ವೈನ್ ಕುಡಿಯೋದು, ಗಾಲ್ಫ್ ಆಡೋದಷ್ಟೇ ರಾಜ್ಯಪಾಲರ ಕೆಲಸ: ಸತ್ಯಪಾಲ್!

ಬಾಗ್ಪಟ್: ಜಮ್ಮು ಮತ್ತು ಕಾಶ್ಮೀರಕ್ಕೆ ರಾಜ್ಯಪಾಲರಾಗಿ ನೇಮಕಗೊಳ್ಳುವವರಿಗೆ ಏನು ಕೆಲಸವಿರುವುದಿಲ್ಲ. ಸಾಮಾನ್ಯವಾಗಿ ರಾಜ್ಯಪಾಲರು ನಿತ್ಯವೂ ವೈನ್ ಕುಡಿಯುತ್ತಾ, ಗಾಲ್ಫ್ ಆಡುತ್ತಾ ಕಾಲ ಕಳೆಯುತ್ತಾರೆ ಎಂದು ಗೋವಾ ರಾಜ್ಯಪಾಲ ಸತ್ಯಪಾಲ್ ಮಲಿಕ್ ಹೇಳಿದ್ದಾರೆ.

ಸ್ವತಃ ಜಮ್ಮು ಮತ್ತು ಕಾಶ್ಮೀರದ ರಾಜ್ಯಪಾಲರಾಗಿ ಸೇವೆ ಸಲ್ಲಿಸಿರುವ ಸತ್ಯಪಾಲ್ ಮಲಿಕ್, ಕಣಿವೆಯಂತ ಸೂಕ್ಷ್ಮ ಪ್ರದೇಶದ ರಾಜ್ಯಪಾಲರ ಜವಾಬ್ದಾರಿಗಳ ಕುರಿತು ಕ್ಷುಲ್ಲಕವಾಗಿ ಮಾತನಾಡಿರುವುದು ಆಶ್ಚರ್ಯ ತಂದಿದೆ.

ಭಾರತದ ರಾಜಕಾರಣದಲ್ಲಿ ರಾಜ್ಯಪಾಲರ ಹುದ್ದೆ ಅಷ್ಟೇನೂ ಮಹತ್ವದ್ದಲ್ಲ. ಜಮ್ಮು ಮತ್ತು ಕಾಶ್ಮೀರಕ್ಕೆ ರಾಜ್ಯಪಾಲರಾಗಿ ನೇಮಕಗೊಳ್ಳುವವರು ಸಾಮಾನ್ಯವಾಗಿ ವೈನ್ ಕುಡಿಯುತ್ತಾ, ಗಾಲ್ಫ್ ಆಡುತ್ತಾ ದಿನ ದೂಡುತ್ತಾರೆ ಎಂದು ಮಲಿಕ್ ಹೇಳಿದ್ದಾರೆ.


ಉತ್ತರಪ್ರದೇಶದಲ್ಲಿ ಸಮಾರಂಭವೊಂದರಲ್ಲಿ ಮಾತನಾಡಿದ ಮಲಿಕ್, ರಾಜ್ಯಪಾಲರಿಗೇನು ಕೆಲಸವಿರುತ್ತದೆ? ಹೆಚ್ಚೆಂದರೆ ರಾಜ್ಯಕ್ಕೆ ಬರುವ ಗಣ್ಯ ಅತಿಥಿಗಳನ್ನು ಸ್ವಾಗತಿಸುವುದಷ್ಟೇ ಅವರ ಕೆಲಸ ಎಂದು ಹೇಳಿ ಅಚ್ಚರಿ ಮೂಡಿಸಿದ್ದಾರೆ.

ರಾಜ್ಯಪಾಲರ ಹುದ್ದೆಗೆ 'ಪವರ್‌' ಇಲ್ಲ, ಅತ್ಯಂತ ದುರ್ಬಲ, ಸುದ್ದಿಗೋಷ್ಠಿ ನಡೆಸಲು ಸಾಧ್ಯವಿಲ್ಲ: ಸತ್ಯಪಾಲ್‌ ಮಲಿಕ್‌

ಸತ್ಯಪಾಲ್ ಮಲ್ಲಿಕ್ ಅವರ ಹೇಳಿಕೆಯನ್ನು ಖಂಡಿಸಿರುವ ಪ್ರತಿಪಕ್ಷಗಳು, ಹಾಗಾದರೆ ಕಣಿವೆಯಂತ ಸೂಕ್ಷ್ಮ ರಾಜ್ಯದ ರಾಜ್ಯಪಾಲರಾಗಿದ್ದಾಗ ಅತ್ಯಪಾಲ್ ಮಲಿಕ್ ಇದನ್ನಷ್ಟೇ ಮಾಡಿದ್ದಾರೆ ಎಂದಾಯ್ತು ಎಂದು ಹರಿಹಾಯ್ದಿವೆ.

ಸತ್ಯಪಾಲ್ ಮಲಿಕ್ ಈ ಹಿಂದೆಯೂ ಹಲವು ವಿವಾದಾತ್ಮಕ ಹೇಳಿಕೆಗಳನ್ನು ನೀಡಿ ಸುದ್ದಿಯಾಗಿದ್ದರು. ಕಣಿವೆಯಲ್ಲಿ ನಿರ್ಬಂಧ ಹೇರಿದ್ದಾಗ ರಾಜ್ಯಕ್ಕೆ ಬರಲು ಬಿಡುತ್ತಿಲ್ಲ ಎಂದ ರಾಹುಲ್ ಗಾಂಧಿ ಅವರನ್ನು ತಾವೇ ಸ್ವತಃ ವಿಶೇಷ ವಿಮಾನದಲ್ಲಿ ಕೊಂಡೊಯ್ಯವುದಾಗಿ ಸತ್ಯಪಾಲ್ ಮಲಿಕ್ ಹೇಳಿದ್ದನ್ನು ಇಲ್ಲಿ ಸ್ಮರಿಸಬಹುದು.