ಮಲಗಿದ್ದಾಳೆಂದು ಬೀಗ ಹಾಕಿ ಮದುವೆಗೆ ಹೋದ ಅಪ್ಪ-ಅಮ್ಮ; ಅಗ್ನಿ ದುರಂತದಲ್ಲಿ ಬಾಲಕಿ ಸಾವು

ಮುಂಬಯಿ: ಮಲಗಿದ್ದ ಮಗಳನ್ನು ಎಬ್ಬಿಸುವುದು ಬೇಡವೆಂದು ತಂದೆ-ತಾಯಿ ಮನೆ ಬಾಗಿಲು ಹಾಕಿ ಹೋಗಿದ್ದೇ ಬಹುದೊಡ್ಡ ಅನಾಹುತಕ್ಕೆ ಕಾರಣವಾಯಿತು. ಮನೆಯೊಳಗೆ ಬೆಂಕಿ ಹತ್ತಿ ಉರಿದು, 16 ವರ್ಷದ ಬಾಲಕಿ ಉಸಿರುಗಟ್ಟಿ ಸಾವನ್ನಪ್ಪಿದ್ದಾಳೆ. ಮುಂಬಯಿ ಉಪನಗರ ಇಲಾಖೆಯ ದಾದರ್‌ನಲ್ಲಿ ಭಾನುವಾರ ಈ ಹೃದಯ ವಿದ್ರಾವಕ ಘಟನೆ ನಡೆದಿದೆ.

ಮೃತ ಬಾಲಕಿ ಶ್ರಾವಣಿ ಚಾವನ್ ತಂದೆ- ತಾಯಿ ಮದುವೆಯಲ್ಲಿ ಪಾಲ್ಗೊಳ್ಳಲು ಹೋಗಿದ್ದರು. ಆ ಸಂದರ್ಭದಲ್ಲಿ ಮಗಳು ಮಲಗಿದ್ದಳು. ಆಕೆ ನಿದ್ದೆ ಮಾಡಿ ಎದ್ದು ಓದಿ ಕೊಳ್ಳಲಿ ಎಂದುಕೊಂಡ ಅವರು , ಬೀಗ ಹಾಕಿ ಅಲ್ಲಿಂದ ತೆರಳಿದರು.

ಮಧ್ಯಾಹ್ನ 1.ಗಂಟೆ 45 ನಿಮಿಷಕ್ಕೆ ಅವರ ಅಪಾರ್ಟ್‌ಮೆಂಟ್‌ನ ಮೂರನೇ ಮಹಡಿಯಲ್ಲಿ ಬೆಂಕಿ ಹೊತ್ತಿಕೊಂಡಿತು. ಬೆಂಕಿ ಅವರ ಮನೆಗೂ ಹಬ್ಬಿ ಶ್ರಾವಣಿ ಕೋಣೆ ಕೂಡ ಬೆಂಕಿಗಾಹುತಿಯಾಯಿತು. ಆಕೆಯ ಕೋಣೆಯ ಬಾಗಿಲು ಒಳಗಿಂದ ಮತ್ತು ಹೊರಗಿಂದ ಬಂದ್ ಆಗಿತ್ತು.

ಬೆಂಕಿ ಮತ್ತು ಹೊಗೆಯ ಮಧ್ಯೆ ಸಿಲುಕಿದ ಬಾಲಕಿಗೆ ಹೊರಕ್ಕೆ ಬರಲಾಗಲಿಲ್ಲ, ಜೊತೆಗೆ ಉಸಿರಾಡಲು ಆಗಲಿಲ್ಲ. ಪ್ರಜ್ಞೆ ಕಳೆದುಕೊಂಡ ಆಕೆಯನ್ನು ರಕ್ಷಿಸಿ ಆಸ್ಪತ್ರೆಗೆ ಸೇರಿಸಲಾಯಿತು. ಆದರೆ ಆಕೆಯನ್ನು ಉಳಿಸಿಕೊಳ್ಳಲಾಗಲಿಲ್ಲ.

ಅಪಾರ್ಟ್‌ಮೆಂಟ್ ಬೆಂಕಿ ನಂದಿಸಲು ಅಗ್ನಿಶಾಮಕ ತಂಡಕ್ಕೆ ಮೂರು ಗಂಟೆ ತಗುಲಿದ್ದ, ಅನೇಕ ಮನೆಗಳ ಬೆಲೆಬಾಳುವ ವಸ್ತುಗಳು ಸಹ ಸುಟ್ಟು ಕರಕಲಾಗಿವೆ ಎಂದು ತಿಳಿದುಬಂದಿದೆ.