ಮನದನ್ನನಿಗಾಗಿ ಮನೆಯನ್ನೇ ಲೂಟಿ ಹೊಡೆದಳು

ರಾಜ್ಕೋಟ್: ಪ್ರೀತಿ ಕುರುಡು ಅನ್ನುತ್ತಾರೆ. ಪ್ರೀತಿಯಲ್ಲಿ ಬಿದ್ದವರು ಪ್ರೀತಿಸಿದವರಿಗಾಗಿ ಏನನ್ನು ಕೂಡ ಮಾಡಲು ಸಿದ್ಧರಿರುತ್ತಾರೆ. ಅದಕ್ಕೆ ನಿದರ್ಶನ ಈ ಘಟನೆ.
ರಾಜ್ಕೋಟ್ ನಿವಾಸಿ ಪ್ರಿಯಾಂಕಾ ತನ್ನ ಪ್ರಿಯಕರನ ಮೇಲಿನ ಹುಚ್ಚು ಪ್ರೀತಿಗಾಗಿ ಮಾಡಿದ್ದು ಏನು ಗೊತ್ತಾ? ಆಕೆ ತನ್ನ ಮನೆಯನ್ನೇ ಲೂಟಿ ಹೊಡೆದಿದ್ದಾಳೆ.

ಭಕ್ತಿನಗರದ ಗೀತಾಂಜಲಿ ಪಾರ್ಕ್ ನಿವಾಸಿಯಾದ 20ರ ಪ್ರಾಯದ ಪ್ರಿಯಾಂಕಾ ಮತ್ತು ಏರ್‌ಫೋರ್ಟ್ ರಸ್ತೆಯಲ್ಲಿರುವ ಗೀತ್ ಗುರ್ಜರಿ ಸಮಾಜದ ಹೆಟ್ ಶಾ (20) ಕಳೆದೆರಡು ವರ್ಷಗಳಿಂದ ಪರಷ್ಪರ ಪ್ರೀತಿಸುತ್ತಿದ್ದರು. ಇಬ್ಬರು ಸಿಎ ಓದುತ್ತಿದ್ದು ಟ್ಯೂಷನ್ ಕ್ಲಾಸ್‌ನಲ್ಲಿ ಇಬ್ಬರ ಪರಿಚಯವಾಗಿತ್ತು. ಶಾಗೆ ಪೈಲಟ್ ಆಗಬೇಕೆಂಬ ಕನಸು. ಬೆಂಗಳೂರಿನಲ್ಲಿರುವ ವಿಮಾನ ಚಾಲನಾ ತರಬೇತಿ ಕೇಂದ್ರದಲ್ಲಿ ಆತ ತರಬೇತಿ ಪಡೆಯಲು ಬಯಸಿದ್ದ. ಅದಕ್ಕಾಗಿ ಭಾರಿ ಪ್ರಮಾಣದ ಹಣ ಅವಶ್ಯಕತೆ ಇತ್ತು. ತನ್ನ ಮನದನ್ನನ ಕನಸು ನನಸಾಗಲು ಏನು ಮಾಡಬೇಕೆಂದು ಯೋಚನೆಗಿಳಿದ ಪ್ರಿಯಾಂಕಾಗೆ ಕೊನೆಗೆ ಹೊಳೆದ ಉಪಾಯ- ತನ್ನ ಮನೆಯಲ್ಲೇ ಕಳ್ಳತನ ಮಾಡುವುದು. ಅದಕ್ಕೆ ಪ್ರಿಯಕರನು ಕೂಡ ಸಮ್ಮತಿಸಿದ.

