ಇನ್ನೂ 36 ರಫೇಲ್‌ ಜೆಟ್‌ ಪೂರೈಸಲು ಫ್ರಾನ್ಸ್‌ ಉತ್ಸುಕ: ಸದ್ಯ ನಿರ್ಧಾರವಿಲ್ಲ ಎಂದ ಭಾರತ

ಹೊಸದಿಲ್ಲಿ: ಭಾರತ ಇನ್ನೂ 36 ರಫೇಲ್‌ ವಿಮಾನಗಳನ್ನು ಖರೀದಿಸುವ ನಿಟ್ಟಿನಲ್ಲಿ ಮಾತುಕತೆ ಆರಂಭಿಸಬಹುದು ಎಂದು ಫ್ರಾನ್ಸ್‌ ನಿರೀಕ್ಷಿಸಿದೆ. ಆದರೆ ಪ್ರಧಾನಿ ನರೇಂದ್ರ ಮೋದಿ ಮತ್ತು ಫ್ರಾನ್ಸ್‌ ಅಧ್ಯಕ್ಷರ ಜಂಟಿ ಹೇಳಿಕೆಯಲ್ಲಿ ಈ ವಿಚಾರ ಪ್ರಸ್ತಾಪವಾಗಿಲ್ಲ.

2016ರ ಸೆಪ್ಟೆಂಬರ್‌ನಲ್ಲಿ ಸಹಿ ಹಾಕಲಾದ ಒಪ್ಪಂದದಂತೆ ಭಾರತೀಯ ವಾಯುಪಡೆ ಈಗಾಗಲೇ 59,000 ಕೋಟಿ ರೂ.ಗಳ ವೆಚ್ಚದಲ್ಲಿ 36 ರಫೇಲ್‌ ಯುದ್ಧ ವಿಮಾನಗಳ ಖರೀದಿ ಪ್ರಕ್ರಿಯೆ ಪೂರ್ಣಗೊಳಿಸಿದೆ.

ಅಧ್ಯಕ್ಷ ಎಮಾನ್ಯುಯೆಲ್‌ ಮ್ಯಾಕ್ರೋನ್ ಅವರ ಭಾರತ ಭೇಟಿಗೆ ಮೊದಲೇ ಫ್ರೆಂಚ್‌ ರಕ್ಷಣಾ ಸಚಿವ ಫ್ಲಾರೆನ್ಸ್‌ ಪಾರ್ಲೆ ಭಾರತಕ್ಕೆ ಆಗಮಿಸಿ ರಕ್ಷಣಾ ಸಚಿವೆ ನಿರ್ಮಲಾ ಸೀತಾರಾಮನ್ ಜತೆ ಈ ಸಂಬಂಧ ಮಾತುಕತೆ ನಡೆಸಿದ್ದರು. ಭಾರತೀಯ ವಾಯುಪಡೆಗೆ ಇನ್ನೂ 36 ರಫೇಲ್‌ ಜೆಟ್‌ಗಳನ್ನು ಮಾರಾಟ ಮಾಡುವ ಪ್ರಸ್ತಾಪ ಮುಂದಿಟ್ಟಿದ್ದರು.

ಆದರೆ ಭವಿಷ್ಯದಲ್ಲಿ ಎರಡು ಹೆಚ್ಚುವರಿ ಸ್ಕ್ವಾಡ್ರನ್‌ಗಳ (1 ಸ್ಕ್ವಾಡ್ರನ್= 18 ಜೆಟ್‌ ವಿಮಾನಗಳು) ಸೇರ್ಪಡೆ ಬಗ್ಗೆ ಯಾವುದೇ ನಿರ್ಧಾರ ಕೈಗೊಂಡಿಲ್ಲ. ಮೊದಲ ಹಂತದ 36 ವಿಮಾನಗಳ ಪೂರೈಕೆ ಪೂರ್ಣಗೊಂಡ ಬಳಿಕವಷ್ಟೇ ಮುಂದಿನ ನಿರ್ಧಾರ ಎಂದು ಎಂದು ರಕ್ಷಣಾ ಸಚಿವಾಲಯ ತಿಳಿಸಿದೆ.

ಮೊದಲ ಹಂತದ 36 ರಫೇಲ್‌ ಜೆಟ್‌ಗಳನ್ನು 2019ರ ನವೆಂಬರ್‌ನಿಂದ 2022ರ ಮಧ್ಯಭಾಗದೊಳಗೆ ಹಾಸಿಮಾರ (ಪ.ಬಂಗಾಳ) ಮತ್ತು ಅಂಬಾಲಾ (ಹರ್ಯಾಣ) ವಾಯುನೆಲೆಗಳಲ್ಲಿ ನಿಯೋಜನೆಗೊಳ್ಳಲಿವೆ.