ರುಚಿ, ವಾಸನೆ ಗ್ರಹಣ ಶಕ್ತಿ ನಾಶವೂ ಕೊರೊನಾ ಲಕ್ಷಣ: ರಾಷ್ಟ್ರೀಯ ಕಾರ್ಯಪಡೆ

ಹೊಸದಿಲ್ಲಿ: ಬಾಯಿ ರುಚಿ ಮತ್ತು ವಾಸನೆ ಗ್ರಹಿಕೆಯನ್ನು ಇದ್ದಕಿದ್ದಂತೆ ಕಳೆದುಕೊಳ್ಳುವುದು ಕೂಡ ಕೊರೊನಾ ಸೋಂಕಿನ ಲಕ್ಷಣವಾಗಿದೆ ಎಂದು ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ. ದೇಶಾದ್ಯಂತ ಕೊರೊನಾ ಪ್ರಸರಣ ಹೆಚ್ಚುತ್ತಿರುವ ಹಿನ್ನೆಲೆಯಲ್ಲಿ ಶುಕ್ರವಾರ ನಡೆದ ರಾಷ್ಟ್ರೀಯ ಕಾರ್ಯಪಡೆ (ಎನ್‌ಟಿಎಫ್‌) ಸಭೆಯಲ್ಲಿ ಈ ಅಭಿಮತ ವ್ಯಕ್ತವಾಗಿದೆ.

ಸಭೆಯಲ್ಲಿ ಭಾಗವಹಿಸಿದ್ದ ಕೆಲವು ತಜ್ಞರು, ''ಹಲವು ಸೋಂಕಿತರು ಆಸ್ಪತ್ರೆಗಳಲ್ಲಿ ನೀಡಿರುವ ದಾಖಲೆಗಳಲ್ಲಿ ಈ ಬಗ್ಗೆ ಉಲ್ಲೇಖವಿದೆ. ಹಾಗಾಗಿ ಸರಕಾರ ಕೋವಿಡ್‌-19 ಸೋಂಕಿನ ಸಾಮಾನ್ಯ ಲಕ್ಷಣಗಳಲ್ಲಿ ಇವೆರಡನ್ನೂ ಕೂಡ ಸೇರಿಸಬೇಕು. ಇಂತಹ ಲಕ್ಷಣ ಕಾಣಿಸಿಕೊಂಡರೆ ಕಡ್ಡಾಯವಾಗಿ ಕೊರೊನಾ ಟೆಸ್ಟ್‌ ಮಾಡಿಸಿಕೊಳ್ಳಲು ಸೂಚಿಸಬೇಕು,'' ಎಂದು ಸಲಹೆ ಮಾಡಿದರು.

ಕೆಲವರು ''ರುಚಿ, ವಾಸನೆ ಗ್ರಹಿಕೆ ಕಳೆದುಕೊಳ್ಳುವುದು ಇತರ ರೋಗಗಳ ಲಕ್ಷಣವೂ ಆಗಿರುವುದರಿಂದ ಸೋಂಕಿತರಿಗೆ ಗೊಂದಲ ಉಂಟಾಗಬಹುದು,'' ಎಂಬ ಅಭಿಪ್ರಾಯ ವ್ಯಕ್ತಪಡಿಸಿದರು. ಹೀಗಾಗಿ ಈ ಎರಡು ಲಕ್ಷಣಗಳ ಬಗ್ಗೆ ಸಮಗ್ರ ಅಧ್ಯಯನಕ್ಕೆ ತಜ್ಞರ ಸಮಿತಿ ರಚಿಸಲು ತೀರ್ಮಾನಿಸಲಾಯಿತು.

'ರಾತ್ರಿ ಸಂಚಾರ ನಿಷೇಧ ಕಟ್ಟುನಿಟ್ಟಾಗಿ ಜಾರಿ ಮಾಡಿ': ರಾಜ್ಯಗಳಿಗೆ ಗೃಹ ಸಚಿವಾಲಯ ಪತ್ರ

ಭಾರತೀಯ ವೈದ್ಯಕೀಯ ಸಂಶೋಧನಾ ಪರಿಷತ್‌ (ಐಸಿಎಂಆರ್‌) ಮಾರ್ಗಸೂಚಿಗಳ ಪ್ರಕಾರ ಸದ್ಯಕ್ಕೆ ಇನ್‌ಫ್ಲುಯೆಂಜಾ ಮಾದರಿ ಅನಾರೋಗ್ಯ ಇದ್ದರೆ ಕೊರೊನಾ ಟೆಸ್ಟ್‌ ಮಾಡಿಸಿಕೊಳ್ಳುವುದು ಕಡ್ಡಾಯವಾಗಿದೆ. ಇನ್ನು ಲಕ್ಷಣ ರಹಿತರು 5ನೇ ಮತ್ತು 10ನೇ ದಿನ ಪರೀಕ್ಷೆ ಮಾಡಿಸಬೇಕಿದೆ.

ದೇಶದಲ್ಲಿ ಕೈ ಮೀರಿದ ಕೊರೊನಾ; ಜೂನ್‌ 16, 17ಕ್ಕೆ ಸಿಎಂಗಳ ಸಭೆ ಕರೆದ ಪ್ರಧಾನಿ ಮೋದಿ

ತೀವ್ರ ಉಸಿರಾಟದ ತೊಂದರೆ, ಶ್ವಾಸಕೋಶದ ಸೋಂಕಿರುವವರು ಕೂಡ ಕೊರೊನಾ ಟೆಸ್ಟ್‌ ಮಾಡಿಸಿಕೊಳ್ಳಬೇಕು. ಅಮೆರಿಕದ ನ್ಯಾಷನಲ್‌ ಪಬ್ಲಿಕ್‌ ಹೆಲ್ತ್‌ ಇನ್‌ಸ್ಟಿಟ್ಯೂಟ್‌ನ ರೋಗ ನಿಯಂತ್ರಣ ವಿಭಾಗವು ಮೇ ತಿಂಗಳಲ್ಲಿಯೇ ದಿಢೀರ್‌ ರುಚಿ ಮತ್ತು ವಾಸನೆ ಗ್ರಹಿಸುವ ಶಕ್ತಿ ಕಳೆದುಕೊಳ್ಳುವುದೂ ಕೊರೊನಾ ಲಕ್ಷಣಗಳು ಎಂದು ಘೋಷಿಸಿದೆ.