ವೆಂಕಟೇಶ್ವರ ದೇಗುಲದ ಗರ್ಭಗುಡಿಯಲ್ಲಿ ಗರುಡ: ಪವಾಡ ವೀಕ್ಷಿಸಿದ ಭಕ್ತರು

ಕೊರುಟ್ಲ: ಇದು ಪವಾಡವೋ, ವಿಸ್ಮಯವೋ, ದೈವ ಪ್ರೇರಣೆಯೋ ಗೊತ್ತಿಲ್ಲ. ಶ್ರೀ ಮಹಾವಿಷ್ಣುವಿನ ವಾಹನವಾದ ಗರುಡ ಪಕ್ಷಿ ದೇವರ ಪಾದದಲ್ಲೇ ಬಂದು ಕುಳಿತಿದ್ದು ಭಕ್ತರನ್ನು ಪರವಶಗೊಳಿಸಿದೆ.

ತೆಲಂಗಾಣದ ಜಗಿತ್ಯಾಲ್‌ ಜಿಲ್ಲೆಯ ಕೊರುಟ್ಲದಲ್ಲಿರುವ ವೆಂಕಟೇಶ್ವರ ದೇಗುಲದ ಗರ್ಭಗುಡಿಯಲ್ಲಿ ಗರುಡ ಪಕ್ಷಿ ವಿಗ್ರಹದ ಪಾದದ ಬಳಿಯೇ ಬಂದು ಕುಳಿತಿತ್ತು.

ದೇಗುಲದಲ್ಲಿ ಗರುಡ ಬಂದು ಕುಳಿತಿರುವ ವಿಷಯ ತಿಳಿಯುತ್ತಿದ್ದಂತೆ ಭಕ್ತರ ದಂಡೇ ಹರಿದು ಬಂತು. ಸಾಕ್ಷಾತ್‌ ವಿಷ್ಣುವಿನ ವಾಹನವೇ ಪಾದದ ಬಳಿಯೇ ಬಂದಿದ್ದು ನಿಜಕ್ಕೂ ದೈವ ಶಕ್ತಿ ಎಂದು ಭಕ್ತರು ಹೇಳಿಕೊಳ್ಳುತ್ತಿದ್ದುದು ಕೇಳಿಬಂದಿತು.

ಈ ಗರುಡ ಪಕ್ಷಿ ಹೇಗೆ ಒಳಗೆ ಬಂತು ಎಂಬುದು ಗೊತ್ತಿಲ್ಲ. ಆದರೆ ಬಂದ ನಂತರ ನಿತ್ರಾಣವಾಗಿತ್ತು ಎಂದು ಪ್ರತ್ಯಕ್ಷದರ್ಶಿಗಳು ತಿಳಿಸಿದರು.

ನಂತರ ಅರಣ್ಯ ಇಲಾಖೆ ಅಧಿಕಾರಿಗಳು ಕೂಡಲೇ ಸ್ಥಳಕ್ಕೆ ಧಾವಿಸಿ ಗರುಡ ಪಕ್ಷಿಯನ್ನು ಸೂಕ್ತ ಸ್ಥಳಕ್ಕೆ ಸ್ಥಳಾಂತರ ಮಾಡಿದರು.