ತೆರಿಗೆ ವಂಚನೆ ಪತ್ತೆ: ಐಟಿ ಇಲಾಖೆಗೆ ಇಸ್ರೊ ನೆರವಾಗಿದ್ದು ಹೇಗೆ?

ಅಹ್ಮದಾಬಾದ್‌: ಇಸ್ರೊ ಕೇವಲ ಉಪಗ್ರಹ ಉಡಾವಣೆ ಸೇರಿದಂತೆ ಬಾಹ್ಯಕಾಶಕ್ಕೆ ಸಂಬಂಧಿಸಿದ ಚಟುವಟಿಕೆ, ಸಾಧನೆಗಳಿಗೆ ಮೀಸಲು ಅಂದುಕೊಂಡರೆ ಅದು ತಪ್ಪು. ಇಸ್ರೊ ತೆರಿಗೆ ವಂಚಕರ ಪತ್ತೆಗೂ ತೆರಿಗೆ ಇಲಾಖಾಧಿಕಾರಿಗಳಿಗೆ ಸಹಕರಿಸುತ್ತದೆ.

ಸಾಮಾನ್ಯವಾಗಿ ಕೃಷಿ ಭೂಮಿಯನ್ನು ಮಾರುವ ಮೊದಲು ಕನಿಷ್ಠ ಎರಡು ವರ್ಷವಾದರೂ ಕೃಷಿ ಮಾಡಿದರೆ ಮಾರಿದಾಗ ಸಿಗುವ ಮೊತ್ತಕ್ಕೆ ತೆರಿಗೆ ವಿನಾಯಿತಿ ಇರುತ್ತದೆ. ಹೀಗೆ ಭೂಮಿ ಮಾರಾಟ ಮಾಡಿದ್ದ ವ್ಯಕ್ತಿಯೊಬ್ಬರು ಆದಾಯ ತೆರಿಗೆ ವಿನಾಯಿತಿ ಕೋರಿದ್ದರು. ಆದರೆ ಇಲಾಖೆಗೆ ಈ ಭೂಮಿಯಲ್ಲಿ ಮಾರಾಟಕ್ಕೆ ಮೊದಲು ಕೃಷಿ ಮಾಡಿರುವ ಬಗ್ಗೆ ಅನುಮಾನ ಹುಟ್ಟಿತ್ತು. ಈ ಬಗ್ಗೆ ತಿಳಿಯಲು ಇಸ್ರೊ ಮೊರೆ ಹೋದ ಇಲಾಖೆ ಈ ಜಮೀನಿನ ಮೂರು ವರ್ಷಗಳ ಪೋಟೊ ಕೇಳಿತು. ಮನವಿ ಪರಿಗಣಿಸಿದ ಇಸ್ರೊ ಮೂರು ವರ್ಷಗಳ ಪೋಟೊ ಪರಿಶೀಲಿಸಿ ಈ ಭೂಮಿಯಲ್ಲಿ ಬೆಳೆ ಬೆಳೆದಿಲ್ಲ ಎಂಬುದನ್ನು ದೃಢಪಡಿಸಿತು.

ಹೀಗಾಗಿ ಇಲಾಖೆಯು ಭೂಮಿ ಮಾರಿದ್ದ ವ್ಯಕ್ತಿಗೆ ತೆರಿಗೆ ವಿನಾಯಿತಿ ನಿರಾಕರಿಸಿತು. ಒಟ್ಟಿನಲ್ಲಿ ಯಾರೂ ತೆರಗೆ ವಂಚಿಸಿ ಪಾರಾಗುವಂತಿಲ್ಲ ಎಂದು ಆದಾಯ ತೆರಿಗೆ ಇಲಾಖೆ ಸಾಬೀತುಪಡಿಸಿದೆ.

ಇಸ್ರೊ, ಸಿಬಿಐ, ಎಇಡ, ಸೆಬಿ, ಆರ್‌ಟಿಒ, ಸಾರ್ವಜನಿಕ ಮತ್ತು ಖಾಸಗಿ ಬ್ಯಾಂಕ್‌ಗಳು, ನೋಂದಾಯಿತ ಕಂಪೆನಿಗಳು, ಲ್ಯಾಂಡ್‌ ರಿಜಿಸ್ಟ್ರಾರ್‌ ಸೇರಿದಂತೆ ಹಲವು ಏಜೆನ್ಸಿಗಳ ನೆರವಿನೊಂದಿಗೆ ತೆರಿಗೆ ವಂಚನೆ ತಡೆಗೆ ಕಟ್ಟು ನಿಟ್ಟಿನ ಕ್ರಮಗಳನ್ನು ಕೈಗೊಳ್ಳುತ್ತಿದೆ.