ಚೆನ್ನೈ: ಮುಖ್ಯಮಂತ್ರಿ ಎಡಪ್ಪಾಡಿ ಪಳನಿಸ್ವಾಮಿ ನೇತೃತ್ವದ ತಮಿಳುನಾಡು ಸರಕಾರ ಚಲನಚಿತ್ರದ ಮೇಲೆ ಜಿಎಸ್ಟಿ ತೆರಿಗೆಯ ಜತೆ ಶೇ.30ರಷ್ಟು ಹೊಸ ತೆರಿಗೆ ಹೇರಲು ತೀರ್ಮಾನಿಸಿರುವುದನ್ನು ಪ್ರತಿಭಟಿಸಿ ಸಿನೆಮಾ ಮಂದಿರಗಳ ಮಾಲೀಕರು ಅನಿರ್ದಿಷ್ಟಾವಧಿ ಮುಷ್ಕರ ಹೂಡಲು ನಿರ್ಧರಿಸಿದ್ದಾರೆ. ಈ ಹಿನ್ನೆಲೆಯಲ್ಲಿ ಸೋಮವಾರ ತಮಿಳುನಾಡಿನಾದ್ಯಂತ 1,100 ಸಿನೆಮಾ ಮಂದಿರಗಳು ಬಂದ್ ಆಗಲಿವೆ.
ಶೇ.28ರಷ್ಟು ಜಿಎಸ್ಟಿ ತೆರಿಗೆಯ ಜತೆ ಶೇ.30ರಷ್ಟು ಮುನ್ಸಿಪಲ್ ತೆರಿಗೆ ಸೇರಿಕೊಳ್ಳುವುದರಿಂದ ಒಟ್ಟಾರೆ ತೆರಿಗೆಯ ಪ್ರಮಾಣ ಶೇ.58ರಷ್ಟಾಗುತ್ತದೆ. ಆಗ ಪ್ರತೀ ಟಿಕೆಟ್ ಬೆಲೆ 100 ರೂಪಾಯಿಗೂ ಮೀರುತ್ತದೆ. ಇದು ಪ್ರೇಕ್ಷಕರಿಗೆ ದೊಡ್ಡ ಹೊರೆ ಎನಿಸುವುದರಿಂದ ಥಿಯೇಟರ್ಗಳ ಮಾಲೀಕರು ಮುಷ್ಕರ ಹೂಡಲು ತೀರ್ಮಾನಿಸಿರುವುದು.