71ನೇ ಸೇನಾ ದಿನದಂದು ಪರೇಡ್‌ ಮುನ್ನಡೆಸಲಿರುವ ಮೊದಲ ಮಹಿಳೆ ಭಾವನ ಕಸ್ತೂರಿ

ಹೊಸದಿಲ್ಲಿ: ಜನವರಿ 15ರಂದು ನಡೆಯಲಿರುವ ಸೇನಾ ದಿನದ ಪರೇಡ್‌ನಲ್ಲಿ ಭಾರತದ ಇತಿಹಾಸದಲ್ಲೇ ಮೊದಲ ಬಾರಿಗೆ ಮಹಿಳೆಯೊಬ್ಬರು ಸೇನೆ ತಂಡವನ್ನು ಮುನ್ನಡೆಸಲಿದ್ದಾರೆ. ಲೆಫ್ಟಿನೆಂಟ್‌ ಭಾವನ ಕಸ್ತೂರಿ ಅವರು 71ನೇ ಸೇನಾ ದಿನದಂದು 144 ಸಿಬ್ಬಂದಿಯುಳ್ಳ ಪರೇಡ್‌ನ ಮುಂದಾಳತ್ವ ವಹಿಸಲಿದ್ದಾರೆ.

2015ರಲ್ಲಿ ಇಬ್ಬರು ಮಹಿಳಾ ಅಧಿಕಾರಿಗಳು ಗಣರಾಜ್ಯೋತ್ಸವದ ದಿನ 148 ಸಿಬ್ಬಂದಿಯಿದ್ದ ಪರೇಡ್‌ಅನ್ನು ಮುನ್ನಡೆಸಿದ್ದರು. ಆದರೆ ಸೇನಾ ದಿನದ ಪರೇಡ್‌ನಲ್ಲಿ ಇದುವರೆಗೆ ಯಾವುದೆ ಮಹಿಳಾ ಅಧಿಕಾರಿಗೆ ಪರೇಡ್‌ ಮುನ್ನಡೆಸುವ ಅವಕಾಶ ಸಿಕ್ಕಿರಲಿಲ್ಲ.

ಭಾರತೀಯ ಸೇನಾ ಸೇವಾ ಕಾರ್ಪ್ಸ್‌(ಎಎಸ್‌ಸಿ) ನೇತೃತ್ವ ವಹಿಸಲಿರುವ ಭಾವನ ಕಸ್ತೂರಿ ಅವರಿಗೆ ಇದು ವಿಶೇಷ ಸಂದರ್ಭವೂ ಹೌದು. ಎರಡು ದಶಕಗಳ ನಂತರ ಎಎಸ್‌ಸಿ ಪರೇಡ್‌ನಲ್ಲಿ ಭಾಗವಹಿಸುತ್ತಿದೆ.

ಬೆಂಗಳೂರಲ್ಲಿ ನಮ್ಮ ಕೇಂದ್ರವಿದೆ. ಪರೇಡ್‌ನಲ್ಲಿ ಭಾಗವಹಿಸಲು 6 ತಿಂಗಳು ಅಭ್ಯಾಸ ನಡೆಸಿದ್ದೇವೆ. ನನ್ನ ಜತೆಗೆ ಇಬ್ಬರು ಪುರುಷ ಅಧಿಕಾರಿಗಳು ಅಭ್ಯಾಸ ನಡೆಸಿದ್ದಾರೆ ಎಂದು ಕಸ್ತೂರಿ ಡೈಲಿ ಪಯೋನಿಯರ್‌ಗೆ ತಿಳಿಸಿದ್ದಾರೆ.

ಕಸ್ತೂರಿ ತಮಗೆ ಸಿಕ್ಕಿದ ಅವಕಾಶಕ್ಕಾಗಿ ಭಾರತೀಯ ಸೈನ್ಯದ ಬಗ್ಗೆ ಮೆಚ್ಚುಗೆ ವ್ಯಕ್ತ ಪಡಿಸಿದ್ದಾರೆ. ಭಾರತೀಯ ಸೇನೆಯಲ್ಲಿ ಆಗುತ್ತಿರುವ ವಿಕಾಸ ಮತ್ತು ಬದಲಾವಣೆಯ ಸಂಕೇತವಿದು ಎಂದು ಬಣ್ಣಿಸಿದ್ದಾರೆ. ಹೆಚ್ಚು ಹೆಚ್ಚು ಮಹಿಳಾ ಅಧಿಕಾರಿಗಳ ಅಂಗೀಕಾರವಾಗಬೇಕು ಎಂಬ ಆಶಯ ವ್ಯಕ್ತ ಪಡಿಸಿದ್ದಾರೆ.

ಸೇನಾ ದಿನವನ್ನು ಪ್ರತಿ ವರ್ಷ ಜನವರಿ 15ಕ್ಕೆ ಆಚರಿಸಲಾಗುತ್ತದೆ. 1949ರ ಜನವರಿಯಲ್ಲಿ ಭಾರತದ ಕಮಾಂಡರ್‌ ಇನ್‌ ಚೀಫ್‌ ಆಗಿ ಜನರಲ್‌ ಲೆಫ್ಟಿನೆಂಟ್‌ ಜನರಲ್‌ ಕೆಎಂ ಕಾರ್ಯಪ್ಪ ಅಧಿಕಾರ ಪಡೆದ ದಿನದ ಸ್ಮರಣೆಯಾಗಿ ಆಚರಿಸಲಾಗುತ್ತದೆ. ಈ ಮೊದಲು ಭಾರತದ ಕಮಾಂಡರ್‌ ಇನ್‌ ಚೀಫ್‌ ಆಗಿ ಬ್ರಿಟಿಷ್‌ ಅಧಿಕಾರಿ ಸರ್‌ ಫ್ರಾನ್ಸಿಸ್‌ ಬುಚರ್‌ ಕಾರ್ಯ ನಿರ್ವಹಿಸುತ್ತಿದ್ದರು.

ಈ ದಿನ ರಾಷ್ಟ್ರದ ಭದ್ರತೆ ಮತ್ತು ನಾಗರಿಕರ ಸುರಕ್ಷತೆಗೆ ಪ್ರಾಣ ತ್ಯಾಗ ಮಾಡಿದ ವೀರ ಯೋಧರಿಗೆ ಗೌರವ ಸಲ್ಲಿಸಲಾಗುತ್ತದೆ.