವಲ ಮೂರು ಉಪವಾಸಗಳನ್ನು ಕೈಗೊಳ್ಳುವಂತೆ ಸಲಹೆ ನೀಡಿದ್ದಾರೆ. ಆದರೆ, ರಂಜಾನ್ ಮಾಸದ ಸಂಪೂರ್ಣ ಉಪವಾಸ ಕೈಗೊಳ್ಳಲು ಅನುವು ಮಾಡಿಕೊಡುವಂತೆ ವಾದಿಸುತ್ತಿದ್ದೇನೆ' ಎಂದು ಪುರಿಬೆನ್ ಹೇಳಿಕೊಂಡಿದ್ದಾರೆ.

'ಆಸ್ತಿ ವಿವಾದಕ್ಕೆ ಸಂಬಂಧಿಸಿದಂತೆ ನನ್ನ ಹಾಗೂ ಸಹೋದರ ಸಂಬಂಧಿಯ ನಡುವೆ ಕಲಹ ಉಂಟಾಗಿತ್ತು. ಕಾನೂನು ಸಮರದಲ್ಲಿ ನಾನು ಜಯಭೇರಿಯಾದರೆ ಪವಿತ್ರ ರಂಜಾನ್ ಮಾಸದಲ್ಲಿ ಉಪವಾಸ ಮಾಡುವುದಾಗಿ ಬಾಲಾ ಪಿರ್ ಬಾವಾ ದರ್ಗಾದಲ್ಲಿ ಪ್ರತಿಜ್ಞೆ ಮಾಡಿದ್ದೆ. ಅದರಂತೆ ಕೇವಲ ಒಂದೇ ವರ್ಷದಲ್ಲಿ ಕಾನೂನು ಸಮರದಲ್ಲಿ ಜಯ ಸಾಧಿಸಿದೆ. ಹೀಗಾಗಿ ಪ್ರತಿ ವರ್ಷ ರಂಜಾನ್ ಉಪವಾಸ ಕೈಗೊಳ್ಳುತ್ತಿದ್ದೇನೆ' ಎಂದು ಪುರಿಬೆನ್ ವಿವರಿಸಿದ್ದಾರೆ.