ಚಂದ್ರಯಾನ-2 ಕೈಗೊಳ್ಳುವ ರೋವರ್‌ನ ಫೋಟೊ ಬಿಡುಗಡೆ

ಹೊಸದಿಲ್ಲಿ: ದೇಶದ ಮಹತ್ವಾಕಾಂಕ್ಷಿ ಬಾಹ್ಯಾಕಾಶ ಯೋಜನೆ 'ಚಂದ್ರಯಾನ-2' ಭಾಗವಾಗಿ ಚಂದ್ರನ ಮೇಲೆ ಚಲಿಸಿ ಅಲ್ಲಿನ ಸ್ಥಿತಿಗತಿಗಳ ಅಧ್ಯಯನ ನಡೆಸುವ ಪ್ರಗ್ಯಾನ್‌ ರೋವರ್‌ನ ಮೊದಲ ಚಿತ್ರಗಳನ್ನು ಇಸ್ರೊ ಭಾನುವಾರ ಬಿಡುಗಡೆ ಮಾಡಿದೆ.

ಸೆಪ್ಟೆಂಬರ್‌ ಮೊದಲ ವಾರದಲ್ಲಿ ಚಂದ್ರನಲ್ಲಿಗೆ ಚಿಮ್ಮುವ ಜಿಎಸ್‌ಎಲ್‌ವಿ ಮಾರ್ಕ್‌ 3 ರಾಕೆಟ್‌, 'ವಿಕ್ರಮ್‌' ಲ್ಯಾಂಡರ್‌ ಹಾಗೂ 'ಪ್ರಗ್ಯಾನ್‌' ರೋವರ್‌ಗಳನ್ನು ಹೊತ್ತೊಯ್ಯಲಿದೆ.

27 ಕಿಲೋ ತೂಕದ ಆರು ಗಾಲಿಗಳನ್ನು ಹೊಂದಿರುವ ಈ ರೋವರ್‌ 14 ದಿನಗಳವರೆಗೆ ಸುಮಾರು ಅರ್ಧ ಕಿ.ಮೀ. ಚಂದ್ರನ ಮೇಲ್ಮೈ ಮೇಲೆ ಸಂಚರಿಸಲಿದೆ. ಸೂಕ್ಷ್ಮ ಕ್ಯಾಮೆರಾಗಳನ್ನು ಹೊಂದಿರುವ ರೋವರ್‌ನಲ್ಲಿ ಚಂದ್ರನಲ್ಲಿನ ಮಣ್ಣಿನ ಪರೀಕ್ಷೆ ನಡೆಸುವ ಹಲವು ಸಾಧನಗಳು ಕೂಡ ಇವೆ ಎಂದು ಇಸ್ರೊ ಮುಖ್ಯಸ್ಥ ಡಾ. ಕೆ.ಶಿವನ್‌ ಹೇಳಿದ್ದಾರೆ.