85 ರೋಗಿಗಳ ಕೊಲೆಗೈದ ನರ್ಸ್‌ಗೆ ಜೀವಾವಧಿ ಶಿಕ್ಷೆ

ಓಲ್ಡನ್‌ಬರ್ಗ್‌: ಜರ್ಮನಿಯ ಸಮರೋತ್ತರ ಇತಿಹಾಸದ ಅತ್ಯಂತ ಭಯಾನಕ ಸರಣಿ ಕೊಲೆಗಾರ ಎಂದೇ ಹೇಳಲಾದ ನರ್ಸ್‌ ಒಬ್ಬನಿಗೆ ನಿರ್ದಿಷ್ಟ ಪ್ರಕರಣವೊಂದರಲ್ಲಿ ಜೀವಾವಧಿ ಶಿಕ್ಷೆ ವಿಧಿಸಲಾಗಿದೆ. ತನ್ನ ಆರೈಕೆಯಲ್ಲಿದ್ದ 85 ಮಂದಿ ರೋಗಿಗಳನ್ನು ಕೊಲೆ ಮಾಡಿದ ಆರೋಪ ಹೊತ್ತಿರುವ 42 ವರ್ಷದ ನೀಲ್ಸ್‌ ಹೋಗೆಲ್‌ನ ಪಾತಕಗಳ ಸಂಖ್ಯೆ 200ನ್ನು ಮೀರಬಹುದು ಎಂದು ಪೊಲೀಸರು ಶಂಕಿಸಿದ್ದಾರೆ.

2000ದಿಂದ 2005ರ ನಡುವೆ ಆತ ಈ ಕೊಲೆಗಳನ್ನು ಮಾಡಿದ್ದು, ಆಯ್ದ ರೋಗಿಗಳನ್ನು ಮಾರಕ ಇಂಜೆಕ್ಷನ್‌ ಚುಚ್ಚಿ ಸಾಯಿಸಿದ್ದಾನೆ ಎಂದು ಆರೋಪಿಸಲಾಗಿದೆ. 2005ರಲ್ಲಿ ವೈದ್ಯರು ಶಿಫಾರಸು ಮಾಡದೇ ಇದ್ದ ಇಂಜೆಕ್ಷನ್‌ ಅನ್ನು ರೋಗಿಗೆ ನೀಡುವ ವೇಳೆ ಸಿಕ್ಕಿಬಿದ್ದ ಆತನಿಗೆ ಏಳು ವರ್ಷ ಜೈಲು ಶಿಕ್ಷೆ ವಿಧಿಸಲಾಗಿತ್ತು. ಬಳಿಕ ಆರು ಮಂದಿಯ ಕೊಲೆಗೆ ಸಂಬಂಧಿಸಿ ಇನ್ನೊಂದು ಸುತ್ತಿನ ಶಿಕ್ಷೆಗೆ ಒಳಗಾಗಿದ್ದ.

ಆತನ ಮೇಲಿನ ಆರೋಪಗಳನ್ನು ಸಾಬೀತುಪಡಿಸಬೇಕೆಂದರೆ 130ಕ್ಕೂ ಅಧಿಕ ಶವಗಳನ್ನು ಮೇಲೆತ್ತಿ ಮರಳಿ ಮರಣೋತ್ತರ ಪರೀಕ್ಷೆಗೆ ಒಳಪಡಿಸಸಬೇಕಾಗುತ್ತದೆ ಎಂದು ಪೊಲೀಸರು ಅಭಿಪ್ರಾಯಪಟ್ಟಿದ್ದಾರೆ.