ಮುಕೇಶ್‌ ಹಾಡುಗಳ ಅಭಿಮಾನಿ ನವಾಜ್‌ ಷರೀಫ್‌

ಲಾಹೋರ್‌: ಬಾಲಿವುಡ್‌ನ ಹಳೆಯ ಹಿಂದಿ ಚಲನಚಿತ್ರ ಗೀತೆಗಳನ್ನು ಆಲಿಸುವುದನ್ನು ಇಷ್ಟಪಡುವ ಪಾಕ್‌ ಮಾಜಿ ಪ್ರಧಾನಿ ನವಾಜ್‌ ಷರೀಫ್‌ಗೆ ಗಾಯಕ ಮುಕೇಶ್‌ ಅವರ ಗೀತೆಗಳ ಸಂಗ್ರಹದ ಜತೆಗೆ ಒಂದು ಟೇಪ್‌ರೆಕಾರ್ಡರ್‌ ನೀಡುತ್ತೇನೆ ಎಂದು ಪಾಕ್‌ ರೈಲ್ವೆ ಸಚಿವ ಶೇಖ್‌ ರಶೀದ್‌ ಹೇಳಿದ್ದಾರೆ.

ಜುಲೈನಲ್ಲಿಅಮೆರಿಕದ ಪ್ರವಾಸದ ವೇಳೆ ಪಾಕ್‌ ಪ್ರಧಾನಿ ಇಮ್ರಾನ್‌ ಖಾನ್‌, ತಾವು ಪಾಕ್‌ಗೆ ಹಿಂದಿರುಗಿದ ಕೂಡಲೇ ನವಾಜ್‌ ಷರೀಫ್‌ಗೆ ಜೈಲಿನಲ್ಲಿಏರ್‌ ಕಂಡೀಷನರ್‌ ಅಥವಾ ಟಿವಿಯ ಸೌಲಭ್ಯ ನೀಡದಂತೆ ಎಚ್ಚರಿಕೆ ವಹಿಸುತ್ತೇನೆ ಎಂದು ಗುಡುಗಿದ್ದರು.
ಇದಕ್ಕೆ ಸುದ್ದಿಗಾರರು ಸಚಿವ ರಶೀದ್‌ ಅವರಿಂದ ಪ್ರತಿಕ್ರಿಯೆ ಕೇಳಿದಾಗ, ''ಏರ್‌ಕಂಡೀಷನರ್‌ ಜತೆಗೆ ಮುಕೇಶ್‌ ಅವರ ಗೀತೆಗಳನ್ನು ಕೇಳಿಸಲು ಅವಕಾಶ ಮಾಡಿಕೊಡಲಾಗುವುದು,'' ಎಂದಿದ್ದಾರೆ. ಅಲ್‌ ಅಜೀಜಿಯಾ ಸ್ಟೀಲ್‌ ಮಿಲ್ಸ್‌ ಪ್ರಕರಣದಲ್ಲಿ7 ವರ್ಷ ಜೈಲು ಶಿಕ್ಷೆಗೆ ಗುರಿಯಾಗಿರುವ ನವಾಜ್‌ 2018ರ ಡಿಸೆಂಬರ್‌ 24ರಿಂದ ಕೋಟ್‌ ಲಾಖ್‌ಪತ್‌ ಕಾರಾಗೃಹದಲ್ಲಿದ್ದಾರೆ.