ಶಾಲೆಯಲ್ಲಿ ಮುಂಜಾನೆ ಪ್ರಾರ್ಥನೆ ವೇಳೆ ಹೃದಯಾಘಾತದಿಂದ 6 ವರ್ಷದ ಬಾಲಕಿ ಸಾವು

ಜಮ್‌ಶೆಡ್‌ಪುರ: ಮೊದಲೆಲ್ಲ 50, 60 ದಾಟಿದವರಲ್ಲಿ ಹೃದಯಾಘಾತವೆನ್ನುವುದು ಸಾಮಾನ್ಯವಾಗಿತ್ತು. ಆದರೆ ಇತ್ತೀಚಿಗೆ 20 -30 ವಯಸ್ಸಿನೊಳಗಿರುವವರು ಸಹ ಹೃದಯಾಘಾತಕ್ಕೊಳಗಾದ ಉದಾಹರಣೆಗಳು ಕಂಡು ಬಂದಿವೆ. ಆದರೆ ಜಾರ್ಖಂಡ್‌ನ ಶಾಲೆಯಲ್ಲಿ ಕೇವಲ 6 ವರ್ಷದ ಪುಟ್ಟ ಬಾಲಕಿ ಹೃದಯಾಘಾತದಿಂದ ಸಾವನ್ನಪ್ಪಿದ್ದು ಎಲ್ಲರನ್ನು ಬೆಚ್ಚಿ ಬೀಳಿಸಿದೆ.

ಮಹಿಳೆಯರಲ್ಲಿ ಹೃದಯಾಘಾತದ ಲಕ್ಷಣಗಳಿವು

ಜಮ್‌ಶೆಡ್‌ಪುರದ ಟೆಲ್ಕೋ ಪ್ರದೇಶದಲ್ಲಿರುವ ಶಿಕ್ಷಾ ನಿಕೇತನ ಶಾಲೆಯಲ್ಲಿ ಮುಂಜಾನೆ ಪ್ರಾರ್ಥನೆಯಲ್ಲಿದ್ದಾಗ 1 ನೇ ತರಗತಿ ವಿದ್ಯಾರ್ಥಿನಿ ವೈಷ್ಣವಿ ಝಾ ಹೃದಯಾಘಾತದಿಂದ ಕುಸಿದು ಬಿದ್ದಿದ್ದಾಳೆ ಎಂದು ತಿಳಿದುಬಂದಿದೆ.

ಶಾಲೆಗೆ ಬರುವಾಗ ಬಾಲಕಿ ಸಹಜ ಸ್ಥಿತಿಯಲ್ಲಿದ್ದಳು. ಪ್ರಾರ್ಥನೆ ನಡೆಸಲು ಸಾಲುಗಟ್ಟಿ ನಿಂತಾಗ ಇದ್ದಕ್ಕಿದ್ದಂತೆ ನೆಲಕ್ಕುರುಳಿದಳು. ತಕ್ಷಣ ಆಸ್ಪತ್ರೆಗೆ ಕರೆದೊಯ್ಯಲಾಯಿತಾದರೂ ವೈದ್ಯರು ಸಾವನ್ನಪ್ಪಿರುವುದಾಗಿ ಘೋಷಿಸಿದ್ದಾರೆ.

ಆಕೆ ಹೃದಯಾಘಾತದಿಂದ ಸಾವನ್ನಪ್ಪಿದ್ದಾಳೆ ಎಂದು ವೈದ್ಯರು ಖಚಿತ ಪಡಿಸಿರುವುದಾಗಿ ಆಕೆಯ ಓದುತ್ತಿದ್ದ ಶಾಲೆಯ ಪ್ರಾಚಾರ್ಯೆ ಸುನೀತಾ ಡೇ ಹೇಳಿದ್ದಾರೆ.

ಬಾಲಕಿ ಆತ್ಮಕ್ಕೆ ಶಾಂತಿ ಕೋರಿ ಶಾಲೆಗೆ ಆ ದಿನದ ಮಟ್ಟಿಗೆ ರಜೆ ಘೋಷಿಸಲಾಯಿತು ಎಂದವರು ತಿಳಿಸಿದ್ದಾರೆ.