ಸಹಯೋಗದ ಕಲಿಕೆಗೆ ಸಿಬಿಎಸ್‌ಇ ಒತ್ತು

ಹೊಸದಿಲ್ಲಿ: ಶೈಕ್ಷಣಿಕ ಕ್ಷೇತ್ರದಲ್ಲಿ ಮತ್ತಷ್ಟು ಪ್ರಗತಿ ಸಾಧಿಸುವ ನಿಟ್ಟಿನಲ್ಲಿ ಕೇಂದ್ರೀಯ ಪ್ರೌಢ ಶಿಕ್ಷಣ ಮಂಡಳಿಯು (ಸಿಬಿಎಸ್‌ಇ) 'ಕೊಲಾಬ್ರೇಟಿವ್‌ ಲರ್ನಿಂಗ್‌ ಹಬ್‌-ಸಿಎಲ್‌ಎಚ್‌'(ಸಹಯೋಗದ ಕಲಿಕಾ ಕೇಂದ್ರ) ಎಂಬ ಪರಿಕಲ್ಪನೆಯನ್ನು ಪರಿಚಯಿಸಿದ್ದು, ಜುಲೈ 1ರಿಂದ ಜಾರಿಗೆ ಬರಲಿದೆ.

ಸಿಎಲ್‌ಎಚ್‌ ಯೋಜನೆಯಡಿ ಪ್ರದೇಶವೊಂದರಲ್ಲಿ ಇರುವ ಸಿಬಿಎಸ್‌ಇ ಪಠ್ಯಕ್ರಮದ ಶಾಲೆಗಳ ಮಧ್ಯೆ ಶಿಕ್ಷಕರ, ಮೂಲ ಸೌಕರ್ಯಗಳ ಹಾಗೂ ಉತ್ತಮ ಬೋಧನಾ ಮಾದರಿಗಳ ವಿನಿಮಯ ನಡೆಯಲಿದೆ. ಸಿಬಿಎಸ್‌ಇ ಮಾನ್ಯತೆಯ ಮೌಲ್ಯಮಾಪನ ಮತ್ತು ಶಾಲೆಗಳ ಉನ್ನತೀಕರಣಕ್ಕೆ ಈ ನಿಯಮ ಪಾಲನೆ ಕಡ್ಡಾಯವಾಗಲಿದೆ. ಈ ಯೋಜನೆಯಡಿ ದೇಶಾದ್ಯಂತ ಸಿಬಿಎಸ್‌ಇ ಮಾನ್ಯತೆ ಪಡೆದ 22 ಸಾವಿರ ಶಾಲೆಗಳನ್ನು 4,500 ಜಿಲ್ಲಾ ಕೇಂದ್ರಗಳಾಗಿ (ಡಿಸ್ಟ್ರಿಕ್ಟ್ ಹಬ್‌) ವಿಂಗಡಿಸಲಾಗಿದೆ.

''ಕೆಲವು ಶಾಲೆಗಳಲ್ಲಿ ಅಗತ್ಯ ಶಿಕ್ಷಕರ ಸಂಪನ್ಮೂಲ ಹಾಗೂ ಇತರ ಮೂಲ ಸೌಕರ್ಯಗಳಿರುವುದಿಲ್ಲ. ಮತ್ತೆ ಕೆಲವು ಶಾಲೆಗಳಲ್ಲಿ ಇವೆಲ್ಲ ಇದ್ದರೂ ಅವುಗಳು ಪೂರ್ಣ ಪ್ರಮಾಣದಲ್ಲಿ ಬಳಕೆಯಾಗುತ್ತಿರುವುದಿಲ್ಲ. ಈ ಹಿನ್ನೆಲೆಯಲ್ಲಿ ಶಾಲೆಗಳ ಮಧ್ಯೆ ನುರಿತ ಶಿಕ್ಷಕರ ಹಾಗೂ ಮೂಲಸೌಕರ್ಯಗಳ (ಆಡಿಟೋರಿಯಂ, ಪ್ರಯೋಗಾಲಯ, ಹೊರಾಂಗಣ ಮತ್ತು ಒಳಾಂಗಣ ಕ್ರೀಡಾಂಗಣ ಇತ್ಯಾದಿ) ವಿನಿಮಯಕ್ಕೆ ಅವಕಾಶ ಮಾಡಿಕೊಡಲಾಗಿದೆ. ಅಲ್ಲದೇ ಪ್ರಾಂಶುಪಾಲರ ಮತ್ತು ಶಿಕ್ಷಕರ ತರಬೇತಿ, ಕ್ರೀಡಾ ಮತ್ತು ಸಾಂಸ್ಕೃತಿಕ ಕಾರ್ಯಕ್ರಮಗಳು, ವಿಜ್ಞಾನ ವಸ್ತು ಪ್ರದರ್ಶನ ಮತ್ತು ರಸಪ್ರಶ್ನೆ ಕಾರ‍್ಯಕ್ರಮಗಳ ಆಯೋಜನೆಯಲ್ಲೂ ಸಂಪನ್ಮೂಲಗಳ ವಿನಿಮಯ ನಡೆಯಲಿದೆ. ಪರಸ್ಪರ ಸಹಯೋಗದಲ್ಲಿ ಹೀಗೆ ತರಹೇವಾರಿ ಚಟುವಟಿಕೆಗಳನ್ನು ನಡೆಸುವುದರಿಂದ ವಿದ್ಯಾರ್ಥಿಗಳ ಕಲಿಕಾ ಗುಣಮಟ್ಟ ಸುಧಾರಣೆಯಾಗಲಿದೆ,'' ಎನ್ನುತ್ತಾರೆ ಕೇಂದ್ರೀಯ ಪ್ರೌಢ ಶಿಕ್ಷಣ ಮಂಡಳಿಯ ಕಾರ‍್ಯದರ್ಶಿ ಅನುರಾಗ್‌ ತ್ರಿಪಾಠಿ.

ಸಿಬಿಎಸ್‌ಇ ಮಾನ್ಯತೆ ಪಡೆದ ಶಾಲೆಗಳು ತಮ್ಮದೇ ಪಠ್ಯಕ್ರಮ ಹೊಂದಲು ಹಾಗೂ 1ರಿಂದ 8ನೇ ತರಗತಿವರೆಗೆ ಪ್ರಶ್ನೆ ಪತ್ರಿಕೆಗಳನ್ನು ರೂಪಿಸಿಕೊಳ್ಳಲೂ ಈ ಸಹಕಾರ ನೆರವಾಗಲಿದೆ ಎಂದೂ ಹೇಳಲಾಗುತ್ತಿದೆ.