91 ಸ್ವಘೋಷಿತ ಸುಸ್ತಿದಾರರಿಗೆ ಕಂಟಕ

ಹೊಸದಿಲ್ಲಿ: ವಿಜಯ್‌ ಮಲ್ಯ, ನೀರವ್‌ ಮೋದಿಯರಂತಹ ವಂಚನೆ ಪ್ರಕರಣದಿಂದ ಎಚ್ಚೆತ್ತಿರುವ ಸರಕಾರ ಇದೀಗ 91 ಸ್ವಘೋಷಿತ ಸುಸ್ಥಿದಾರರನ್ನು ಗುರುತಿಸಿದ್ದು, ಇವರೆಲ್ಲರನ್ನು ದೇಶಬಿಟ್ಟು ತೆರಳದಂತೆ ಸೂಕ್ತ ಕ್ರಮ ಕೈಕೊಳ್ಳಲು ಮುಂದಾಗಿದೆ.

ಅಧಿಕೃತ ಮಾಹಿತಿಗಳ ಪ್ರಕಾರ, ಸರಕಾರ ಈಗಾಗಲೇ 400ಕ್ಕೂ ಅಧಿಕ ಕಂಪನಿಗಳನ್ನು ಹಾಗು 91 ವ್ಯಕ್ತಿಗಳನ್ನು ಗುರುತಿಸಿದ್ದು, ಇವರೆಲ್ಲರೂ ಬ್ಯಾಂಕ್‌ನಿಂದ ಸಾಲ ಪಡೆದಿದ್ದು, ಆದರೆ ಹಿಂತಿರುಗಿಸಲಾಗದೆ ಸ್ವಘೋಷಿತ ಸುಸ್ಥಿದಾರರ ಪಟ್ಟಿಗೆ ಸೇರಿದ್ದಾರೆ. ಹೀಗಾಗಿ ಇವರ ವಿರುದ್ಧದ ಕ್ರಮಕ್ಕೆ ಮುಂದಾದ ಸರಕಾರ ಇವರೆಲ್ಲರನ್ನು ದೇಶ ಬಿಟ್ಟು ತೆರಳದಂತೆ ಸೂಕ್ತ ಕ್ರಮ ತೆಗೆದುಕೊಳ್ಳಲು ನಿರ್ಧರಿಸಿದೆ ಎಂದು ಹೇಳಿದ್ದಾರೆ.

ಪಂಜಾಬ್‌ ನ್ಯಾಷನಲ್‌‌ ಬ್ಯಾಂಕ್‌‌ಗೆ ವಜ್ರಾಭರಣದ ವ್ಯಾಪಾರಿಗಳಾದ ನೀರವ್ ಮೋದಿ ಹಾಗೂ ಮೆಹುಲ್‌ 12,600 ಕೋಟಿ ರೂಪಾಯಿ ವಂಚಿಸಿ ದೇಶ ತೊರೆದಿದ್ದಾರೆ. ಮತ್ತೊಂದು ಪ್ರಕರಣದಲ್ಲಿ ವಿವಿಧ ರಾಷ್ಟ್ರೀಯ ಬ್ಯಾಂಕ್ ಗಳಿಂದ ಸಾವಿರಾರು ಕೋಟಿ ರುಪಾಯಿ ಸಾಲ ಪಡೆದು ಲಂಡನ್ ನಲ್ಲಿ ತಲೆಮರೆಸಿಕೊಂಡಿದ್ದಾರೆ.

ಈ ಎಲ್ಲಾ ಬೆಳವಣಿಗೆಗಳ ಬಳಿಕ ಸಾರ್ವಜನಿಕರೂ ಕೂಡಾ ಸರಕಾರದ ವಿರುದ್ಧ ಚೀಮಾರಿ ಹಾಕಿದ್ದರು. ಅಲ್ಲದೇ ಸಾಮಾಜಿಕ ಜಾಲತಾಣದಲ್ಲೂ ಸರಕಾರದ ವಿರುದ್ಧ ಆಕ್ರೋಶ ವ್ಯಕ್ತವಾಗಿತ್ತು.