ತಾಯಿಯ ಪ್ರಿಯತಮನನ್ನು ಕೊಲ್ಲಿಸಿದ ಯುವತಿ

ಹೈದರಾಬಾದ್: ಪದೇ ಪದೇ ಮನೆಗೆ ಬರುತ್ತಿದ್ದ ತಾಯಿಯ ಪ್ರಿಯತಮನನ್ನು ಪದವಿ ವಿದ್ಯಾರ್ಥಿನಿಯೊಬ್ಬಳು ಸ್ನೇಹಿತರ ಸಹಾಯದಿಂದ ಕೊಲ್ಲಿಸಿದ್ದು, ಇದೀಗ ಪೊಲೀಸರ ಅತಿಥಿಯಾಗಿದ್ಗಾಳೆ.

ಘಟನೆಗೆ ಸಂಬಂಧಿಸಿದಂತೆ ಸೈಬರಾಬಾದ್ ಪೊಲೀಸರು ಮೂವರನ್ನು ಬಂಧಿಸಿದಾಗ ಈ ಪ್ರಕರಣ ಬೆಳಕಿಗೆ ಬಂದಿದೆ. ರಿಯಲ್ ಎಸ್ಟೇಟ್ ಉದ್ಯಮಿ ದುರ್ಗಾ ದಾಸ್ (48) ಅವರ ಮೇಲೆ ಅಪರಿಚಿತರು ಡಿಸೆಂಬರ್ 7ರಂದು ಕೊಲ್ಲಲು ಯತ್ನಿಸಿದ್ದರು. ಗಂಭೀರವಾಗಿ ಗಾಯಗೊಂಡಿದ್ದ ಇವರನ್ನು ಆಸ್ಪತ್ರೆಗೆ ದಾಖಲಿಸಲಾಗಿತ್ತು. ಚಿಕಿತ್ಸೆ ಫಲಕಾರಿಯಾಗದೇ ಡಿಸೆಂಬರ್ 11ರಂದು ದಾಸ್ ಕೊನೆಯುಸಿರೆಳೆದಿದ್ದರು.

ದಾಸ್ ಪತ್ನಿ ಅರುಣಾವತಿ ದೂರಿನ ಆಧಾರ ಮೇಲೆ ರಾಮಚಂದ್ರಪುರಂ ಪೊಲೀಸರು ಕೊಲೆಗೆ ಯತ್ನ ನಡೆಸಿದ ದೂರು ದಾಖಿಲಿಸಿಕೊಂಡಿದ್ದರು. ದಾಸ್ ಮೇಲೆ ದಾಳಿ ನಡೆಸಿದ ಆರೋಪಿಗಳು ಇನ್ನೋವಾದಲ್ಲಿ ಆಗಮಿಸಿದ್ದನ್ನು ಪತ್ತೆ ಹಚ್ಚಿದ ಪೊಲೀಸರು, ಕಾರಿನ ನಂಬರ್ ಆಧಾರದ ಮೇಲೆ ಆರೋಪಿಗಳನ್ನು ಬಂಧಿಸುವಲ್ಲಿ ಯಶಸ್ವಿಯಾಗಿದ್ದಾರೆ. ಆರೋಪಿಗಳ ಹೇಳಿಕೆ ಮೇರೆಗೆ ದಾಸ್ ಅನೈತಿಕ ಸಂಬಂಧವಿಟ್ಟುಕೊಂಡಿದ್ದ ಮಹಿಳೆಯ ಮಗಳು ಶ್ರೀಜಾಳನ್ನು ಬಂಧಿಸಿದ್ದಾರೆ.

ತಾಯಿಯೊಂದಿಗೆ ದಾಸ್ ಅನೈತಿಕ ಸಂಬಂಧವನ್ನಿಟ್ಟುಕೊಂಡಿದ್ದರಿಂದ ಶ್ರೀಜಾ ಅಸಮಾಧಾನಗೊಂಡಿದ್ದಳು, ಎಂದು ಪೊಲೀಸರು ತಿಳಿಸಿದ್ದಾರೆ.