ರಂಜಾನ್‌ಗೆ ಮಸೀದಿ ಗಿಫ್ಟ್‌ ನೀಡಿದ ಹಿಂದೂಗಳು

ಲುಧಿಯಾನ: ರಂಜಾನ್‌ ಉಪವಾಸ ಆರಂಭಿಸಿರುವ ಮುಸ್ಲಿಮರಿಗೆ ಇಲ್ಲಿನ ಗ್ರಾಮದ ನಿವಾಸಿಗಳು ಬಂಪರ್‌ ಕೊಡುಗೆ ನೀಡಿದ್ದು, ಪ್ರಾರ್ಥನೆಗೆ ಅನುಕೂಲವಾಗುವಂತೆ ಗ್ರಾಮದಲ್ಲೇ ಮಸೀದಿ ನಿರ್ಮಿಸಿದ್ದಾರೆ.

ಹಿಂದೂ-ಮುಸ್ಲಿಂ ವೈರತ್ವದ ಕುರಿತೇ ಸುದ್ದಿಯಾಗುವ ಕಾಲದಲ್ಲಿ ಘಲೀಬ್‌ ರನ್‌ ಸಿಂಗ್‌ ವಾಲ್‌ ಎಂಬ ಗ್ರಾಮದ ಮುಸ್ಲಿಂ ಬಾಂಧವರಿಗಾಗಿ ಹಿಂದೂ ಹಾಗೂ ಸಿಖ್‌ ಸಮುದಾಯದವರು ಮಸೀದಿ ನಿರ್ಮಿಸಿಕೊಟ್ಟಿದ್ದಾರೆ. ಕಳೆದ ಗುರುವಾರ ಈ ಮಸೀದಿ ಲೋಕಾರ್ಪಣೆಗೊಂಡಿದೆ.

ಸುಮಾರು 1300 ಜನರಿರುವ ಈ ಗ್ರಾಮದಲ್ಲಿ 700 ಮಂದಿ ಸಿಖ್‌, 200 ಹಿಂದೂ ಹಾಗು 150 ಮಂದಿ ಮುಸ್ಲಿಂ ಪಂಗಡದವರು ವಾಸಿಸುತ್ತಿದ್ದಾರೆ. ಆದರೆ ಇಲ್ಲಿನ ಮುಸ್ಲಿಮರು ನಮಾಜ್‌ ಮಾಡಲು ಪಕ್ಕದ ಊರಿಗೆ ತೆರಳ ಬೇಕಿತ್ತು. ಹೀಗಾಗಿ 1998ರಿಂದಲೇ ಗ್ರಾಮಸ್ಥರು ಒಪ್ಪಿಗೆ ಸೂಚಿಸಿ ಮಸೀದಿ ಕಟ್ಟಲು ಜಾಗವನ್ನೂ ನೀಡಲಾಗಿತ್ತು. ಆದರೆ ಕಾರಣಾಂತರದಿಂದ ನಿರ್ಮಾಣ ಸಾಧ್ಯವಾಗಿರಲಿಲಿಲ್ಲ. ಕಳೆದ ವರ್ಷ ಮಸೀದಿ ನಿರ್ಮಾಣ ಕೆಲಸ ಪ್ರಾರಂಭವಾಗಿತ್ತು.

ಈ ಕುರಿತು ಮಾತನಾಡಿದ ಗ್ರಾಮದ ನಿವಾಸಿ ಲೈಖತ್‌ ಅಲಿ ' ನಮ್ಮ ಹಲವಾರು ವರ್ಷದ ಆಸೆ ಇಂದಿಗೆ ಪೂರ್ಣಗೊಂಡಿದೆ, ಇದಕ್ಕೆ ಮುಖ್ಯ ಕಾರಣ ಈ ಗ್ರಾಮದ ಗ್ರಾಮಸ್ಥರು. ಈ ಮಸೀದಿಯನ್ನು ಗ್ರಾಮಸ್ಥರೇ ನಿರ್ಮಿಸಿದ್ದು, ನಮಗೆ ರಂಜಾನ್‌ನ ಉಡುಗೊರೆಯಾಗಿ ನೀಡಿದ್ದಾರೆ' ಎಂದು ಅಲಿ ಸಂತಸ ಹಂಚಿಕೊಂಡರು.