ಉದ್ಯಮ ಸ್ನೇಹ ಭಾರತ: ಟಾಪ್‌ 50ಗೆ ಬರಲು ಕೇಂದ್ರದ ಸುಧಾರಣೆ ಕ್ರಮ

ಮುಂಬೈ: ಉದ್ಯಮ ಸ್ನೇಹ ದೇಶಗಳ ಪೈಕಿ ಭಾರತ ಅತ್ಯಂತ ಪ್ರಗತಿ ಸಾಧಸಿದೆ ಎಂಬ ವಿಶ್ವಬ್ಯಾಂಕ್‌ ವರದಿಯಿಂದ ಉತ್ತೇಜನಗೊಂಡಿರುವ ಕೇಂದ್ರ ಸರಕಾರ ಈಗ ಮತ್ತೊಂದು ಗುರಿ ಹೊಂದಿದೆ.

ಈ ಪಟ್ಟಿಯಲ್ಲಿ ಭಾರತ ಸದ್ಯ 100ನೇ ಸ್ಥಾನದಲ್ಲಿದೆ. ಮುಂದಿನ ದಿನಗಳಲ್ಲಿ ಟಾಪ್‌ 50ಯೊಳಗೆ ಸ್ಥಾನ ಗಿಟ್ಟಿಸುವುದೇ ನಮ್ಮ ಗುರಿ. ಈ ಹಿನ್ನೆಲೆಯಲ್ಲಿ ಸುಧಾರಣಾ ಕ್ರಮಗಳನ್ನು ಕೈಗೊಳ್ಳಲಾಗುವುದು ಎಂದು ಕೈಗಾರಿಕೆ ನೀತಿ ಮತ್ತು ಉತ್ತೇಜನ ಇಲಾಖೆ ಕಾರ್ಯದರ್ಶಿ ರಮೇಶ್‌ ಅಭಿಷೇಕ್‌ ತಿಳಿಸಿದ್ದಾರೆ.

ಈ ವರ್ಷ ಒಟ್ಟಾರೆ 122 ಸುಧಾರಣಾ ಕ್ರಮಗಳನ್ನು ಕೈಗೊಂಡಿದ್ದೇವೆ. ಮುಂದಿನ ದಿನಗಳಲ್ಲಿ ಇನ್ನಷ್ಟು ಸುಧಾರಣಾ ಕ್ರಮಗಳನ್ನು ಅನುಸರಿಸಲಿದ್ದೇವೆ. ಒಟ್ಟಾರೆ 200ಕ್ಕೂ ಹೆಚ್ಚು ಸುಧಾರಣಾ ಕ್ರಮಗಳನ್ನು ಕೈಗೊಳ್ಳುವ ಮೂಲಕ ನಮ್ಮ ಗುರಿ ತಲುಪಲು ಪ್ರಯತ್ನಿಸುತ್ತೇವೆ ಎಂದು ರಮೇಶ್‌ ವಿವರಿಸಿದ್ದಾರೆ.

ವಿಶ್ವ ಬ್ಯಾಂಕ್‌ ರ‍್ಯಾಂಕಿಂಗ್‌ನಲ್ಲಿ ಭಾರತ ಗಣನೀಯ ಪ್ರಗತಿ ಸಾಧಿಸಿದೆ. ಒಂದೇ ಬಾರಿ 30 ಸ್ಥಾನವನ್ನೂ ಇದುವರೆಗೂ ಯಾವ ದೇಶ ಜಿಗಿದಿಲ್ಲ. ಆದರೆ ಭಾರತದ ಸಾಧನೆಗೆ ವಿಶ್ವಬ್ಯಾಂಕ್‌ ಹಾಗೂ ವಿಶ್ವಸಂಸ್ಥೆ ಕೂಡ ಮೆಚ್ಚುಗೆ ವ್ಯಕ್ತಪಡಿಸಿದೆ.

ಉದ್ಯಮ ಸ್ನೇಹ ದೇಶ: ಭಾರತಕ್ಕೆ 100ನೇ ಸ್ಥಾನ

ಈ ನಿಟ್ಟಿನಲ್ಲಿ ಎಲ್ಲ ಇಲಾಖೆಗಳಿಗೆ, ರಾಜ್ಯಗಳಿಗೂ ಮನವಿ ಮಾಡಲಾಗಿದೆ. ಅತಿ ಶೀಘ್ರದಲ್ಲೇ ಸುಧಾರಣಾ ಕ್ರಮಗಳು ಅನುಷ್ಠಾನಕ್ಕೆ ಬರಲಿವೆ ಎಂದು ಅಭಿಷೇಕ್‌ ವಿವರಿಸಿದ್ದಾರೆ.

Government, World Bank working on 200 reforms to push India into top 50 in rankings