ಶತಾಯುಷಿ ಪಾಕ ಪ್ರವೀಣೆ ಮಸ್ತಾನಮ್ಮ ನಿಧನ

ಹೈದರಾಬಾದ್‌: ಅಪ್ಪಟ ನಾಟಿ ಶೈಲಿಯ ಅಡುಗೆಗಳನ್ನು ಮಾಡುತ್ತ ಯೂಟ್ಯೂಬ್‌ ವಿಡಿಯೊಗಳ ಮೂಲಕ ಲಕ್ಷಾಂತರ ಖಾದ್ಯಪ್ರಿಯರ ಮನಗೆದ್ದಿದ್ದ 107 ವರ್ಷದ ಕಾರೆ ಮಸ್ತಾನಮ್ಮ ಬುಧವಾರ ಆಂಧ್ರ ಪ್ರದೇಶದ ಗುಂಟೂರು ಗ್ರಾಮದಲ್ಲಿ ನಿಧನ ಹೊಂದಿದ್ದಾರೆ. ಕೇವಲ 2 ವರ್ಷದಲ್ಲಿ ಇವರು ದೇಶದ ಅತಿ ಹಿರಿಯ ಯೂಟ್ಯೂಬ್‌ ಸ್ಟಾರ್‌ ಎನಿಸಿಕೊಂಡಿದ್ದರು.
ಇವರ ವಿಡಿಯೊಗಳು ಮಾಂಸ ಪ್ರಿಯರಿಗೆ ಭಾರಿ ಮೋಡಿ ಮಾಡಿದ್ದವು. ಯೂಟ್ಯೂಬ್‌ನಲ್ಲಿ 'ಮಾಸ್ತಾನಮ್ಮ ಚಾನೆಲ್‌' ಕೇವಲ ಎರಡು ವರ್ಷದಲ್ಲಿ 12 ಲಕ್ಷ ಜನ ಚಂದಾದಾರರನ್ನು ಹೊಂದಿದೆ. 11ನೇ ವರ್ಷದಲ್ಲಿ ಮದುವೆಯಾಗಿ, 22ನೇ ವರ್ಷದಲ್ಲಿ ವಿಧವೆಯಾದರು. ಇವರ ಐದು ಮಕ್ಕಳ ಪೈಕಿ ನಾಲ್ವರನ್ನು ಕಾಲರಾ ಬಲಿಪಡೆಯಿತು.
ಇಷ್ಟೊಂದು ನೋವಿನಲ್ಲೂ ಎದೆಗುಂದದೇ ದಿನಗೂಲಿ ಕಾರ್ಮಿಕರಾಗಿ ಜೀವನ ನಡೆಸಿದರು. ಸದ್ಯ ಮಸ್ತಾನಮ್ಮ ಯೂಟ್ಯೂಬ್‌ ಚಾನೆಲ್‌ಅನ್ನು ಅವರ ಮೊಮ್ಮಗ ಲಕ್ಷ್ಮಣ್‌ ಹಾಗೂ ಶ್ರೀಕಾಂತ್‌ ನೋಡಿಕೊಳ್ಳುತ್ತಿದ್ದಾರೆ.