ಬಿಲ್ಕಿಸ್‌ ಬಾನೋಗೆ 50 ಲಕ್ಷ ರೂ. ಪರಿಹಾರ ನೀಡಲು ಸೂಚನೆ

ಹೊಸದಿಲ್ಲಿ: ಸಾಮೂಹಿಕ ಅತ್ಯಾಚಾರಕ್ಕೊಳಗಾಗಿದ್ದ ಸಂತ್ರಸ್ತೆ ಬಿಲ್ಕಿಸ್‌ ಬಾನೋ ಅವರಿಗೆ ಎರಡು ವಾರದೊಳಗೆ 50 ಲಕ್ಷ ರೂ. ಪರಿಹಾರ ಹಾಗೂ ಸರಕಾರಿ ಉದ್ಯೋಗ ಮತ್ತು ಅವರ ಇಚ್ಛೆಯ ಅನುಸಾರ ವಾಸಕ್ಕೆ ಮನೆ ಒದಗಿಸಿಕೊಡುವಂತೆ ಸುಪ್ರೀಂ ಕೋರ್ಟ್‌ ಸೋಮವಾರ ಗುಜರಾತ್‌ ಸರಕಾರಕ್ಕೆ ನಿರ್ದೇಶನ ನೀಡಿದೆ. 2002ರ ಗುಜರಾತ್‌ ಗಲಭೆ ಸಂದರ್ಭದಲ್ಲಿಗುಂಪೊಂದು ಬಿಲ್ಕಿಸ್‌ ಬಾನೋ ಅವರ ಮನೆ ಮೇಲೆ ದಾಳಿ ನಡೆಸಿತ್ತು. ಈ ವೇಳೆ ಐದು ತಿಂಗಳ ಗರ್ಭಿಣಿಯಾಗಿದ್ದ ಅವರ ಮೇಲೆ ಸಾಮೂಹಿಕ ಅತ್ಯಾಚಾರ ನಡೆದಿತ್ತು. ಈ ಪ್ರಕರಣದಲ್ಲಿಗುಜರಾತ್‌ ಸರಕಾರ ಘೋಷಿಸಿದ್ದ 5 ಲಕ್ಷ ರೂ. ಪರಿಹಾರ ಸಾಕಾಗದು ಎಂದು ಹೇಳಿ, ಹೆಚ್ಚಿನ ಪರಿಹಾರ ಕೋರಿ ಬಿಲ್ಕಿಸ್‌ ಬಾನೋ ಅವರು ಸಲ್ಲಿಸಿದ್ದ ಅರ್ಜಿ ವಿಚಾರಣೆ ನಡೆಸಿದ ಸಿಜೆಐ ರಂಜನ್‌ ಗೊಗೋಯ್‌ ನೇತೃತ್ವದ ನ್ಯಾಯಪೀಠವು, ''ಕಳೆದ ಏಪ್ರಿಲ್‌ 23ರಂದೇ ನ್ಯಾಯಾಲಯ ಪರಿಹಾರ ಹಾಗೂ ಉದ್ಯೋಗ ಹಾಗೂ ವಸತಿ ಒದಗಿಸುವಂತೆ ತೀರ್ಪು ನೀಡಿದ್ದರೂ ಅದನ್ನು ಇಲ್ಲಿಯವರೆಗೂ ಏಕೆ ಪಾಲಿಸಿಲ್ಲ,'' ಎಂದು ಗುಜರಾತ್‌ ಸರಕಾರದ ಪರ ವಕೀಲ ಸಾಲಿಸಿಟರ್‌ ಜನರಲ್‌ ತುಷಾರ್‌ ಮೆಹ್ತಾ ಅವರನ್ನು ಪ್ರಶ್ನಿಸಿತು. ಏ.23ರ ತೀರ್ಪು ಮರು ಪರಿಶೀಲನೆ ಸಂಬಂಧ ಗುಜರಾತ್‌ ಸರಕಾರ ಮೇಲ್ಮನವಿ ಸಲ್ಲಿಸಲಿದೆ ಎಂಬ ವಿಚಾರವನ್ನು ಮೆಹ್ತಾ ನ್ಯಾಯಾಲಯದ ಮುಂದೆ ಪ್ರಸ್ತಾಪಿಸಿದಾಗ ನ್ಯಾಯಪೀಠವು, ''ಮೊದಲು ಬಾನೋ ಅವರಿಗೆ ಎರಡು ವಾರದೊಳಗೆ ಪರಿಹಾರ ನೀಡಿ,'' ಎಂದು ಸೂಚಿಸಿತು.