ಬಾವಿಗೆ ಬಿದ್ದ ಮೇಕೆ ಉಳಿಸಲು ಹೋಗಿ ನಾಲ್ಕು ಸಾವು

ತ್ರಿಚಿ: ಸಾಮಾನ್ಯವಾಗಿ ಮುಳುಗುತ್ತಿರುವ ವ್ಯಕ್ತಿಯನ್ನು ಉಳಿಸಲು ಹೋಗಿ, ಮೂರ್ನಾಲ್ಕು ಮಂದಿ ಪ್ರಾಣ ಬಿಟ್ಟಿರುವ ಸುದ್ದಿ ಕೇಳಿದ್ದೇವೆ. ಆದರೆ, ಇಲ್ಲೊಂದು ವಿಭಿನ್ನ ಪ್ರಕರಣದಲ್ಲಿ ಮುಳುಗುತ್ತಿರುವ ಮೇಕೆಯನ್ನು ಉಳಿಸಲು ಹೋಗಿ ಭಾನುವಾರ ನಾಲ್ವರು ಪ್ರಾಣ ತೆತ್ತಿದ್ದಾರೆ.

ಸುಮಾರು 60 ಅಡಿ ಆಳವಿರುವ, ಬಳಸದ ಬಾವಿಯೊಂದರಲ್ಲಿ ಬಿದ್ದ ಮೇಕೆಯನ್ನು ಉಳಿಸಲು ಹಾರಿದ ನಾಲ್ವರು ಉಸಿರಗಟ್ಟಿ ಮೃತಪಟ್ಟಿದ್ದಾರೆಂದು ಶಂಕಿಸಲಾಗಿದೆ.

ತಮಿಳುನಾಡಿನ ಪಡುಕೊಟ್ಟೈ ಜಿಲ್ಲೆಯ ಕರಂಬಕುಡಿಯಲ್ಲಿ ಈ ಪ್ರಕರಣ ನಡೆದಿದ್ದು, ಧುವರ್ ಗ್ರಾಮದ ಸೌಂದರರಾಜನ್ (45) ಮತ್ತವರ ಸ್ನೇಹಿತರಾದ ರೆಂಗಸಾಮಿ (55), ಪೆರಮೈಯಾ (55) ಮತ್ತು ಐಯಾವು (45) ಮೃತಪಟ್ಟವರು.

ಬೆಳಗ್ಗೆ ಎಂಟು ಗಂಟೆ ಸುಮಾರಿಗೆ ಬಾವಿಗೆ ಮೇಕೆ ಬೀಳುತ್ತಿರುವುದನ್ನು ಕಂಡ ಸೌಂದರರಾಜನ್ ತನ್ನ ಸ್ನೇಹಿತರನ್ನು ಕರೆದು, ಹಗ್ಗದ ಸಹಾಯದಿಂದ ಬಾವಿಗೆ ಇಳಿದಿದ್ದಾರೆ. ಗಂಟೆ ನಂತರವೂ ಅವರಿಂದ ಯಾವುದೇ ಪ್ರತಿಕ್ರಿಯೆ ಬಾರದ ಹಿನ್ನೆಲೆಯಲ್ಲಿ ಸ್ನೇಹಿತರೂ ಒಬ್ಬರ ನಂತರ ಮತ್ತೊಬ್ಬರು ಬಾವಿಗಿಳಿದಿದ್ದಾರೆ. ಅವರೂ ಬಾರದೇ ಹೋದಾಗ ಸೌಂದರರಾಜನ್ ಪತ್ನಿ ನೆರೆಹೊರೆಯವರಿಗೆ ಮಾಹಿತಿ ನೀಡಿ, ಪೊಲೀಸರಿಗೆ ತಿಳಿಸಿದ್ದಾರೆ. ತಕ್ಷಣವೇ ಅಗ್ನಿ ಶಾಮಕ ದಳದೊಂದಿಗೆ ಸ್ಥಳಕ್ಕೆ ಆಗಮಿಸಿದ ಪೊಲೀಸರು ಅಗತ್ಯ ಆಮ್ಲಜನಕದ ಮಾಸ್ಕ್‌ನೊಂದಿಗೆ ಬಾವಿಗಿಳಿದು, ಮೃತ ದೇಹಗಳನ್ನು ಹೊರ ತೆಗೆದಿದ್ದಾರೆ.

ಮೃತದೇಹಗಳನ್ನು ಸಮೀಪದ ಸರಕಾರಿ ಆಸ್ಪತ್ರೆಗೆ ಮರಣೋತ್ತರ ಪರೀಕ್ಷೆಗಾಗಿ ಕಳುಹಿಸಲಾಗಿದೆ.