ನವೆಂಬರ್ 29ರಂದು ತಾಯಿ ಮತ್ತು ಅಕ್ಕ ಮನೆಯಿಂದ ಹೊರಗೆ ಹೋದಾಗ ತನ್ನ ಮನೆಯಲ್ಲಿದ್ದ 3 ಕೆಜಿ ಚಿನ್ನಾಭರಣ, 2 ಕೆಜಿ ಬೆಳ್ಳಿ ಆಭರಣ ಮತ್ತು 64,000 ರೂ ನಗದು ಸೇರಿ ಒಟ್ಟು 1 ಕೋಟಿ ಮೌಲ್ಯದ ವಸ್ತುಗಳನ್ನು ಲಪಟಾಯಿಸಿದ ಪ್ರಿಯಾಂಕಾ ಮಧ್ಯಾಹ್ನ 1.15ರ ಸುಮಾರಿಗೆ ಬೀಗ ಹಾಕಿ ಮನೆಯಿಂದ ಪಲಾಯನಗೈದಿದ್ದಾಳೆ. ಹೋಗುವ ಮುನ್ನ ತನ್ನ ಕೃತ್ಯ ಬಯಲಾಗಬಾರದೆಂದು ಮನೆಯಲ್ಲಿ ದರೋಡೆ ನಡೆದಂತೆ ಸನ್ನಿವೇಶ ಸೃಷ್ಟಿಸಿದ್ದಾಳೆ.

ಮಧ್ಯಾಹ್ನ 2.30ಕ್ಕೆ ಊಟಕ್ಕೆಂದು ಬಂದಿದ್ದ ತಂದೆ, ಉದ್ಯಮಪತಿ ಕಿಶೋರ್ ಪರಸನಾ ಮನೆಯಲ್ಲಿ ಚೆಲ್ಲಾಪಲ್ಲಿಯಾಗಿರುವುದನ್ನು ಕಂಡು ಪೊಲೀಸರಿಗೆ ಕರೆ ಮಾಡಿ ದೂರು ನೀಡಿದ್ದಾರೆ. ಆದರೆ ಡಿಸೆಂಬರ್ 1 ರಂದು ತಾಯಿ ಹಿಂತಿರುಗಿದ ಮೇಲೆಯೇ 1 ಕೋಟಿ ಅಷ್ಟು ಮೌಲ್ಯದ ವಸ್ತುಗಳು ದರೋಡೆಯಾಗಿರುವುದು ಕಂಡುಬಂದಿದೆ.

ತನಿಖೆಯನ್ನು ಕೈಗೆತ್ತಿಕೊಂಡ ಪೊಲೀಸರು ಹೊರಗಿನವರು ಮನೆಗೆ ನುಗ್ಗಿಲ್ಲವೆಂಬುದನ್ನು ಖಾತ್ರಿ ಪಡಿಸಿಕೊಂಡಿದ್ದಾರೆ. ನಕಲಿ ಕೀ ಹೊಂದಿರುವವರೇ ಬೀರುವನ್ನು ತೆರೆದಿರುವುದು ಬೆಳಕಿಗೆ ಬಂದಿದ್ದು, ಪ್ರಿಯಾಂಕಾಳನ್ನು ವಿಚಾರಣೆಗೆ ಒಳಪಡಿಸಿದಾಗ ಆಕೆಯ ಮೇಲೆಯೇ ಸಂಶಯ ಬಂದಿದೆ. ಪ್ರಿಯಾಂಕಾ ಪ್ರೀತಿಯಲ್ಲಿರುವುದು, ಘಟನೆ ನಡೆದ ದಿನವೇ ಆಕೆಯ ಪ್ರಿಯಕರ ಬೆಂಗಳೂರಿಗೆ ಪ್ರಯಾಣ ಬೆಳೆಸಿದ್ದು ತಿಳಿದ ಮೇಲೆ ಪೊಲೀಸರು ಆಕೆಯಿಂದ ಸತ್ಯ ಹೊರಹಾಕಿಸುವಲ್ಲಿ ಯಶಸ್ವಿಯಾಗಿದ್ದಾರೆ.

ಮಗಳೇ ಮನೆಯನ್ನು ದೋಚಿದ್ದಾಳೆ ಎಂದು ತಿಳಿದು ಆಘಾತಕ್ಕೊಳಗಾದ ಪೋಷಕರು ಬಿಕ್ಕಿ ಬಿಕ್ಕಿ ಅತ್ತರು.

ಪ್ರೇಮಿಗಳಿಬ್ಬರನ್ನು ಬಂಧಿಸಲಾಗಿದ್ದು, ಅವರು ದೋಚಿದ ಹಣ, ಆಭರಣಗಳನ್ನು ವಶಪಡಿಸಿಕೊಳ್ಳಲಾಗಿದೆ.