ಮಿತ್ರ ಪಕ್ಷದಿಂದಲೇ ಆಪರೇಷನ್‌ ಭಯ, ಶಾಸಕರಿಗೆ ಪೊಲೀಸ್‌ ಭದ್ರತೆ ಕೋರಿದ ಶಿವಸೇನೆ

ಮುಂಬಯಿ: ಮಹಾರಾಷ್ಟ್ರದ ಹಾಲಿ ವಿಧಾನಸಭೆ ಅವಧಿ ಶನಿವಾರಕ್ಕೆ ಕೊನೆಗೊಳ್ಳಲಿದ್ದು ಸರಕಾರ ರಚನೆ ಕಸರತ್ತು ಇನ್ನೂ ಮುಕ್ತಾಯ ಕಂಡಿಲ್ಲ. ಈ ಹಿನ್ನೆಲೆಯಲ್ಲಿ ಮಾಯಾನಗರಿಯಲ್ಲಿ ರೆಸಾರ್ಟ್‌ ರಾಜಕಾರಣ ಶುರುವಾಗಿದೆ.

ತನ್ನ ಮಿತ್ರ ಪಕ್ಷ ಬಿಜೆಪಿಯೇ ತನ್ನ ಶಾಸಕರಿಗೆ ಗಾಳ ಹಾಕುವ ಭಯದಿಂದ ಶಿವಸೇನೆ ನವೆಂಬರ್‌ 15ರ ವರೆಗೆ ಶಾಸಕರನ್ನು ರೆಸಾರ್ಟ್‌ಗೆ ಶಿಫ್ಟ್‌ ಮಾಡಲು ಮುಂದಾಗಿದೆ. ಹೀಗಿದ್ದೂ ಆಪರೇಷನ್‌ ನಡೆಯಬಹುದು ಎಂಬ ಭಯದಲ್ಲಿ ಶಾಸಕರಿಗೆ ಪೊಲೀಸ್‌ ಭದ್ರತೆ ನೀಡುವಂತೆ ಮನವಿ ಮಾಡಿಕೊಂಡಿದೆ.

ಈ ಸಂಬಂಧ ಶಿವಸೇನೆಯ ಕಾರ್ಯದರ್ಶಿ ಮಿಲಿಂದ್‌ ನರ್ವೇಕರ್‌ ಮುಂಬಯಿ ಪೊಲೀಸ್‌ ಆಯುಕ್ತರಿಗೆ ಪತ್ರ ಬರೆದಿದ್ದು ಹೊಸದಾಗಿ ಆಯ್ಕೆಯಾಗಿರುವ ಶಾಸಕರಿಗೆ ನವೆಂಬರ್‌ 15ರವರೆಗೆ ಸೂಕ್ತ ರಕ್ಷಣೆ ನೀಡುವಂತೆ ಕೋರಿಕೊಂಡಿದ್ದಾರೆ. ಎಲ್ಲಾ ಶಾಸಕರು ಮುಂಬಯಿ ಉಪನಗರ ಮಲಾಡ್‌ನ ರಿಟ್ರೀಟ್‌ ಹೊಟೇಲ್‌ನಲ್ಲಿ ಉಳಿದುಕೊಳ್ಳಲಿದ್ದಾರೆ ಎಂಬುದಾಗಿ ಅವರು ಪತ್ರದಲ್ಲಿ ಮಾಹಿತಿ ನೀಡಿದ್ದಾರೆ.

“ಶಿವಸೇನೆ ಮುಖ್ಯಸ್ಥ ಉದ್ಧವ್‌ ಠಾಕ್ರೆ ಮುಂದಿನ ತೀರ್ಮಾನಕ್ಕಾಗಿ ಆಗಾಗ ಶಾಸಕರನ್ನು ಭೇಟಿಯಾಗಲಿದ್ದಾರೆ. ಸೂಕ್ತ ರಕ್ಷಣೆಗಾಗಿ ನಾವು ನಿಮ್ಮಲ್ಲಿ ಮನವಿ ಮಾಡಿಕೊಳ್ಳುತ್ತೇವೆ,” ಎಂಬುದಾಗಿ ಪೊಲೀಸರಿಗೆ ಬರೆದ ಪತ್ರದಲ್ಲಿ ತಿಳಿಸಿದ್ದಾರೆ.

ಶಿವಸೇನೆಯಿಂದ ಪತ್ರ ಬಂದಿರುವುದನ್ನು ಮುಂಬಯಿ ಪೊಲೀಸರು ಖಚಿತಪಡಿಸಿದ್ದಾರೆ. “ನಾವು ಶಿವಸೇನೆಯಿಂದ ಪತ್ರ ಸ್ವೀಕರಿಸಿದ್ದೇವೆ ಮತ್ತು ಮುಂಬಯಿ ಪೊಲೀಸರು ಶಾಸಕರು ಭದ್ರತೆಯನ್ನು ನೋಡಿಕೊಳ್ಳಲಿದ್ದಾರೆ,” ಎಂಬುದಾಗಿ ಅಧಿಕಾರಿಯೊಬ್ಬರು ಸ್ಪಷ್ಟಪಡಿಸಿದ್ದಾರೆ.

ಅಧಿಕಾರ ಹಂಚಿಕೆ ಸಂಬಂಧ ಮಹಾರಾಷ್ಟ್ರದಲ್ಲಿ ಶಿವಸೇನೆ ಮತ್ತು ಬಿಜೆಪಿ ಪಟ್ಟು ಹಾಕಿ ಕುಳಿತಿವೆ. ಹೀಗಾಗಿ ಅಕ್ಟೋಬರ್‌ 24ರಂದು ಫಲಿತಾಂಶ ಬಂದಿದ್ದರೂ ಇನ್ನೂ ಸರಕಾರ ರಚನೆ ಆಗಿಲ್ಲ. ಈ ನಡುವೆ ನಮ್ಮ ಶಾಸಕರಿಗೆ ಪಕ್ಷ ಬದಲಾಯಿಸಲು ಆಮಿಷ ಒಡ್ಡಲಾಗುತ್ತಿದೆ ಎಂಬುದಾಗಿ ಕಾಂಗ್ರೆಸ್‌ ಮತ್ತು ಎನ್‌ಸಿಪಿ ಪಕ್ಷಗಳು ದೂರಿವೆ.