ಜಿಎಸ್‌ಟಿ ವ್ಯಾಪ್ತಿಗೆ ಪೆಟ್ರೋಲ್‌?

ಹೊಸದಿಲ್ಲಿ: ಡೀಸೆಲ್‌ ಮತ್ತು ಪೆಟ್ರೋಲಿಯಂ ಉತ್ಪನ್ನಗಳನ್ನು ಜಿಎಸ್‌ಟಿ ವ್ಯಾಪ್ತಿಗೆ ತರಬೇಕು ಎನ್ನುವ ದೀರ್ಘಕಾಲದ ಬೇಡಿಕೆಯ ಬಗ್ಗೆ ಗುರುವಾರದ(ಜು.25) ಜಿಎಸ್‌ಟಿ ಮಂಡಳಿ ಸಭೆಯಲ್ಲಿ ಚರ್ಚೆ ನಡೆಯುವ ಸಾಧ್ಯತೆಗಳಿವೆ.

ಚರ್ಚೆ ನಡೆದರೂ ದೃಢವಾದ ತೀರ್ಮಾನವು ಸದ್ಯದಲ್ಲಿಯೇ ಹೊರಬರುವ ನಿರೀಕ್ಷೆಗಳಿಲ್ಲ. ಪೆಟ್ರೋಲ್‌, ಡೀಸೆಲ್‌ಗಳು ಬೊಕ್ಕಸಕ್ಕೆ ಹೆಚ್ಚಿನ ಆದಾಯ ತರುವ ಮೂಲಗಳಾಗಿದ್ದು, ಇವುಗಳನ್ನು ಜಿಎಸ್‌ಟಿ ವ್ಯಾಪ್ತಿಗೆ ತರಲು ರಾಜ್ಯಗಳೂ ಸಮ್ಮತಿಸುವುದು ಕಷ್ಟ.

ಗುರುವಾರದ ಜಿಎಸ್‌ಟಿ ಮಂಡಳಿ ಸಭೆಯಲ್ಲಿ ಎಲೆಕ್ಟ್ರಿಕ್‌ ವಾಹನಗಳ(ಇ-ವಾಹನ) ಮೇಲಿನ ಜಿಎಸ್‌ಟಿಯನ್ನು ಶೇ.12ರಿಂದ ಶೇ.5ಕ್ಕೆ ಇಳಿಸುವ ಪ್ರಸ್ತಾವನೆಗಳೂ ಇವೆ. ಇದೇ ರೀತಿ ಸೌರಶಕ್ತಿ ಸಾಧನಗಳ ಮೇಲಿನ ಜಿಎಸ್‌ಟಿ ಹೊರೆಯೂ ತಗ್ಗುವ ನಿರೀಕ್ಷೆ ಇದೆ.

ಇ-ವಾಹನಗಳು, ಇ-ವಾಹನಗಳ ಚಾರ್ಜರ್‌ಗಳ ದರ ಕಡಿತದ ಪ್ರಸ್ತಾವನೆಗಳ ಬಗೆಗೆ ಕಳೆದ ಸಭೆಯಲ್ಲಿ ಚರ್ಚೆಯಾಗಿತ್ತು. ತೆರಿಗೆ ದರ ಕಡಿತದ ಪ್ರಸ್ತಾವನೆಗಳನ್ನು ಸಂಬಂಧಿಸಿದ ಸಮಿತಿಗೆ ಸಲ್ಲಿಸಲಾಗಿತ್ತು. ಈ ಸಲದ ಸಭೆಯಲ್ಲಿ ಎಲೆಕ್ಟ್ರಿಕ್‌ ಬಸ್‌ಗಳಿಗೆ ಜಿಎಸ್‌ಟಿ ವಿನಾಯಿತಿ ನೀಡುವ ಬಗೆಗೆ, ವಾರ್ಷಿಕ ರಿಟರ್ನ್ಸ್‌ ದಾಖಲಿಸುವಾಗ ತೆರಿಗೆದಾರರು ಎದುರಿಸುವ ಸಮಸ್ಯೆಗಳ ಕುರಿತಾಗಿಯೂ ಚರ್ಚೆಗಳು ನಡೆಯುವ ಸಾಧ್ಯತೆಗಳಿವೆ.