ಈತನ ತಲೆಗೆ ಸರಿ ಹೊಂದುವಂಥ ಹೆಲ್ಮೆಟ್‌ ಇಲ್ಲ; ಭಾರಿ ದಂಡದಿಂದ ತಪ್ಪಿಸಿಕೊಂಡ ಗುಜರಾತಿ ವ್ಯಕ್ತಿ

ಅಹಮದಾಬಾದ್‌: ದೇಶಾದ್ಯಂತ ಈಗ ಹೊಸದಾಗಿ ಜಾರಿಗೆ ಬಂದಿರುವ ಮೋಟಾರು ವಾಹನ ತಿದ್ದುಪಡಿ ಕಾಯ್ದೆ ಹಾಗೂ ಭಾರಿ ದಂಡದ ಬಗ್ಗೆ ಚರ್ಚೆಯಾಗುತ್ತಿದೆ.

ಹಲವಾರು ಮಂದಿ ಸಾವಿರಾರು ರೂಪಾಯಿ ದಂಡ ಕಟ್ಟಿ ತಲೆ ಮೇಲೆ ಕೈ ಇಟ್ಟುಕೊಂಡಿದ್ದಾರೆ.

ಆದರೆ ಗುಜರಾತ್‌ನ ವ್ಯಕ್ತಿಯೊಬ್ಬರು ಭಾರಿ ದಂಡದಿಂದ ತಪ್ಪಿಸಿಕೊಂಡಿದ್ದಾರೆ. ಆದರೆ ಇವರು ಎಲ್ಲ ದಾಖಲೆಗಳನ್ನು ಸರಿಯಾಗಿಯೇ ಇಟ್ಟುಕೊಂಡಿದ್ದಾರೆ. ಇವರ ಮುಖ್ಯ ಸಮಸ್ಯೆ ಎಂದರೆ ಹೆಲ್ಮೆಟ್‌.

ಇಂಥ ಸಮಸ್ಯೆ ಎದುರಿಸುತ್ತಿರುವವರು ಗುಜರಾತ್‌ನ ಛೋಟಾ ಉದಯಪುರ ಜಿಲ್ಲೆಯ ಬೊಡೆಲಿ ನಗರದ ಝಾಕೀರ್‌ ಮೆಮನ್‌.

ಹೌದು ಹೆಲ್ಮೆಟ್‌ ಧರಿಸದೇ ಇದ್ದರೂ ಝಾಕೀರ್‌ಗೆ ದಂಡ ಹಾಕುತ್ತಿಲ್ಲ. ಇದಕ್ಕೆ ಕಾರಣವೂ ಇದೆ.

ಝಾಕೀರ್‌ ಮೆಮನ್‌ ದಿನವೂ ತಮ್ಮ ದ್ವಿಚಕ್ರ ವಾಹನದಲ್ಲಿಯೇ ತೆರಳುತ್ತಾರೆ. ಡ್ರೈವಿಂಗ್‌ ಲೈಸೆನ್ಸ್‌, ವಾಹನ ವಿಮೆ, ಆರ್‌ಸಿ ಹೀಗೆ ಎಲ್ಲ ದಾಖಲೆಗಳ ಪ್ರತಿಯನ್ನು ಇಟ್ಟುಕೊಂಡಿದ್ದಾರೆ.

ಆದರೆ ಇವರಿಗೆ ಹೆಲ್ಮೆಟ್‌ ಧರಿಸಲು ಆಗುವುದೇ ಇಲ್ಲ. ಸದ್ಯ ಮಾರುಕಟ್ಟೆಯಲ್ಲಿರುವ ಯಾವುದೇ ಹೆಲ್ಮೆಟ್‌ ಇವರ ತಲೆಗೆ ಕೂರುತ್ತಿಲ್ಲ. ಏಕೆಂದರೆ ಇವರ ತಲೆ ಸ್ವಲ್ಪ ದಪ್ಪ ಇದೆ.

ಇಡೀ ಮಾರುಕಟ್ಟೆಯಲ್ಲಿರುವ ಹೆಲ್ಮೆಟ್‌ ಅಂಗಡಿಗಳಲ್ಲಿ ವಿಚಾರಿಸಿದರೂ ಝಾಕೀರ್‌ಗೆ ತಮ್ಮ ತಲೆಗೆ ಹೊಂದುವ ಹೆಲ್ಮೆಟ್‌ ದೊರೆಯುತ್ತಿಲ್ಲ.

ಇತ್ತೀಚೆಗೆ ಸಾರಿಗೆ ಪೊಲೀಸರು ಝಾಕೀರ್‌ ಅವರನ್ನು ಹಿಡಿದಾಗ ಎಲ್ಲ ದಾಖಲೆಗಳನ್ನು ತೋರಿಸಿದರು. ಹೆಲ್ಮೆಟ್‌ ಯಾಕೆ ಹಾಕಿಲ್ಲ ಎಂದು ಕೇಳಿದಾಗ ಝಾಕೀರ್‌ ತಮ್ಮ ಅನುಭವ ಬಿಚ್ಚಿಟ್ಟರು.

ಪೊಲೀಸರು ಕೂಡ ಒಮ್ಮೆ ಹೆಲ್ಮೆಟ್‌ ಹಾಕುವಂತೆ ಹೇಳಿ ಪರಿಶೀಲಿಸಿದರು. ಮರು ಮಾತನಾಡದೆ ದಂಡ ವಿಧಿಸದೇ ಝಾಕೀರ್‌ನನ್ನು ಬಿಟ್ಟುಬಿಟ್ಟರು.

ನಂತರ ಮಾತನಾಡಿದ ಟ್ರಾಫಿಕ್‌ ಪೊಲೀಸ್‌ ಇನ್ಸ್‌ಪೆಕ್ಟರ್‌ ವಸಂತ್‌ ರಥವಾ, ಝಾಕೀರ್‌ ಸಾರಿಗೆ ನಿಯಮವನ್ನು ಪಾಲಿಸುತ್ತಿದ್ದಾರೆ. ಅವರ ಬಳಿ ಎಲ್ಲ ದಾಖಲೆಗಳು ಕ್ರಮಬದ್ಧವಾಗಿದೆ. ಆದರೆ ಹೆಲ್ಮೆಟ್‌ ಅವರಿಗೆ ಸರಿ ಹೊಂದುತ್ತಿಲ್ಲ. ಇದನ್ನು ಏನು ಮಾಡಲಾಗದು. ಅವರಿಗೆ ಹುಷಾರಾಗಿ ವಾಹನ ಚಲಾಯಿಸುವಂತೆ ಮನವರಿಕೆ ಮಾಡಿಕೊಟ್ಟಿದ್ದೇವೆ ಎಂದರು.