ಹಿಂಬಾಲಿಸಿ ಚುಡಾಯಿಸುತ್ತಿದ್ದವನಿಗೆ ತಕ್ಕ ಪಾಠ ಕಲಿಸಿದ ಬಾಲಕಿಯರು

ಜೈಪುರ್: ಶಾಲಾ ಬಾಲಕಿಯರ ಗುಂಪೊಂದು ತಮ್ಮ ಗೆಳತಿಗೆ ಚುಡಾಯಿಸುತ್ತಿದ್ದ ಕಾಮುಕನನ್ನು ಹಿಡಿದು ಮನಬಂದಂತೆ ಥಳಿಸಿದ ಸ್ಪೂರ್ತಿದಾಯಕ ಘಟನೆ ರಾಜಸ್ಥಾನದಲ್ಲಿ ನಡೆದಿದೆ.

ಮೂಲಗಳ ಪ್ರಕಾರ , ಜೋಧ್ಪುರದ ಚೋಪಸಾನಿ ಪ್ರದೇಶದಲ್ಲಿ ಈ ಘಟನೆ ನಡೆದಿದ್ದು, ಯುವಕನೊಬ್ಬ ಕಳೆದ ಕೆಲ ದಿನಗಳಿಂದ ಬಾಲಕಿಯೊಬ್ಬಳನ್ನು ಹಿಂಬಾಲಿಸುತ್ತಿದ್ದ. ಮಂಗಳವಾರ ಆತ ಆಕೆಯ ಕೈ ಹಿಡಿಯಲು ಪ್ರಯತ್ನಿಸಿದ್ದಾನೆ. ಹೆಚ್ಚಿನ ಪ್ರಕರಣಗಳಲ್ಲಿ ಯುವತಿ/ಬಾಲಕಿ ಇಂತಹ ದೌರ್ಜನ್ಯ ಸಹಿಸಿಕೊಂಡು ಸುಮ್ಮನಿರುತ್ತಾರೆ. ಆದರೆ ಈ ಬಾಲಕಿ ಸುಮ್ಮನಾಗಲಿಲ್ಲ. ತನ್ನ ಸ್ನೇಹಿತೆಯರೊಂದಿಗೆ ಸೇರಿಕೊಂಡು ಆತನನ್ನು ಥಳಿಸಿದ್ದಾಳೆ. ಸಾರ್ವಜನಿಕ ಸ್ಥಳದಲ್ಲಿ ನಡೆದ ಈ ಘಟನೆಯ ವೀಡಿಯೋ ಈಗ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದ್ದು ಪ್ರಶಂಸೆಗೆ ಪಾತ್ರವಾಗಿದೆ.

ಇಂತಹ ದುರುಳರನ್ನು ಎದುರಿಸಿ ಹೋರಾಡಬೇಕು ಎಂದು ನಮ್ಮ ಶಾಲೆಯಲ್ಲಿ ಹೇಳಿದ್ದಾರೆ. ನಾವು ಪ್ರತಿರೋಧ ತೋರಿದರೆ ಇಂತಹ ಘಟನೆಗಳು ಮರುಕಳಿಸುವುದಿಲ್ಲ ಎಂದು ಶಿಕ್ಷಕರು ಹೇಳಿದ್ದ ಮಾತನ್ನು ನಾವಿಲ್ಲಿ ಕಾರ್ಯರೂಪಕ್ಕೆ ತಂದಿದ್ದೇವೆ, ಎಂದು ಬಾಲಕಿ ಹೇಳಿದ್ದಾಳೆ.

ಉತ್ತರ ಪ್ರದೇಶದಲ್ಲಿ ಕೂಡ ಇತ್ತೀಚಿಗೆ ಇಂತಹದ್ದೇ ಘಟನೆ ನಡೆದಿತ್ತು. ಶಾಲಾ ಆವರಣಕ್ಕೆ ನುಗ್ಗಿ ಚುಡಾಯಿಸುತ್ತಿದ್ದ ಯುವಕನನ್ನು ಮೂವರು ವಿದ್ಯಾರ್ಥಿನಿಯರು ಹಿಡಿದು ಥಳಿಸಿದ್ದರು. ಮಹಿಳಾ ಶಿಕ್ಷಕರು ಕೂಡ ಅವರ ಸಹಾಯಕ್ಕೆ ಬಂದಿದ್ದು, ಬಳಿಕ ಆತ ಶಾಲಾ ಗೇಟ್ ಹಾರಿ ಪರಾರಿಯಾಗಿದ್ದ.